ວັນທີ 30 ສິງຫານີ້ ຢູ່ນະຄອນຫຼວງປັກກິ່ງ ສປ ຈີນ, ທ່ານ ຊາງວ້ານຊວນ ທີ່ປຶກສາແຫ່ງລັດ, ທັງເປັນລັດຖະມົນຕີກະຊວງປ້ອງກັນປະເທດຈີນໄດ້ພົບປະກັບທ່ານ ໂງຊວນລິກ ລັດຖະມົນຕີກະຊວງປ້ອງກັນປະເທດຫວຽດນາມ.
ໂອກາດດັ່ງກ່າວ, ທ່ານຊາງວ້ານຊວນ ກ່າວວ່າ, ຈີນ-ຫວຽດນາມແມ່ນເພື່ອນບ້ານທີ່ດີ, ເພື່ອນມິດທີ່ດີ, ສະຫາຍທີ່ດີ ແລະໝູ່ຄູ່ທີ່ດີໂດຍມີພູຜາແມ່ນ້ຳຕິດຈອດກັນ, ຈີນຍິນດີຮ່ວມກັບຫວຽດນາມ ເພື່ອຈັດຕັ້ງປະຕິບັດຄວາມເປັນເອກະພາບທີ່ສຳຄັນລະຫວ່າງທ່ານເລຂາທິການໃຫຍ່ ສີຈິ້ນຜິງ ແລະທ່ານເລຂາທິການໃຫຍ່ ຫງວຽນຟູຈອງ ຢ່າງຮອບດ້ານ, ເພີ່ມທະວີການໄປມາຫາສູ່ກັນລະຫວ່າງການນຳຂັ້ນສູງຂອງສອງກອງທັບ ແລະເພີ່ມທະວີການຮ່ວມມືໃນວຽກງານຄວາມໝັ້ນຄົງຫຼາຍຝ່າຍ. ແນວໃດກໍດີ, ສອງຝ່າຍຄວນປະຕິບັດຕໍ່ຢ່າງພາວະວິໄສແລະແກ້ໄຂຄວາມຂັດແຍ້ງກັນຢ່າງເໝາະສົມ ແລະພະຍາຍາມຢ່າງຕັ້ງໜ້າເພື່ອສັນຕິພາບແລະສະຖຽນລະພາບຂອງພາກພື້ນຕົນ.
ທ່ານ ໂງຊວນລິກ ກ່າວວ່າ, ຍິນດີເພີ່ມທະວີຄວາມສາມັກຄີ, ສາຍພົວພັນມິດຕະພາບແລະການຮ່ວມມືລະຫວ່າງສອງກອງທັບຫວຽດນາມ-ຈີນຕື່ມອີກ ແລະພະຍາຍາມເຮັດໃຫ້ການພົວພັນລະຫວ່າງສອງກອງທັບກາຍເປັນເສົ້າຄ້ຳຂອງສາຍພົວພັນສອງປະເທດ ເພື່ອສ້າງຄວາມສຸກໃຫ້ແກ່ປະຊາຊົນສອງຊາດ.