ໄທເປີດຕຶກ "ມະຫານະຄອນ" ເຊິ່ງເປັນຕຶກສູງສຸດທີ່ຫາກໍ່ສ້າງສຳເລັດນັ້ນດ້ວຍການສະແດງແສງສີເປັນເທື່ອທຳອິດໃນປະຫວັດສາດຂອງປະເທດດັ່ງກ່າວເພື່ອສະເຫຼີມສະຫຼອງຜົນສຳເລັດຂອງການກໍ່ສ້າງ, ທ່ານກອບການ ວັດທະນະວະຣາງກູນ ລັດຖະມົນຕີກະຊວງການທ່ອງທ່ຽວແລະກິລາໄທກ່າວວ່າ: ຕຶກໃຫຍ່ແລະສວຍງາມຫຼັງນີ້ຈະເປັນສະຖານທີ່ທ່ອງທ່ຽວທີ່ນັກທ່ອງທ່ຽວພາຍໃນແລະຕ່າງປະເທດບໍ່ຄວນພາດ ທັງສາມາດເຮັດໃຫ້ຊາວຕ່າງປະເທດເພີ່ມຄວາມໝັ້ນໃຈຕໍ່ການພັດທະນາເສດຖະກິດແລະທ່ອງທ່ຽວຂອງໄທ.
ຕຶກ "ມະຫານະຄອນ"ຕັ້ງຢູ່ເຂດການຄ້າສີລົມໃຈກາງນະຄອນຫຼວງບາງກອກ, ສູງ 314 ແມັດ ເຊິ່ງທຳລາຍສະຖິຕິຕຶກໃບຢົກ2ທີ່ສູງ 304 ແມັດ ທີ່ມີອາຍຸ 18 ປີແລ້ວ. ການສະແດງແສງສີໃນເວລາ 4 ນາທີແລະທ່າມກາງສາຍຝົນແຮງນັ້ນມີຊາວເມືອງຈຳນວນຫຼາຍໄດ້ຢືນຢູ່ສະຖານີລົດໄຟຟ້າທີ່ເຊື່ອມຕໍ່ກັບຕຶກໃຫຍ່ດັ່ງກ່າວໂດຍເອົາມືຖືຖ່າຍພາບງາມທີ່ແສງໄຟສາດສ່ອງທົ່ວບໍລິເວນ. ຢູ່ບໍລິເວນອ້ອມແອ້ມຕຶກໃຫຍ່ກໍມີຊາວເມືອງຫຼາຍຄົນແຂ່ງຝົນປີນຂຶ້ນຫຼັງຄາຕຶກທີ່ເປີດເປັນພິເສດເພື່ອຊົມແສງສີທີ່ງົດງາມດັ່ງກ່າວ.