ວັນທີ 9 ກັນຍານີ້, ສາທາລະນະລັດປະຊາຊົນຈີນແລະສາທາລະນະລັດປະຊາທິປະໄຕປະຊາຊົນລາວໄດ້ປະກາດຖະແຫຼງການຮ່ວມ. ໂດຍມີເນື້ອໃນດັ່ງນີ້:
1,ໂດຍຕອບສະໜອງຕາມຄຳເຊີນຂອງທ່ານທອງລຸນ ສີສຸລິດ, ນາຍົກລັດຖະມົນຕີ ສປປ ລາວ, ທ່ານຫຼີເຄີ້ສຽງ, ນາຍົກລັດຖະມົນຕີ ສປ ຈີນໄດ້ຢ້ຽມຢາມ ສປປ ລາວຢ່າງເປັນທາງການແຕ່ວັນທີ 8 ຫາວັນທີ 9 ກັນຍາປີ 2016.
ໃນໄລຍະຢ້ຽມຢາມ, ທ່ານຫຼີເຄີ້ສຽງໄດ້ເຂົ້າຢ້ຽມຄຳນັບທ່ານບຸນຍັງ ວໍລະຈິດ, ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ ປະທານປະເທດ ສປປ ລາວ, ພົບປະກັບທ່ານທອງລຸນ ສີສຸລິດ, ນາຍົກລັດຖະມົນຕີ ສປປ ລາວ, ແລະໄດ້ເຂົ້າຢ້ຽມຄຳນັບທ່ານນາງປານີ ຢາທໍ່ຕູ້, ປະທານສະພາແຫ່ງຊາດລາວ. ສອງຝ່າຍໄດ້ແຈ້ງສະຖານະການພາຍໃນຂອງປະເທດຕົນໃຫ້ຊາບ, ແລະໄດ້ແລກປ່ຽນຄວາມເຫັນຢ່າງເລິກເຊິ່ງກ່ຽວກັບການເສີມຂະຫຍາຍສາຍພົວພັນລະຫວ່າງຈີນ-ລາວໃນຍຸກສະໄໝໃໝ່ແລະບັນຫາທີ່ສອງຝ່າຍສົນໃຈຮ່ວມກັນ, ແລະກ້າວເຖິງຄວາມເຫັນເປັນເອກະພາບກັນສຳຄັນ.
2, ທັງສອງຝ່າຍໄດ້ທົບທວນຄືນແລະຕີລາຄາສູງຕໍ່ການເສີມຂະຫຍາຍການພົວພັນ ພາຍຫຼັງສອງປະເທດສ້າງຕັ້ງສາຍພົວພັນທາງການທູດມາເປັນເວລາ 55 ປີ, ພ້ອມທັງເປັນເອກະສັນກັນເຫັນວ່າພາຍໃຕ້ການຊີ້ນຳຂອງພັກແລະລັດຖະບານແລະຄວາມພະຍາຍາມຮ່ວມກັນ, ສອງປະເທດໄດ້ຮັບໝາກຜົນຢ່າງອັນອຸດົມສົມບູນໃນການຮ່ວມມືແລະການຮັກສາການປະສານພົວພັນຢ່າງໃກ້ຊິດໃນວຽກງານພາກພື້ນແລະສາກົນ, ເຊິ່ງບໍ່ພຽງແຕ່ໄດ້ນຳເອົາຜົນປະໂຫຍດອັນແທ້ຈິງມາສູ່ປະຊາຊົນສອງປະເທດ, ຍັງໄດ້ປະກອບສ່ວນອັນຕັ້ງໜ້າເຂົ້າໃນການຊຸກຍູ້ສັນຕິພາບ, ສະຖຽນລະພາບ, ການພັດທະນາແລະຄວາມຈະເລີນຮຸ່ນເຮືອງຂອງພາກພື້ນກໍຄືຂອງໂລກ.
3, ສອງຝ່າຍເປັນເອກະພາບກັນວ່າ:ຈີນແລະລາວລ້ວນແຕ່ໄດ້ຍຶດໝັ້ນເສັ້ນທາງສັງຄົມນິຍົມ,ມີອຸດົມການຄວາມເຊື່ອໝັ້ນອະນາຄົດແລະເປົ້າໝາຍສູ້ຊົນເຊັ່ນກັນ ໂດຍຜະເຊີນກັບສະຖານະການສາກົນແລະພາກພື້ນທີ່ຜັນແປຢ່າງສັບສົນ,ສອງຝ່າຍຈະສືບຕໍ່ຍຶດໝັ້ນທິດທາງ "ຄວາມໝັ້ນຄົງແບບຍາວນານ,ໄມຕີຈິດມິດຕະພາບຖານບ້ານໃກ້ເຮືອນຄຽງທີ່ດີ,ມີຄວາມໄວ້ເນື້ອເຊື່ອໃຈກັນແລະການຮ່ວມມືຢ່າງຮອບດ້ານ" ແລະ ນ້ຳໃຈ "ເປັນບ້ານໃກ້ຄຽງທີ່ດີ,ເພື່ອນມິດທີ່ດີ,ສະຫາຍທີ່ດີແລະຄູ່ຮ່ວມທີ່ດີ", ເສີມຂະຫຍາຍຄວາມໄວ້ເນື້ອເຊື່ອໃຈກັນທາງການເມືອງໃຫ້ໜັກແໜ້ນເລື້ອຍໆ,ເປີດກວ້າງການຮ່ວມມືແບບຕ່າງຝ່າຍຕ່າງມີຜົນປະໂຫຍດ,ລົງເລິກການແລກປ່ຽນດ້ານວັດທະນະທຳ,ເພີ່ມທະວີການປະສານງານຫຼາຍຝ່າຍ,ຍົກການພົວພັນລະຫວ່າງຈີນ-ລາວໃຫ້ກ້າວຂຶ້ນສູ່ລະດັບໃໝ່ຢ່າງບໍ່ຢຸດຢັ້ງ.
4, ສອງຝ່າຍເຫັນດີຈະເພີ່ມທະວີການໄປມາຫາສູ່ກັນລະຫວ່າງການນຳຂັ້ນສູງແລະການຕິດຕໍ່ພົວພັນທາງຍຸດທະສາດ,ແລກປ່ຽນຄວາມຄິດຄວາມເຫັນຢ່າງທັນການກ່ຽວກັບສາຍພົວພັນສອງຝ່າຍແລະບັນຫາທີ່ສຳຄັນແລະໃຫຍ່ຫຼວງທີ່ສົນໃຈຮ່ວມກັນໂດຍຜ່ານການຢ້ຽມຢາມກັນ,ການພົບປະປະຈຳປີ,ການພົບປະຫຼາຍຝ່າຍແລະຮູບການອື່ນໆ. ສອງຝ່າຍຈະລົງເລິກການແລກປ່ຽນບົດຮຽນການປົກຄອງປະເທດ,ສືບຕໍ່ຈັດກອງປະຊຸມແລະສຳມະນາວິທະຍາສາດແນວທາງນະໂຍບາຍຂອງສອງພັກໃຫ້ດີ,ເພີ່ມທະວີການຮ່ວມມືອົບຮົມພະນັກງານພັກແລະລັດ,ຊຸກຍູ້ການແລກປ່ຽນແລະການຮ່ວມມືລະຫວ່າງພາກສ່ວນທີ່ກ່ຽວຂ້ອງຂອງສອງປະເທດ.
5, ສອງຝ່າຍໄດ້ຕົກລົງຈະເລັ່ງລັດຊຸກຍູ້ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ"ແລະແຜນການ 5 ປີຄັ້ງທີ 13 ທີ່ຈີນສະເໜີເຊື່ອມຕໍ່ກັບຍຸດທະສາດຈາກປະເທດທີ່ບໍ່ມີທາງອອກສູ່ທະເລເປັນປະເທດໃຈກາງບໍລິການທາງຜ່ານແລະແຜນພັດທະນາເສດຖະກິດສັງຄົມ 5 ປີຄັ້ງທີ 8 ຂອງລາວໃຫ້ມີປະສິດທິຜົນ, ຮ່ວມກັນກຳນົດແລະຈັດຕັ້ງປະຕິບັດການຊຸກຍູ້ແຜນການຮ່ວມມືກ່ຽວກັບການສ້າງ "ໜຶ່ງແລວທາງໜຶ່ງເສັ້ນທາງ"ໃຫ້ດີ,ຊຸກຍູ້ການຮ່ວມມືດ້ານຄວາມສາມາດການຜະລິດແລະການລົງທຶນຢ່າງແທ້ຈິງ,ເສີມຂະຫຍາຍບົດບາດຂອງແຜນການຮ່ວມມືດ້ານເສດຖະກິດແລະເຕັກໂນໂລຊີລະຫວ່າງລັດຖະບານຂອງສອງປະເທດ. ຈີນຍິນດີຊ່ວຍລາວສ້າງແຜນການສະເພາະກ່ຽວກັບການພັດທະນາເສດຖະກິດແລະສືບຕໍ່ຊ່ວຍເຫຼືອລາວຕາມຄວາມສາມາດຂອງຕົນໃນການບັນລຸການພັດທະນາເສດຖະກິດສັງຄົມແບບຍືນຍົງ.
ສອງຝ່າຍຈະສືບຕໍ່ຊຸກຍູ້ໂຄງການທາງລົດໄຟຈີນ-ລາວຢ່າງຕັ້ງໜ້າໂດຍເຫັນດີເລັ່ງຕາມແຜນການກະກຽມໃນໄລຍະຜ່ານມາເພື່ອເລີ່ມກໍ່ສ້າງຮອບດ້ານພາຍໃນປີນີ້,ຂະນະດຽວກັນກໍເຮັດວຽກງານການຮັບປະກັນຕ່າງໆໃຫ້ດີເຮັດໃຫ້ການກໍ່ສ້າງແລະການດຳເນີນທຸລະກິດຂອງໂຄງການເປັນໄປຢ່າງສະດວກ.ສອງຝ່າຍຈະສົມທົບກັນຢ່າງໃກ້ຊິດສ້າງເຂດຮ່ວມມືເສດຖະກິດບໍ່ຫານ-ບໍ່ເຕັນແລະເຂດພັດທະນາສັງລວມໄຊເຊດຖາວຽງຈັນໃຫ້ດີ.
ສອງຝ່າຍເຫັນດີເພີ່ມທະວີການພົວພັນທາງການຄ້າຕື່ມອີກ,ຍົກສູງຂະໜາດແລະລະດັບການຄ້າ.ເພີ່ມທະວີການຮ່ວມມືລະຫວ່າງຂະແໜງການຕາມພາລະບົດບາດຕ່າງໆເປັນຕົ້ນດ່ານພາສີ,ການກວດເຊື້ອພະຍາດແລະກວດກາຄຸນນະພາບແລະອື່ນໆ,ຍົກສູງລະດັບການອຳນວຍຄວາມສະດວກໃນການຜ່ານດ່ານ,ເພື່ອສ້າງເງື່ອນໄຂສະດວກໃຫ້ແກ່ການຄ້າສອງຝ່າຍໃຫ້ຫຼາຍກວ່າເກົ່າ.ສືບຕໍເສີມຂະຫຍາຍບົດບາດຂອງກົນໄກຕ່າງໆເປັນຕົ້ນຄະນະກຳມະການການຮ່ວມມືເສດຖະກິດການຄ້າຈີນ-ລາວ,ໜ່ວຍງານການຮ່ວມມືແຂວງຢຸນນານຈີນ-ພາກເໜືອລາວແລະອື່ນໆ,ສຸມໃສ່ການແລກປ່ຽນແລະການຮ່ວມມືລະຫວ່າງແຂວງຊາຍແດນຕື່ມອີກ.
ສອງຝ່າຍຈະຈັດຕັ້ງປະຕິບັດໂຄງການທີ່ຕົກລົງເປັນເອກະພາບກັນ,ຕັ້ງໜ້າຊຸກຍູ້ໂຄງການປັບປຸງຍົກລະດັບໂຮງໝໍມະໂຫສົດໃຫ້ທັນສະໄໝ,ເສັ້ນທາງຊາຍແດນແລະອຸປະກອນຜ່ານດ່ານ,ຫ້ອງຈັດງານລ້ຽງຫໍປະຊຸມແຫ່ງຊາດພ້ອມດ້ວຍການຊ່ວຍສ້າງໂຮງຮຽນ 10 ແຫ່ງຢູ່ລາວແລະອື່ນໆ.
ສອງຝ່າຍເຫັນດີເສີມຂະຫຍາຍທ່າແຮງເຊິ່ງກັນແລະກັນ,ຍົກສູງລະດັບການຮ່ວມມືໃນຂົງເຂດຕ່າງໆເປັນຕົ້ນພື້ນຖານໂຄງລ່າງ,ກະສິກຳປ່າໄມ້,ພະລັງງານ,ຄົມມະນາຄົມ, ການສື່ສານແລະອື່ນໆ,ສືບຕໍ່ກໍ່ສ້າງແລະປະຕິບັດງານຂອງໂຄງການໃຫຍ່ເຊັ່ນດາວທຽມຈີນ-ລາວ,ການພັດທະນາພະລັງງານໄຟຟ້າແລະອື່ນໆໃຫ້ດີ,ຂຸດຄົ້ນການຮ່ວມມືຕິດຕາມຄຸ້ມຄອງການທະນາຄານ,ການກໍ່ສ້າງລະບົບນິເວດ,ການພັດທະນາພະລັງງານໃໝ່,ການລົງທຶນແລະການແລກປ່ຽນເຕັກນິກກະສິກຳແລະອື່ນໆ.
6, ສອງຝ່າຍເຫັນດີເປີດກວ້າງການແລກປ່ຽນແລະຮ່ວມມືໃນຂົງເຂດຕ່າງໆ ເຊັ່ນ ການສຶກສາ, ວັດທະນະທຳ, ສາທາລະນະສຸກ, ກິລາ, ທ່ອງທ່ຽວ ແລະອື່ນໆ ເພື່ອເສີມສ້າງຄວາມເຂົ້າໃຈກັນແລະໄມຕີຈິດ-ມິດຕະພາບລະຫວ່າງປະຊາຊົນສອງຊາດຢ່າງບໍ່ຢຸດຢັ້ງ. ສອງຝ່າຍຈະປິ່ນອ້ອມຂົງເຂດຮ່ວມມືທີ່ສຳຄັນ ແລະ ໂຄງການໃຫຍ່ລະຫວ່າງສອງຝ່າຍ ຊຸກຍູ້ການຮ່ວມມືອາຊີວະສຶກສາ. ຈີນຈະສະໜອງທຶນການສຶກສາລະດັບລັດຖະບານໃຫ້ລາວຫຼາຍກວ່າເກົ່າອີກ, ສືບຕໍ່ດຳເນີນການແລກປ່ຽນອາສາສະໝັກຊາວໜຸ່ມກັບລາວ ແລະ ຮ່ວມກັນອົບຮົມສ້າງຜູ້ສືບທອດມິດຕະພາບອັນເປັນມູນເຊື້ອລະຫວ່າງຈີນ-ລາວ. ຂະນະທີ່ລາວຈະສືບຕໍ່ສະໜັບສະໜູນການເຄື່ອນໄຫວຂອງສູນວັດທະນະທຳຈີນ, ສະຖາບັນຂົງຈື້ ມະຫາວິທະຍາໄລແຫ່ງຊາດລາວ ແລະອື່ນໆ ເພື່ອສົ່ງເສີມໄມຕີຈິດ-ມິດຕະພາບລະຫວ່າງສອງປະເທດໃຫ້ລົງສູ່ຂັ້ນຮາກຖານ.
7, ສອງຝ່າຍຈະເພີ່ມທະວີການຮ່ວມມືລະຫວ່າງສອງກອງທັບໃນການຢ້ຽມຢາມກັນລະຫວ່າງການນຳຂັ້ນຕ່າງໆ, ການຝຶກອົບຮົມບຸກຄະລາກອນ, ການຝຶກແອບການທະຫານ, ວຽກງານການເມືອງ ແລະອື່ນໆ ເພື່ອລົງເລິກການຮ່ວມມືລະຫວ່າງສອງກອງທັບຕື່ມອີກ. ສອງຝ່າຍຍັງເຫັນດີຈະເພີ່ມທະວີການຮ່ວມມືໃນການປະຕິບັດກົດໝາຍແລະຄວາມໝັ້ນຄົງ, ສ້າງກົນໄກການພົບປະລະດັບກະຊວງປ້ອງກັນຄວາມສະຫງົບຂອງສອງປະເທດ, ລົງເລິກການຮ່ວມມືໃນຂົງເຂດຕ່າງໆ ເຊັ່ນ ການປ້ອງກັນຄວາມປອດໄພພາຍໃນປະເທດ, ການນຳຈັບຜູ້ກະທຳຜິດທີ່ຫຼົບໜີໄປຢູ່ຕ່າງປະເທດພ້ອມຂອງກາງ, ປາບປາມອາຊະຍາກຳຂ້າມຊາດ, ການຮ່ວມມືປະຕິບັດກົດໝາຍແລະຄວາມປອດໄພຕາມລຸ່ມແມ່ນ້ຳຂອງ ແລະອື່ນໆ ພ້ອມທັງສະໜັບສະໜູນແຕ່ລະຝ່າຍປົກປັກຮັກສາຄວາມໝັ້ນຄົງແລະຄວາມສະຫງົບໃນສັງຄົມຂອງປະເທດຕົນ, ໃຊ້ມາດຕະການທີ່ມີປະສິດທິຜົນ ເພື່ອປ້ອງກັນຄວາມປອດໄພຂອງບຸກຄົນ, ອົງການຈັດຕັ້ງ ແລະ ໂຄງການກໍ່ສ້າງທີ່ສຳຄັນຂອງແຕ່ລະປະເທດທີ່ຢູ່ໃນປະເທດຕົນ.
8, ລາວກ່າວຢ້ຳວ່າຈະສືບຕໍ່ສະໜັບສະໜູນລັດຖະບານຈີນທີ່ສ້າງຄວາມພະຍາຍາມທຸກຢ່າງເພື່ອປົກປັກຮັກສາອະທິປະໄຕແລະຜືນແຜ່ນດິນອັນຄົບຖ້ວນຂອງຕົນ, ເດັດດ່ຽວປະຕິບັດນະໂຍບາຍປະເທດຈີນດຽວ, ສະໜັບສະໜູນການພັດທະນາການພົວພັນລະຫວ່າງສອງຝັ່ງຊ່ອງແຄບໄຕ້ຫວັນໂດຍສັນຕິ ແລະ ພາລະກິດທ້ອນໂຮມປະເທດຈີນເຂົ້າເປັນເອກະພາບ, ເດັດດ່ຽວຄັດຄ້ານການເຄື່ອນໄຫວທຸກຮູບແບບຂອງອິດທິກຳລັງແບ່ງແຍກໄຕ້ຫວັນໃຫ້ເປັນເອກະລາດ. ຈີນສະແດງຄວາມຂອບໃຈລາວ ແລະຢ້ຳເຄົາລົບການເປັນເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງລາວ, ສະໜັບສະໜູນລາວປົກປັກຮັກສາຄວາມໝັ້ນຄົງແລະຄວາມສະຫງົບພາຍໃນປະເທດຕົນ ແລະຊຸກຍູ້ພາລະກິດການປ່ຽນແປງໃໝ່ຢ່າງຮອບດ້ານ.
9, ສອງຝ່າຍໄດ້ສະແດງຄວາມພໍໃຈຕໍ່ການຮ່ວມມືລະຫວ່າງສອງຝ່າຍໃນວຽກງານສາກົນແລະພາກພື້ນ, ເຫັນດີຜ່ານກົນໄກການຮ່ວມມືທາງ
ການທູດ, ເພີ່ມທະວີການພົບປະ, ການແລກປ່ຽນແລະປະສານງານກັນ, ສືບຕໍ່ຮັກສາການແລກປ່ຽນຄວາມເຫັນກ່ຽວກັບບັນຫາທີ່ກ່ຽວພັນເຖິງ
ຜົນປະໂຫຍດທີ່ສຳຄັນຂອງແຕ່ລະຝ່າຍຢ່າງໃກ້ຊິດ, ທັນທີແລະມີປະສິດທິຜົນ, ໃຫ້ການສະໜັບສະໜູນເຊິ່ງກັນແລະກັນຢ່າງແຂງແຮງ. ພ້ອມ
ກັນນັ້ນກໍເພີ່ມທະວີການປະສານສົມທົບພາຍໃນຂອບສະຫະປະຊາຊາດ, ການຮ່ວມມືອາຊີຕາເວັນອອກ, ການຮ່ວມມືແມ່ນໍ້າລ້ານຊ້າງ-ແມ່ນໍ້າ
ຂອງ, ກອງປະຊຸມອາເຊັມແລະຂອບຫຼາຍຝ່າຍອື່ນໆ.
ລາວຊົມເຊີຍຈີນທີ່ປະສົມຜົນສຳເລັດໃນການຈັດກອງປະຊຸມ G20 ຫາງໂຈຢ່າງຈົບງາມ, ຂອບໃຈຈີນທີ່ໄດ້ຊ່ວຍເຫຼືອແລະສະໜັບສະໜູນ
ການເປັນປະເທດປະທານໝູນວຽນອາຊຽນທີ່ດີ, ຍ້ອງຍໍຊົມເຊີຍຈີນທີ່ໄດ້ປະກອບສ່ວນອັນຕັ້ງໜ້າເຂົ້າໃນການເຕີບໂຕຂອງເສດຖະກິດໂລກ
ແລະການພັດທະນາຂອງອະນຸລັກພາກພື້ນ. ຈີນກໍໄດ້ຊົມເຊີຍລາວທີ່ໄດ້ເປັນເຈົ້າພາບຈັດກອງປະຊຸມຕ່າງໆກ່ຽວກັບການຮ່ວມມືອາຊີຕາເວັນ
ອອກປະສົບຜົນສຳເລັດຢ່າງຈົບງາມ, ເຊິ່ງໄດ້ປະຕິບັດພາລະໜ້າທີ່ໃນການເປັນປະເທດປະທານໝູນວຽນອາຊຽນປີ 2016, ຕີລາຄາສູງທີ່
ລາວໄດ້ເສີມຂະຫຍາຍບົດບາດສຳຄັນໃນການຊຸກຍູ້ການພົວພັນລະຫວ່າງຈີນ-ອາຊຽນແລະການຮ່ວມມອາຊີຕາເວັນອອກ.
10、 ໃນໄລຍະທ່ານຫຼີເຄີ້ສຽງຢ້ຽມຢາມລາວ, ສອງຝ່າຍໄດ້ເຊັນເອກະ ສານຮ່ວມມືຕ່າງໆເຊັ່ນ:ບົດບັນທຶກຄວາມເຂົ້າໃຈກັນກ່ຽວກັບການວາງໂຄງຮ່າງການຣ່ວມມືເພື່ອຊຸກຍູ້ການສ້າງ "ໜຶ່ງແລວທາງ ໜຶ່ງເສັ້ນທາງ", ສັນຍາກ່ຽວກັບການກຳນົດແລະຮ່ວມກັນຊຸກຍູ້ໂຄງການສຳຄັນໃນການຮ່ວມມືເພີ່ມຂີດຄວາມສາມາດຂອງການຜະລິດ ແລະ ການລົງທຶນ, ຂອບສັນຍາກ່ຽວກັບການຮ່ວມວາງແຜນການຮ່ວມມືໃນໂຄງການສະເພາະກິດທີ່ສຳຄັນໃນຂົງເຂດເສດຖະກິດຕົ້ນຕໍກຕ່າງໆເຊັ່ນ: ພະລັງງານໄຟຟ້າ, ການພັດທະນາຢູ່ເຂດລຽບຕາມທາງລົດໄຟຈີນ-ລາວ ແລະການທ່ອງທ່ຽວເປັນຕົ້ນ, ສັນຍາເພີ່ມຕື່ມຂອງແຜນການຮ່ວມມືດ້ານເສດຖະກິດແລະເຕັກນິກ, ບົດບັນທຶກຄວາມເຂົ້າໃຈ ກ່ຽວກັບການດຳເນີນການຮ່ວມມືດ້ານແລກປ່ຽນຂ່າວລັບແລະຂໍ້ມູນຂ່າວສານໃນຂົງເຂດປະຕິບັດກົດໝາຍພາຍໃນປະເທດ, ສັນຍາກ່ຽວກັບສ້ອມແປງແລະຮັກສາສຸສານນັກຮົບຈີນຢູ່ລາວ, ແຜນການປະຕິບັດການຮ່ວມມືດ້ານວັດທະນະທຳແຕ່ປີ 2016-2018 , ການຈັດວາງກ່ຽວກັບການຮ່ວມມືໃນການເຂົ້າອອກດ່ານຢ່າງສະດວກ,ບົດບັນທຶກຄວາມເຂົ້າໃຈກ່ຽວກັບການຮ່ວມມືດ້ານຕິດຕາມກວດກາທະນາຄານລຫວ່າງສອງຝ່າຍ》ແລະເອກະສານຕ່າງໆ.
11 、ສອງຝ່າຍເປັນເອກະສັນກັນເຫັນວ່າ, ການຢ້ຽມຢາມ ສປປ ລາວຂອງທ່ານນາຍົກລັດຖະມົນຕີ ຫຼີເຄີ້ສຽງ ໃນຄັ້ງນີ້ໄດ້ຮັບໝາກຜົນຢ່າງເຕັມເມັດເຕັມໜ່ວຍ ເຊິ່ງຈະເປັນສ່ວນສຳຄັນໃນການເສີມຂະຫຍາຍມິດຕະພາບອັນເປັນມູນເຊື້ອລະຫວ່າງຈີນ-ລາວໃຫ້ໝັ້ນຄົງເລື້ອຍໆ, ລົງເລິກການຮ່ວມມືຍຸດທະສາດຮອບດ້ານໃນສະໄໝໃໝ່ ແລະໄດ້ເສີມຂະຫຍາຍບົດບາດທີ່ສຳຄັນເຂົ້າໃນການຊຸກຍູ້ສັນຕິພາບ, ສະຖຽນລະພາບ ແລະການພັດທະນາຂອງພາກພື້ນ ກໍ່ຄືຂອງໂລກ.
12、 ທ່ານຫຼີເຄີ້ສຽງ ໄດ້ຕາງໜ້າລັດຖະບານ ແລະປະຊາຊົນຈີນ ຂອບໃຈລັດຖະບານແລະປະຊາຊົນລາວທີ່ໄດ້ຕ້ອນຮັບຢ່າງອົບອຸ່ນ ແລະເຊີນທ່ານນາຍົກລັດຖະມົນຕີທອງລຸນ ສີສຸລິດຢ້ຽມຢາມຈີນໃນເວລາອັນເໝາະສົມ. ທ່ານທອງລຸນ ສີສຸລິດສະແດງຄວາມຂອບອົກຂອບໃຈ ແລະຮັບເອົາຄຳເຊີນດັ່ງກ່າວ.
