ໂດຍຕອບສະໜອງຕາມຄຳເຊີນຂອງທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ, ທ່ານ ຫຼີເຄີ້ສຽງ ນາຍົກລັດຖະມົນຕີຈີນໄດ້ຢ້ຽມຢາມລາວຢ່າງເປັນທາງການແຕ່ວັນທີ 8 ຫາວັນທີ 9 ກັນຍານີ້. ໃນໄລຍະຢ້ຽມຢາມ, ທ່ານ ຫຼີເຄີ້ສຽງ ໄດ້ເຂົ້າຢ້ຽມຄຳນັບທ່ານ ບຸນຍັງ ວໍລະຈິດ, ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ,ປະທານປະເທດ ພ້ອມທັງພົບປະກັບທ່ານນາຍົກລັດຖະມົນຕີທອງລຸນ ສີສຸລິດແລະ ທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດລາວ ໂດຍສອງຝ່າຍໄດ້ບັນລຸຂໍ້ຕົກລົງທີ່ສຳຄັນແລະອອກຖະແຫຼງການຮ່ວມ.
ຖະແຫຼງການໄດ້ຕີລາຄາສູງຕໍ່ການພັດທະນາສາຍພົວພັນລະຫວ່າງສອງປະເທດນັບແຕ່ການສ້າງຕັ້ງສາຍພົວພັນທາງການທູດເປັນເວລາ 55 ປີຜ່ານມາ ເຫັນວ່າຈີນແລະລາວລ້ວນແຕ່ຍຶດໝັ້ນເດີນຕາມເສັ້ນທາງສັງຄົມນິຍົມ,ມີອຸດົມການ,ທັດສະນະຄະຕິແລະເປົ້າໝາຍສູ້ຊົນຄ້າຍຄືກັນ. ສອງຝ່າຍເຫັນດີຈະເພີ່ມທະວີການໄປມາຫາສູ່ຢ້ຽມຢາມກັນລະຫວ່າງການນຳຂັ້ນສູງແລະການແລກປ່ຽນທາງຍຸດທະສາດ,ສືບຕໍ່ຊຸກຍູ້ໂຄງການທາງລົດໄຟຈີນ-ລາວຢ່າງຕັ້ງໜ້າ. ເພີ່ມທະວີການພົວພັນດ້ານການຄ້າ,ເພີ່ມທະວີການແລກປ່ຽນແລະຮ່ວມມືໃນດ້ານຕ່າງໆລະຫວ່າງສອງກອງທັບແລະສອງປະເທດ.
ຖະແຫຼງການຊີ້ວ່າ:ໃນການຢ້ຽມຢາມຄັ້ງນີ້, ຈີນແລະລາວໄດ້ເຊັນເອກະສານຮ່ວມມືຫຼາຍສະບັບ ການຢ້ຽມຢາມໄດ້ຮັບຜົນສຳເລັດຢ່າງຈົບງາມ ເຊິ່ງເປັນການປະກອບສ່ວນທີ່ສຳຄັນຕໍ່ການປັບປຸງມິດຕະພາບອັນເປັນມູນເຊື້ອລະຫວ່າງຈີນ-ລາວແລະລົງເລິກການຮ່ວມມືຍຸດທະສາດຮອບດ້ານລະຫວ່າງສອງຝ່າຍໃນຍຸກໃໝ່.
 |
