ທ່ານນາງ ຮວ້າຊຸນຍິງ ໂຄສົກກະຊວງການຕ່າງປະເທດຈີນໄດ້ຖະແຫຼງໃນວັນທີ 9 ກັນຍານີ້ວ່າ, ທ່ານ ຫຼີເຄິ້ສຽງ ນາຍົກລັດຖະມົນຕີຈີນໄດ້ເຂົ້າຮ່ວມກອງປະຊຸມຜູ້ນຳການຮ່ວມມືອາຊີຕາເວັນອອກຕ່າງໆທີ່ຈັດຂຶ້ນຢູ່ນະຄອນຫຼວງວຽງຈັນ ສປປ ລາວເຊິ່ງ ແລະປະສົບຜົນສຳເລັດ.
ທ່ານນາງ ຮວ້າຊຸນຍິງ ກ່າວວ່າ, ໃນກອງປະຊຸມສຸດຍອດເພື່ອລະນຶກຈີນ-ອາຊຽນສ້າງຕັ້ງສາຍພົວພັນຄູ່ເຈລະຈາຄົບຮອບ 25 ປີ, ຈີນແລະອາຊຽນເປັນເອກະພາບກັນວ່າ, ຍິນດີສືບຕໍ່ເພີ່ມທະວີການແລກປ່ຽນທາງຍຸດທະສາດແລະລົງເລິກການຮ່ວມມືທີ່ແທ້ຈິງ. ຂະນະທີ່ໃນໄລຍະຈັດກອງປະຊຸມ, ຈີນແລະອາຊຽນໄດ້ຮັບຮອງເອົາເອກະສານຕ່າງໆທີ່ເປັນໝາກຜົນກອງປະຊຸມ ໂດຍຈີນສະແດງຄວາມຊົມເຊີຍຕໍ່ການສ້າງປະຊາຄົມອາຊຽນສຳເລັດຜົນທັງສະໜັບສະໜູນຂະບວນການເຊື່ອມໂຍງຂອງອາຊຽນກໍຄືສະໜັບສະໜູນບົດບາດເປັນໃຈກາງໃນພາກພື້ນຂອງອາຊຽນ. ຂະນະດຽວກັນ, ອາຊຽນຢ້ຳການພັດທະນາຂອງຈີນເປັນກາລະໂອກາດສຳຄັນໃນພາກພື້ນນີ້ແລະສະໜັບສະໜູນຈີນພັດທະນາໂດຍສັນຕິແລະຍຶດໝັ້ນນະໂຍບາຍປະເທດຈີນດຽວຢ່າງສະເໝີຕົ້ນສະເໝີປາຍ.
ໃນກອງປະຊຸມອາຊຽນ, ຈີນ, ຍີ່ປຸ່ນແລະ ສ.ເກົາຫຼີ ຫຼື 10+3, ຝ່າຍຕ່າງໆໄດ້ອອກ "ຖະແຫຼງການກ່ຽວກັບການຊຸກຍູ້ການພັດທະນາແບບຍືນຍົງ" ໂດຍເນັ້ນນຳໃຊ້ມາດຕະການຢ່າງຮອບດ້ານ, ວ່ອງໄວແລະມີປະສິດທິຜົນເພື່ອຊຸກຍູ້ເປົ້າໝາຍການພັດທະນາແບບຍືນຍົງບົນຈິດໃຈທີ່ສະເໝີພາບ, ຮ່ວມມືກັນແລະກວມລວມ; ຂະນະທີ່ກອງປະຊຸມສຸດຍອດອາຊີຕາເວັນອອກໄດ້ອອກຖະແຫຼງການວຽງຈັນກ່ຽວກັບການຊຸກຍູ້ການຮ່ວມມືພັດທະນາພື້ນຖານໂຄງລ່າງຢູ່ອາຊີຕາເວັນອອກໂດຍສົ່ງເສີມປະເທດໃນພາກພື້ນລົງເລິກການຮ່ວມມືໃນການສ້າງພື້ນຖານໂຄງລ່າງຕື່ມອີກເພື່ອຊຸກຍູ້ຂະບວນການເຊື່ອມໂຍງຂອງພາກພື້ນ.
 |
