ງານວາງສະແດງສິນຄ້າຈີນ-ອາຊຽນ ແລະ ກອງປະຊຸມສຸດຍອດການຄ້າ ແລະ ການລົງທຶນຈີນ-ອາຊຽນຄັ້ງທີ 13 ໄດ້ໄຂຂຶ້ນຢູ່ເມືອງນານນິງເຂດກວາງຊີ ສປ ຈີນເມື່ອວັນທີ 11 ກັນຍານີ້ ໂດຍຫົວຂໍ້ຕົ້ນຕໍເນັ້ນ "ຮ່ວມກັນສ້າງເສັ້ນທາງສາຍໄໝທາງທະເລສະຕະວັດທີ 21, ຮ່ວມກັນສ້າງປະຊາຄົມຮ່ວມຊະຕາກຳຈີນ-ອາຊຽນທີ່ແໜ້ນແຟ້ນກວ່າເກົ່າ".
ທ່ານ ຈ່າງກ່າວລີ້ ຮອງນາຍົກລັດຖະມົນຕີຈີນ ໄດ້ເຂົ້າຮ່ວມ ແລະກ່າວປາໄສໃນພິທີໄຂງານວ່າ, ການສ້າງເສັ້ນທາງສາຍໄໝທາງທະເລສະຕະວັດທີ 21 ໄດ້ກາຍເປັນໂອກາດໃໝ່, ພະລັງແຮງໃໝ່ ແລະ ຈຸດເດັ່ນໃໝ່ໃນການຮ່ວມມືແບບຕ່າງຝ່າຍຕ່າງມີຜົນປະໂຫຍດໃນຂອບເຂດກວ້າງກວ່າເກົ່າ, ມີລະດັບສູງກວ່າເກົ່າ ແລະເລິກເຊິ່ງກວ່າເກົ່າລະຫວ່າງຈີນກັບອາຊຽນ, ຈາກນີ້ ຈຶ່ງໄດ້ມີຂໍ້ສະເໜີ 6 ຂໍ້ຄື ສອງຝ່າຍເພີ່ມທະວີການເຊື່ອມຈອດຍຸດທະສາດພັດທະນາ, ການຮ່ວມມືດ້ານຄວາມສາມາດການຜະລິດສາກົນ, ການຮ່ວມມືທາງເສດຖະກິດການຄ້າ, ການເຊື່ອມຈອດກັນ, ການຮ່ວມມືດ້ານການທະນາຄານ ແລະ ການແລກປ່ຽນດ້ານວັດທະນະທຳ ເພື່ອເຮັດໃຫ້ປະຊາຊົນສອງຝ່າຍໄດ້ຮັບຜົນປະໂຫຍດຕົວຈິງຫຼາຍກວ່າເກົ່າ.
ງານວາງສະແດງສິນຄ້າຈີນ-ອາຊຽນຄັ້ງນີ້ ຈະດຳເນີນເປັນເວລາ 4 ວັນ ໂດຍມີວິສາຫະກິດຕ່າງປະເທດ 1.020 ແຫ່ງເຂົ້າຮ່ວມ ເຊິ່ງເມື່ອທຽບໃສ່ປີຜ່ານມາ ເພີ່ມຂຶ້ນ 14,4%.