ກ່ອນໜ້ານີ້ບໍ່ດົນ, ໃນໂອກາດເຂົ້າຮ່ວມງານວາງສະແດງສິນຄ້າຈີນ-ອາຊຽນຄັ້ງທີ 13, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ສປປ ລາວໄດ້ໃຫ້ສຳພາດຕໍ່ນັກຂ່າວວ່າ, ປະເທດຕົນຫວັງເອົາຍຸດທະສາດ "ຫັນປະເທດທີ່ບໍ່ມີທາງອອກສູ່ທະເລເປັນປະເທດໃຈກາງບໍລິການທາງຜ່ານ" ເຊື່ອມເຂົ້າກັບຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ຂອງຈີນໃຫ້ໄວຂຶ້ນ, ຍົກລະດັບການເຊື່ອມຈອດກັນຂອງລາວໃຫ້ສູງຂຶ້ນ, ສ້າງປະເທດຕົນໃຫ້ເປັນຈຸດເຊື່ອມຕໍ່ລະຫວ່າງຈີນກັບອາຊຽນທີ່ສຳຄັນ ເພື່ອພັດທະນາເສດຖະກິດສັງຄົມຂອງລາວແບບຍືນຍົງ.
ທ່ານ ສອນໄຊ ກ່າວວ່າ, ປະເທດຕົນກັບຈີນໄດ້ມີຄວາມເປັນເອກະພາບກັນກ່ຽວກັບການເຊື່ອມຕໍ່ຍຸດທະສາດແລ້ວ ແລະກໍຫວັງວ່າວິສາຫະກິດຈີນຈະໄປລົງທຶນຢູ່ລາວຫຼາຍກວ່າເກົ່າ, ຈັດຕັ້ງປະຕິບັດຍຸດທະສາດແຕ່ລະຂໍ້ ເພື່ອຊຸກຍູ້ການພັດທະນາເສດຖະກິດສັງຄົມລາວຢ່າງຮອບດ້ານ.
ໃນ 7 ປີຜ່ານມາ, ມູນຄ່າການຄ້າລະຫວ່າງຈີນກັບລາວໄດ້ເພີ່ມຂຶ້ນໂດຍສະເລ່ຍ ຫຼາຍກວ່າ 20% ຕໍ່ປີ. ທ່ານ ສອນໄຊ ກ່າວຕື່ມວ່າ, ໃນຖານະເປັນໝາກຜົນລະອຽດຂອງຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ", ທາງລົດໄຟລາວ-ຈີນທີ່ໄດ້ວາງສີລາລືກເມື່ອທ້າຍປີຜ່ານມາ ບໍ່ພຽງແຕ່ຈະສາມາດຊຸກຍູ້ໃຫ້ລາວຫັນຈາກ "ປະເທດທີ່ບໍ່ມີທາງອອກສູ່ທະເລ" ກາຍເປັນ "ປະເທດໃຈກາງບໍລິການທາງຜ່ານ" ເທົ່ານັ້ນ, ຍັງຈະສ້າງຂົວຕໍ່ໃຫ້ແກ່ການຮ່ວມມືຮອບດ້ານລະຫວ່າງວິສາຫະກິດເອກະຊົນຂອງລາວແລະຈີນນຳອີກ.