ໂດຍຕອບສະໜອງຕາມຄຳເຊີນຂອງທ່ານບັນກີມູນ ເລຂາທິການໃຫຍ່ອົງການສະຫະປະຊາຊາດ, ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ເດີນທາງໄປສະໜາມບິນສາກົນເຄັນນີດີເມືອງນິວຢອກ ສະຫະລັດອາເມລິກາດ້ວຍເຮືອບິນພິເສດໃນຕອນບ່າຍວັນທີ 18 ກັນຍານີ້ເພື່ອເຂົ້າຮ່ວມກອງປະຊຸມລະດັບສູງຕ່າງໆຂອງສະມັດຊາໃຫຍ່ອົງການສະຫະປະຊາຊາດຊຸດທີ 71.
ທ່ານຫຼີເຄີ້ສຽງຢືນຢັນວ່າ: ປີນີ້ເປັນປີຄົບຮອບ 45 ປີທີ່ອົງການສະຫະປະຊາຊາດຟື້ນຟູບ່ອນນັ່ງທີ່ຊອບດ້ວຍກົດໝາຍຂອງສາທາລະນະລັດປະຊາຊົນຈີນໃນອົງການດັ່ງກ່າວ.ຈີນເປັນຜູ້ສະໜັບສະໜູນພາລະກິດທຸກດ້ານຂອງອົງການສະຫະປະຊາຊາດຢ່າງຕັ້ງໜ້າ ແລະໃນຖານະເປັນປະເທດສະພາມົນຕີຖາວອນປະຈຳສະພາຄວາມໝັ້ນຄົງອົງການສະຫະປະຊາຊາດ, ຈີນປົກປ້ອງຈຸດປະສົງແລະຫຼັກການຂອງກົດບັດສະຫະປະຊາຊາດຢ່າງເດັດດ່ຽວ ທັງຕັ້ງໜ້າເຂົ້າຮ່ວມວຽກງານທີ່ກ່ຽວຂ້ອງຂອງອົງການດັ່ງກ່າວ. ຈີນຍິນດີຮ່ວມກັບບັນດາຝ່າຍປະກອບສ່ວນເຂົ້າໃນການຮັບມືກັບສິ່ງທ້າທາຍຕ່າງໆໃນໂລກ ແລະສົ່ງເສີມສັນຕິພາບກໍຄືການພັດທະນາຂອງໂລກໃຫ້ປະສົບຜົນສຳເລັດຫຼາຍກວ່າເກົ່າ.
ໃນໄລຍະຢູ່ນິວຢອກ, ທ່ານຫຼີເຄີ້ສຽງຍັງຈະພົບປະສອງຝ່າຍກັບທ່ານບາຣັກໂອບາມາ ປະທານາທິບໍດີອາເມລິກາ ແລະພົບປະກັບບຸກຄົນສຳຄັນໃນວົງການຕ່າງໆຂອງອາເມລິກາເປັນຕົ້ນເສດຖະກິດ, ການເງິນ, ສະຖາບັນຜູ້ຊົງຄຸນວຸດທິ, ສື່ມວນຊົນແລະອື່ນໆ ແລະຍັງຈະເຂົ້າຮ່ວມກິດຈະກຳສົນທະນາທີ່ຈັດຂຶ້ນໂດຍສະໂມສອນເສດຖະກິດນິວຢອກແລະອົງການອື່ນໆ.
 |
