ຕອນເຊົ້າວັນທີ 19 ກັນຍານີ້ຕາມເວລາທ້ອງຖິ່ນ ຢູ່ສຳນັກງານໃຫຍ່ອົງການສະຫະປະຊາຊາດນະຄອນນິວຢອກ, ທ່ານ ຫຼີເຄີ້ສຽງ ນາຍົກລັດຖະມົນຕີຈີນ ໄດ້ເຂົ້າຮ່ວມກອງປະຊຸມລະດັບສູງກ່ຽວກັບການແກ້ໄຂບັນຫາເຄື່ອນຍ້າຍຂະໜາດໃຫຍ່ຂອງຊາວອົບພະຍົບແລະຊາວຍ້າຍຖິ່ນຖານຂອງສະມັດຊາໃຫຍ່ສະໄໝທີ 71.
ໂອກາດນີ້, ທ່ານ ຫຼີເຄີ້ສຽງກ່າວວ່າ: ປັດຈຸບັນ, ບັນຫາຊາວອົບພະຍົບແລະຊາວຍ້າຍຖິ່ນຖານນັບມື້ພົ້ນເດັ່ນຂຶ້ນ ເຊິ່ງພົວພັນເຖິງສັນຕິພາບແລະການພັດທະນາຂອງໂລກ, ກະທົບກະເທືອນເຖິງສະຖຽນລະພາບຂອງພາກພື້ນ, ສະນັ້ນ, ປະຊາຄົມໂລກຕ້ອງຮັບມືຢ່າງຕັ້ງໜ້າ, ແຕ່ການແກ້ໄຂບັນຫາດັ່ງກ່າວ ຕ້ອງໄດ້ເພີ່ມທະວີການຮ່ວມມືສາກົນ, ຕ້ອງເສີມຂະຫຍາຍບົດບາດປະສານງານຂອງອົງການສະຫະປະຊາຊາດຢ່າງເຕັມສ່ວນ ແລະຄວາມພະຍາຍາມຂອງປະເທດທີ່ເປັນແຫຼ່ງ. ແນວໃດກໍດີ, ຝ່າຍທີ່ກ່ຽວຂ້ອງຄວນແກ້ໄຂບັນຫາດ້ວຍການເຈລະຈາກັນແລະການປຶກສາຫາລືກັນ.
ທ່ານ ຫຼີເຄີ້ສຽງ ເນັ້ນວ່າ, ຍາມໃດ ຈີນກໍໃຫ້ຄວາມສຳຄັນສູງແລະຕັ້ງໜ້າເຂົ້າຮ່ວມແກ້ໄຂບັນຫາດັ່ງກ່າວ, ໃນຖານະທີ່ເປັນປະເທດພວມພັດທະນາໃຫຍ່, ຈີນຍິນດີແບກຫາບໜ້າທີ່ຕາມຄວາມສາມາດຂອງຕົນ. ພວກເຮົາຈະໃຊ້ມາດຕະການມະນຸດສະທຳຕ່າງໆ ແລະຕັ້ງໜ້າຊອກຄົ້ນການຮ່ວມມືສາມຝ່າຍ ຄືກັບອົງການຈັດຕັ້ງສາກົນແລະປະເທດພວມພັດທະນາໃນບັນຫາຊາວອົບພະຍົບແລະຊາວຍ້າຍຖິ່ນຖານຢ່າງຕັ້ງໜ້າ.
 |
