ວັນທີ 20 ກັນຍານີ້, ກອງປະຊຸມອະພິປາຍທົ່ວໄປຂອງສະມັດຊາໃຫຍ່ອົງການສະຫະປະຊາຊາດໄດ້ໄຂຂຶ້ນຢູ່ສຳນັກງານໃຫຍ່ອົງການສະຫະປະຊາຊາດນິວຢອກ, ແລະຈະດຳເນີນໄປຈົນເຖິງວັນທີ 26 ເດືອນດຽວກັນ, ໂດຍຄາດວ່າຈະມີປະມຸກລັດແລະຜູ້ນຳລັດຖະບານ 140 ກວ່າທ່ານແລະລັດຖະມົນຕີຫຼາຍສິບທ່ານເຂົ້າຮ່ວມກອງປະຊຸມແລະປະກອບຄຳເຫັນ.
ສະມັດຊາໃຫຍ່ອົງການສະຫະປະຊາຊາດຄັ້ງທີ 71 ໄດ້ໄຂຂຶ້ນໃນວັນທີ 13 ກັນຍານີ້, ໂດຍຫົວຂໍ້ຕົ້ນຕໍໄດ້ເນັ້ນ " ເປົ້າໝາຍພັດທະນາແບບຍືນຍົງ: ສ້າງຄວາມພະຍາຍາມຮ່ວມກັນເພື່ອປັບປຸງໂລກຂອງມະນຸດເຮົາ." ຕາມປົກກະຕິແລ້ວ, ສະມັດຊາໃຫຍ່ອົງການສະຫະປະຊາຊາດຈະຈັດກອງປະຊຸມປະຈຳປີແຕ່ເດືອນກັນຍາຫາເດືອນທັນວາທຸກປີ. ແລະຈະແບ່ງອອກເປັນສອງໄລຍະຄື: ໄລຍະທຳອິດແມ່ນການອະພິປາຍ, ຈາກນັ້ນກໍແມ່ນໄລຍະປຶກສາຫາລືແລະພິຈາລະນາຫົວຂໍ້ຕ່າງໆທີ່ໄດ້ບັນລຸໃນວາລະປະຊຸມ. ການອະພິປາຍທົ່ວໄປໄດ້ສ້າງໂອກາດຂອງຄວາມສະເໝີພາບໃນການປຶກສາຫາລືບັນຫາສາກົນໃຫ້ແກ່ປະເທດສະມາຊິກອົງການສະຫະປະຊາຊາດ.
 |
