ທ່ານ ຫຼີເຄິ້ສຽງ ນາຍົກລັດຖະມົນຕີຈີນໄດ້ເປັນປະທານການສຳມະນາວາລະການພັດທະນາແບບຍືນຍົງປີ 2030 ແລະກ່າວປາໄສຢູ່ສຳນັກງານໃຫຍ່ອົງການສະຫະປະຊາຊາດ ນິວຢອກສະຫະລັດອາເມລິກາໃນຕອນບ່າຍວັນທີ 19 ກັນຍານີ້ໂດຍການເຂົ້າຮ່ວມຂອງທ່ານ ບັນກີມູນ ເລຂາທິການໃຫຍ່ອົງການສະຫະປະຊາຊາດ, ທ່ານ ປິເຕີ ທອມເຊັນ ປະທານສະມັດຊາໃຫຍ່ອົງການສະຫະປະຊາຊາດສະໄໝທີ 71 ພ້ອມດ້ວຍຜູ້ຮັບຜິດຊອບອົງການຕ່າງໆຂອງສະຫະປະຊາຊາດແລະອົງການຈັດຕັ້ງສາກົນທີ່ສຳຄັນ.
ໂອກາດດັ່ງກ່າວ, ທ່ານ ຫຼີເຄິ້ສຽງ ກ່າວວ່າ, ຕະຫຼອດໄລຍະ 15 ປີຜ່ານມາ, ລັດຖະບານຈີນໄດ້ໃຫ້ຄວາມສຳຄັນສູງແລະກໍປະສົບຜົນສຳເລັດເຊິ່ງທົ່ວໂລກລ້ວນແຕ່ສົນໃຈຕໍ່ການບັນລຸເປົ້າໝາຍສະຫັດສະວັດຂອງອົງການສະຫະປະຊາຊາດ. ຂະນະທີ່ຈີນໄດ້ເລີ່ມຈັດຕັ້ງປະຕິບັດວຽກງານວາລະການພັດທະນາແບບຍືນຍົງປີ 2030 ຢ່າງຮອບດ້ານແລ້ວໂດຍໃຫ້ສັດຕະຍາບັນແລະຈະເຜີຍແຜ່ "ແຜນການປະຕິບັດວາລະການພັດທະນາແບບຍືນຍົງປີ 2030 ຂອງຈີນ" ເພື່ອຊີ້ນຳການຈັດຕັ້ງປະຕິບັດວາລະການພັດທະນາແບບຍືນຍົງຂອງຈີນ. ແນວໃດກໍດີ, ຈີນໃນຖານະເປັນປະເທດພວມພັດທະນາທີ່ມີຄວາມຮັບຜິດຊອບສູງຈຶ່ງຍິນດີຮ່ວມມືກັບສາກົນຢ່າງຕັ້ງໜ້າ, ເພີ່ມທະວີການລົງທຶນຕໍ່ການຮ່ວມມືໃຕ້-ໃຕ້ຢ່າງບໍ່ຢຸດຢັ້ງທັງຍິນດີແບ່ງປັນປະສົບການແລະໂອກາດການພັດທະນາເພື່ອຮ່ວມກັບປະຊາຄົມໂລກກ້າວໜ້າສີວິໄລ.
ການສຳມະນາເທື່ອນີ້ໄດ້ອອກຖະແຫຼງການໂດຍສະເໜີນະໂຍບາຍແລະຂໍ້ສະເໜີກ່ຽວກັບການຊຸກຍູ້ປະຕິບັດເປົ້າໝາຍການພັດທະນາແບບຍືນຍົງທົ່ວໂລກແລະລົງເລິກການຮ່ວມມືເພື່ອການພັດທະນາສາກົນ.