ກອງປະຊຸມແລກປ່ຽນການຮ່ວມມືແລະເປີດກວ້າງດ້ານການສຶກສາລະຫວ່າງຈີນ-ອາຊຽນ ໄດ້ຈັດຂຶ້ນຢູ່ເມືອງໜານໜິງ ເຂດກວາງຊີ ສປ ຈີນ ໃນວັນທີ 21 ກັນຍານີ້ ໂດຍມີຜູ້ແທນຈາກໂຮງຮຽນພາສາຈີນ ແລະ ອົງການສຶກສາວັດທະນະທຳຈີນ 69 ແຫ່ງຂອງ 9 ປະເທດ ເຊັ່ນ ໄທ, ມຽນມາ, ອິນໂດເນເຊຍ, ລາວ ແລະ ກຳປູເຈຍ ພ້ອມດ້ວຍຫ້ອງການວຽກງານຊາວຈີນຕ່າງດ້າວແລະພາກສ່ວນການສຶກສາຂອງ 28 ແຂວງ, ກຳແພງນະຄອນ ແລະ ເຂດປົກຄອງຕົນເອງຂອງຈີນເກືອບ 200 ທ່ານເຂົ້າຮ່ວມຢ່າງພ້ອມພຽງ.
ໃນຊຸມປີຜ່ານມາ, ຄຽງຄູ່ກັບການປະຕິຮູບແລະເປີດປະຕູສູ່ພາຍນອກຂອງຈີນເລັ່ງລັດໄວຂຶ້ນ, ໂດຍສະເພາະຫຼັງສະເໜີຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ", ເຮັດໃຫ້ວິສາຫະກິດຕ່າງປະເທດຕ້ອງການຜູ້ມີຄວາມຮູ້ຄວາມສາມາດດ້ານພາສາຈີນເພີ່ມຂຶ້ນ ແລະມີການນິຍົມກັນຮ່ຳຮຽນພາສາຈີນໃນທົ່ວໂລກ ຈຶ່ງມີຄວາມຮຽກຮ້ອງຕ້ອງການສູງກວ່າເກົ່າຕໍ່ການພັດທະນາການສຶກສາພາສາຈີນ.
ຂະນະດຽວກັນ, ທາງການທ້ອງຖິ່ນຕ່າງໆຂອງຈີນກໍກຳລັງສຸມໃສ່ຊຸກຍູ້ການຮ່ວມມືແລະເປີດກວ້າງດ້ານການສຶກສາລະຫວ່າງຈີນ-ອາຊຽນ. ຂະນະທີ່ທ່ານສິນຊຸນເສິງ ຫົວໜ້າຫ້ອງການວຽກງານຊາວຈີນຕ່າງດ້າວເຂດປົກຄອງຕົນເອງເຜົ່າຈ້ວງກວາງຊີ ໄດ້ຢືນຢັນໃນກອງປະຊຸມດັ່ງກ່າວວ່າ: ເມື່ອຮອດທ້າຍໄລຍະແຜນການ 5 ປີຄັ້ງທີ 12, ນັກຮຽນແລະນັກສຶກສາຂອງປະເທດໃນອາຊຽນທີ່ໄປສຶກສາຕໍ່ຢູ່ເຂດກວາງຊີໄດ້ບັນລຸເກືອບ 40.000 ຄົນ, ກວມເກືອບ 80% ຂອງຍອດຈຳນວນນັກຮຽນນັກສຶກສາຕ່າງປະເທດທີ່ໄປສຶກສາຕໍ່ຢູ່ເຂດກວາງຊີ. ປັດຈຸບັນ, ເຂດກວາງຊີໄດ້ກາຍເປັນໜຶ່ງທີ່ນັກຮຽນນັກສຶກສາຂອງປະເທດໃນອາຊຽນໃຫ້ຄວາມສຳຄັນໃນການເລືອກເປັນເປົ້າໝາຍເພື່ອໄປສຶກສາຕໍ່ຢູ່ຕ່າງປະເທດ ແລະກໍແມ່ນໜຶ່ງໃນແຂວງແລະເຂດຕ່າງໆຂອງຈີນທີ່ຮັບນັກຮຽນນັກສຶກສາຂອງປະເທດອາຊີຕາເວັນອອກສຽງໃຕ້ຫຼາຍທີ່ສຸດ.
