ເນື່ອງໃນໂອກາດລະນຶກວັນໄຊຊະນະແຫ່ງການເຄື່ອນທັບທາງໄກຂອງກອງທັບແດງກຳມະກອນຊາວກະສິກອນຈີນຄົບຮອບ 80 ປີ, ທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ, ປະທານປະເທດ, ປະທານຄະນະກຳມະການການທະຫານສູນກາງ ສປ ຈີນໄດ້ເດີນທາງໄປຫໍພິພິດທະພັນການທະຫານປະຕິວັດປະຊາຊົນຈີນທີ່ນະຄອນຫຼວງປັກກິ່ງໃນວັນທີ 23 ກັນຍານີ້ເພື່ອຊົມການວາງສະແດງທີ່ມີຫົວຂໍ້ "ປະຫວັດວິລະຊົນ,ຄຸນງາມຄວາມດີທີ່ບໍ່ມີວັນເສົ້າໝອງເພື່ອລະນຶກວັນໄຊຊະນະແຫ່ງການເຄື່ອນທັບທາງໄກຂອງກອງທັບແດງກຳມະກອນຊາວກະສິກອນຈີນຄົບຮອບ 80 ປີ." ທ່ານສີຈິ້ນຜິງກ່າວເນັ້ນວ່າ: ເມື່ອ 80 ປີກ່ອນ, ພັກກອມມູນິດຈີນໄດ້ນຳພາກອງທັບແດງກຳມະກອນຊາວນາຈີນຜ່ານຜ່າຄວາມຫຍຸ້ງຍາກແລະຄວາມອັນຕະລາຍຕ່າງໆນານາ,ໄດ້ຮັບຜົນສຳເລັດຢ່າງມີໄຊໃນການເຄື່ອນທັບທາງໄກເປັນໄລຍະຍາວເຖິງ 1 ໝື່ນ 2500 ກິໂລແມັດ ເຊິ່ງເປັນເຫດທີ່ມີຊື່ສຽງໃນທົ່ວໂລກ ແລະເຫດການອັນຍິ່ງໃຫຍ່ດັ່ງກ່າວນີ້ຈະຖືກຈາລຶກໄວ້ໃນປະຫວັດສາດແຫ່ງການປະຕິວັດຈີນແລະປະຊາຊາດຈີນຕະຫຼອດໄປ. ໄຊຊະນະແຫ່ງການເຄື່ອນທັບທາງໄກໄດ້ສ່ອງແສງໃຫ້ເຫັນຢ່າງເຕັມສ່ວນເຖິງພະລັງແຮງດ້ານຈິດໃຈອັນຍິ່ງໃຫຍ່ຂອງອຸດົມການປະຕິວັດ. ຊູ່ມື້ນີ້,ຍຸກສະໄໝແລະເງື່ອນໄຂໄດ້ເກີດມີການປ່ຽນແປງ, ແຕ່ອຸດົມການແລະພາລະກິດທີ່ສະມາຊິກພັກກອມມູນິດພວກເຮົາໄດ້ພະຍາຍາມສູ້ຊົນຕະຫຼອດມານັ້ນບໍ່ໄດ້ມີການປ່ຽນແປງ.ແນວໃດກໍດີ, ພວກເຮົາຄວນຈົດຈຳຄຸນງາມຄວາມດີແລະຜົນງານອັນຍິ່ງໃຫຍ່ຂອງກອງທັບແດງ, ເຊີດຊູຈິດໃຈການເຄື່ອນທັບທາງໄກທີ່ຍິ່ງໃຫຍ່, ສຸມໃສ່ສຶກສາອົບຮົມ ດ້ານລັດທິຮັກຊາດແລະມູນເຊື້ອປະຕິວັດໃຫ້ກ້າວສູ່ລວງເລິກ, ນຳພາພະນັກງານແລະປະຊາຊົນທັງຫຼາຍສ້າງຄວາມໝັ້ນໃຈອັນເດັດດ່ຽວຕໍ່ເສັ້ນທາງສັງຄົມນິຍົມທີ່ມີສີສັນພິເສດຂອງຈີນ, ຄວາມໝັ້ນໃຈທາງທິດສະດີ, ຄວາມໝັ້ນໃຈທາງລະບອບແລະຄວາມໝັ້ນໃຈດ້ານວັດທະນະ ທຳ ທັງສືບຕໍ່ສາມັກຄີປະຊາຊົນທົ່ວທັງຊາດເຂົ້າເປັນຈິດໜຶ່ງໃຈດຽວ,ບາກບັ່ນສູ້ຊົນກ້າວໜ້າໄປຕາມເສັ້ນທາງເຄື່ອນທັບທາງໄກແບບໃໝ່ເພື່ອບັນລຸເປົ້າໝາຍສູ້ຊົນ "ຮ້ອຍປີ 2 ເທື່ອ"ຄື ສ້າງສັງຄົມອິ່ມໜຳສຳລານໃຫ້ສຳເລັດຮອບດ້ານໃນເວລາພັກກອມມູນິດຈີນສ້າງຕັ້ງຂຶ້ນຄົບຮອບ 100 ປີ ແລະສ້າງປະເທດໃຫ້ເປັນປະເທດສັງຄົມນິຍົມທີ່ຫັນເປັນທັນສະໄໝໃນວັນຊາດ ສປ ຈີນຄົບຮອບ 100 ປີ ແລະບັນລຸຄວາມຝັນຂອງຈີນໃນການຟື້ນຟູຄວາມຈະເລີນຮຸ່ງເຮືອງທີ່ຍິ່ງໃຫຍ່ຂອງປະຊາຊາດຈີນ.
ເຂົ້າຊົມການວາງສະແດງເທື່ອນີ້ຍັງມີບັນດາກຳມະການປະຈຳກົມການເມືອງສູນກາງພັກກອມມູນິດຈີນຄື ທ່ານຢູເຈີ້ງເຊິ່ງ, ທ່ານຫຼິວຢຸນຊານ, ທ່ານຫວາງສີຊ່ານ ແລະທ່ານຈ່າງກ່າວລີ້.