ຕອນບ່າຍວັນທີ 23 ກັນຍານີ້ ຕາມເວລາທ້ອງຖິ່ນຢູ່ເມືອງມົນຕຣີວ, ທ່ານວາງອີ້ ລັດຖະມົນຕີກະຊວງການຕ່າງປະເທດຈີນໄດ້ພົບປະກັບທ່ານສະເທຟັນ ດີໂອນ ລັດຖະມົນຕີກະຊວງການຕ່າງປະເທດການາດາ.
ທ່ານວາງອີ້ກ່າວວ່າ, ການຢ້ຽມຢາມການາດາຂອງທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ຮັບຜົນສຳເລັດອັນຈົບງາມ. ນາຍົກລັດຖະມົນຕີສອງປະເທດຈີນແລະການາດາໄດ້ຢ້ຽມຢາມເຊິ່ງກັນແລະກັນພາຍໃນ 1 ເດືອນ, ເຊິ່ງໄດ້ສົ່ງສັນຍານອັນຕັ້ງໜ້າຢ່າງແຮງກ້າຕໍ່ພາຍນອກ, ຖະແຫຼງການຮ່ວມທີ່ສອງຝ່າຍລົງນາມນັ້ນ ໄດ້ສະຫຼຸບຜົນສຳເລັດສຳຄັນ 29 ປະການ. ຫວັງວ່າ, ການພົວພັນລະຫວ່າງຈີນກັບການາດາ ຈະສາມາດກ້າວໄປສູ່ແຖວໜ້າໃນການພົວພັນລະຫວ່າງຈີນກັບບັນດາປະເທດຝ່າຍຕາເວັນຕົກຄືນໃໝ່. ສອງຝ່າຍຄວນເລັ່ງລັດປະຕິບັດຜົນສຳເລັດຂອງການຢ້ຽມຢາມເທື່ອນີ້ໃຫ້ດີ, ຮັກສາແລະເພີ່ມທະວີທ່ວງທ່າການຮ່ວມມືທີ່ຕ່າງຝ່າຍຕ່າງມີຜົນປະໂຫຍດ, ໂດຍສະເພາະຄວນທຳຄວາມພະຍາຍາມເພື່ອຫັນຄວາມຮັບຮູ້ທີ່ເປັນເອກະພາບກັນອັນສຳຄັນລະຫວ່າງຜູ້ນຳສອງປະເທດໃຫ້ກາຍເປັນຄວາມມຸ່ງມາດປາຖະໜາຮ່ວມກັນແລະການກະທຳພ້ອມກັນຂອງວົງການຕ່າງໆໃນສັງຄົມຂອງສອງປະເທດ, ເພີ່ມກຳລັງແຮງອັນຕັ້ງໜ້າແຫ່ງການຮ່ວມມືລະຫວ່າງຈີນກັບການາດາ, ຄວບຄຸມແລະຊຳລະປັດໄຈທາງລົບໃຫ້ເໝາະສົມ.
ທ່ານສະເທຟັນເຫັນດີນຳຄວາມເຫັນຂອງທ່ານວາງອີ້ທີ່ມີຕໍ່ການຂະຫຍາຍການພົວພັນລະຫວ່າງສອງປະເທດ, ແລະກ່າວວ່າ, ໃນໄລຍະທ່ານນາຍົກລັດຖະມົນຕີຫຼີເຄີ້ສຽງຢ້ຽມຢາມການາດາ, ເຄີຍສົ່ງຂໍ້ມູນຂ່າວສານອັນຕັ້ງໜ້າຫຼາຍເທື່ອຕໍ່ບຸກຄົນວົງການຕ່າງໆຂອງການາດາກ່ຽວກັບການລົງເລິກການຮ່ວມມືລະຫວ່າງປະເທດ. ແຜນການຂະຫຍາຍການພົວພັນລະຫວ່າງການາດາກັບຈີນໄດ້ຈະແຈ້ງຢູ່ແລ້ວ, ຕໍ່ໄປ, ສອງຝ່າຍຄວນເລັ່ງລັດປະຕິບັດວຽກງານໃຫ້ດີ, ຮັບປະກັນໃຫ້ການພົວພັນລະຫວ່າງການາດາກັບຈີນໄດ້ຮັບການຂະຫຍາຍຕົວຢ່າງໝັ້ນທ່ຽງແລະຕໍ່ເນື່ອງ. ການາດາກັບຈີນເຄີຍມີປະຫວັດໄປມາຫາສູ່ກັນທີ່ດີ, ແລະຍັງຈະມີອະນາຄົດທີ່ຮຸ່ງເຮືອງກວ່າເກົ່າ.