ຜູ້ຕາງໜ້າຈີນກ່າວວ່າ ກຸ່ມ 77 ປະເທດກັບຈີນ ຄວນລົງເລິກການຮ່ວມມືກັນ
2016-09-25 14:38:58 cri
ວັນທີ 23 ກັຍານນີ້ ທ່ານຫຼິວເຈອີ ຜູ້ຕາງໜ້າຈີນປະຈຳອົງການສະປະຊາຊາດກ່າວວ່າ, ໃນຖານະເປັນຜູ້ຕາງໜ້າຂອງປະເທດທີ່ພວມພັດທະນາ, ກຸ່ມ 77 ປະເທດ ກັບຈີນຄວນສືບຕໍ່ເພີ່ມທະວີຄວາມສາມັກຄີກັນ, ລົງເລິກການຮ່ວມມື, ເພື່ອຮ່ວມກັນຜັນຂະຫຍາຍວາລະການພັດທະນາແບບຍືນຍົງ.
ໃນກອງປະຊຸມປະຈຳປີລະດັບລັດຖະມົນຕີການຕ່າງປະເທດຄັ້ງທີ 40 ຂອງກຸ່ມ 77 ປະເທດທີ່ຈັດຂຶ້ນຢູ່ສຳນັກງານໃຫຍ່ອົງການສະຫະປະຊາຊາດໃນວັນທີ 23 ກັນຍານີ້ ທ່ານຫຼິວເຈອີ ໄດ້ປະກອບຄຳຄິດຄຳເຫັນ ໂດຍກ່າວວ່າ, ກອງປະຊຸມສຸດຍອດ ຈີ 20 ທີ່ໄຂຂຶ້ນຢູ່ນະຄອນຫາງໂຈວຂອງຈີນໃນຫວ່າງກ່ອນນີ້ບໍ່ດົນ ໄດ້ຈັດເອົາການພັດທະນາໄວ້ຢູ່ຖານະພົ້ນເດັ່ນທີ່ສຸດໃນຂອບນະໂຍບາຍມະຫາພາກຂອງທົ່ວໂລກເປັນຄັ້ງທຳອິດ, ໄດ້ວາງ ແລະຜັນຂະຫຍາຍແຜນການດຳເນີນງານກ່ຽວກັບວາລະການພັດທະນາແບບຍືນຍົງປີ 2030 ເປັນຄັ້ງທຳອິດ, ໃຊ້ການເຄື່ອນໄຫວລວມໝູ່ເປັນຄັ້ງທຳອິດໃນການສະໜັບສະໜູນອາຟຼີກາ ແລະປະເທດທີ່ດ້ອຍພັດທະນາພັດທະນາອຸດສາຫະກຳ, ອັນໄດ້ຮັບການຕີລາຄາຢ່າງສູງຈາກປະຊາຄົມໂລກ. ພວກຂ້າພະເຈົ້າຫວັງວ່າຈະຢືນຢັນຕໍ່ປະຊາຄົມໂລກດ້ວຍການກະທຳຕົວຈິງວ່າ, ການພັດທະນາແມ່ນໜ້າທີ່ສຳຄັນອັນດັບໜຶ່ງຂອງພວກຂ້າພະເຈົ້າໃນຕະຫຼອດມາ, ການເພີ່ມທະວີການຮ່ວມມືໃຕ້ໆແມ່ນນະໂຍບາຍຂອງພວກຂ້າພະເຈົ້າທີ່ຍຶດໝັ້ນມາໂດຍຕະຫຼອດ. ຈີນຈະສືບຕໍ່ຜ່ານຈາກກົນໄກ "ກຸ່ມ 77 ປະເທດ ກັບຈີນ" ເພີ່ມທະວີຄວາມສາມັກຄີ ແລະຊ່ວຍເຫຼືອຍເຊິ່ງກັນແລະກັນກັບບັນດາປະເທດທີ່ພວມພັດທະນາ, ຊຸກຍູ້ໃຫ້ປະເທດທີ່ພວມພັດທະນານັ້ນພັດທະນາຮ່ວມກັນ, ຊຸກຍູ້ວຽກງານການພັດທະນາຂອງທົ່ວໂລກກ້າວໄປໜ້າ.
ຈີນບໍ່ແມ່ນສະມາຊິກຂອງກຸ່ມ 77 ປະເທດ, ແຕ່ໄດ້ສະໜັບສະໜຸນຈຸດຢືນອັນເປັນທຳ ແລະຄວາມຮຽກຮ້ອງຕ້ອງການທີ່ສົມເຫດສົມຜົນຂອງອົງການຈັດຕັ້ງນີ້ມາໂດຍຕະຫຼອດ. ນັບແຕ່ຊຸມປີ 1990 ເປັນຕົ້ນມາ ການພົວພັນລະຫວ່າງຈີນກັບ ກຸ່ມ 77 ປະເທດໄດ້ມີການພັດທະນາຢ່າງຫຼວງຫຼາຍບົນພື້ນຖານທີ່ມີຢູ່ໃນແຕ່ກ່ອນ, ແລະດຳເນີນການປະສານງານ ແລະຮ່ວມມືກັນໂດຍຜ່ານກົນໂກ "ກຸ່ມ 77 ປະເທດກັບຈີນ".