ນາຍົກຈີນ-ການາດາເຂົ້າຮ່ວມເວທີປຶກສາຫາລືການຮ່ວມມືເສດຖະກິດການຄ້າຈີນ-ການາດາຄັ້ງທີ 6
2016-09-25 14:44:35 cri
ຕອນທ່ຽງວັນທີ 23 ກັນຍານີ້ ທ່ານຫຼີເຄີ້ສຽງ ນາຍົກລັດຖະມົນຕີຈີນ ແລະທ່ານໂດຼໂຕ ນາຍົກລັດຖະມົນຕີການາດາໄດ້ຮ່ວມກັນເຂົ້າຮ່ວມເວທີປຶກສາຫາລືການຮ່ວມມືເສດຖະກິດການຄ້າຈີນ-ການາດາຄັ້ງທີ 6 ຢູ່ສູນກອງປະຊຸມມົນດຼິວ ແລະໄດ້ປະກອບຄຳຄິດຄຳເຫັນ. ບຸກຄົນວົງການອຸສາຫະກຳການຄ້າຈີນ-ການາດາລວມ 700 ກວ່າຄົນໄດ້ເຂົ້າຮ່ວມເວທີປຶກສາຫາລືດັ່ງກ່າວ.
ທ່ານຫຼີເຄີ້ສຽງກ່າວວ່າ, ໃນການຢ້ຽມຢາມຄັ້ງນີ້, ນາຍົກລັດຖະມົນຕີສອງປະເທດໄດ້ບັນລຸມີຄວາມຮັບຮູ້ທີ່ເປັນເອກະສັນກັນກ່ຽວກັບການເຮັດໃຫ້ການຄ້າລະຫວ່າງສອງຝ່າຍມີຂະໜາດໃຫຍ່ຂຶ້ນຕື່ມອີກ, ແລະເຫັນດີດຳເນີນການຄົ້ນຄວ້າກ່ຽວກັບຄວາມອາດເປັນໄປໄດ້ໃນການສ້າງເຂດການຄ້າເສລີຈີນ-ການາດາໂດຍໄວ ເຊິ່ງບໍ່ພຽງແຕ່ມີຜົນດີຕໍ່ການເປີດກວ້າງການຮ່ວມມືດ້ານເສດຖະກິດການຄ້າຈີນ-ການາດາ ແລະຍັງຈະເປັນການສົ່ງສັນຍານອັນຈະແຈ້ງໄປໃຫ້ປະຊາຄົມໂລກເພື່ອຊຸກຍູ້ການຄ້າ ແລະການລົງທຶນເປັນແບບເສລີ, ເຮັດໃຫ້ເສດຖະກິດການຄ້າທົ່ວໂລກມີຄວາມໝັ້ນໃຈຂຶ້ນຕຶ່ມ. ສອງປະເທດໄດ້ເຊັນສັນຍາການລົງທຶນສອງຝ່າຍທີ່ມີເນື້ອໃນຢ່າງກວ້າງຂວາງ. ຈີນຍິນດີຕ້ອນຮັບວິສາຫະກິດການາດາໄປລົງທຶນຢູ່ຈີນ, ເພີ່ມທະວີການຮ່ວມມືໃນຂົງເຂດການທະນາຄານ, ພະລັງງານ, ການບິນພົນລະເຮືອນ, ໂທລະຄົມ, ການອະນຸລັກສິ່ງແວດລ້ອມ ແລະກິລາລະດູໜາວເປັນຕົ້ນ, ພ້ອມກັນນັ້ນ ກໍ່ສົ່ງເສີມໃຫ້ວິສາຫະກິດຈີນໄປລົງທຶນຢູ່ການາດາ. ສອງຝ່າຍຈະເສີມຂະຫຍາຍທ່າແຮງຂອງຕົນເອງ, ຮ່ວມມືກັນດ້ານຄວາມສາມາດການຜະລິດໃນຂົງເຂດການບິນອະວະກາດ, ທາງລົດໄຟ ແລະການຜະລິດໄຟຟ້າດ້ວຍພະລັງງານນິວເຄຼຍ. ຫວັງວ່າການາດາຜ່ອນຄາຍການຄ້າຂາອອກໄຮເຕັກໃຫ້ຈີນ, ສະໜັບສະໜຸນວິສາຫະກິດທັງສອງຝ່າຍດຳເນີນການຮ່ວມມືສາກົນໂດຍອີງຕາມຫຼັກການຕະຫຼອດ ແລະທຳນຽງການຄ້າ.