ການສຳມະນາສິດທິມະນຸດຈີນ-ເອີຣົບ 2016 ໄດ້ໄຂຂຶ້ນໃນວັນທີ 28 ກັນຍານີ້ຢູ່ກຳແພງນະຄອນຈຸ່ງກິ່ງ ສປ ຈີນໂດຍໄດ້ສຸມໃສ່ສຶກສາຄົ້ນຄວ້າການຮັບປະກັນສິດທິມະນຸດຂອງຊົນເຜົ່າສ່ວນໜ້ອຍ.ຂະນະທີ່ບັນດາຊ່ຽວຊານຈີນແລະຕ່າງປະເທດທີ່ຮ່ວມກອງປະຊຸມຢືນຢັນວ່າ ໃນຖານະເປັນປະເທດເອກະພາບທີ່ມີຫຼາຍຊົນເຜົ່າ, ຈີນໃຫ້ຄວາມສຳຄັນສູງຕໍ່ການພັດທະນາສິດທິມະນຸດໂດຍສະເພາະໃນການຮັບປະກັນສິດທິມະນຸດຂອງຊົນເຜົ່າສ່ວນໜ້ອຍໄດ້ມີຄວາມກ້າວໜ້າຢ່າງພົ້ນເດັນ.
ທ່ານສາງຈ້ຽນ ຮອງຫົວໜ້າປະຈຳການສູນສິດທິມະນຸດມະຫາວິທະຍາໄລນານຄາຍທຽນສິນ ສປ ຈີນຢືນຢັນວ່າ: ນອກຈາກປະເທດເອີຣົບເນັ້ນ ສິດພົນລະເມືອງແລະຄວາມສະເໝີພາບດ້ານສິດການເມືອງໃນການຮັບປະກັນສິດຂອງຊົນເຜົ່າສ່ວນໜ້ອຍແລ້ວ, ການຮັບປະກັນສິດທິມະນຸດຊົນເຜົ່າສ່ວນໜ້ອຍຂອງຈີນຍິ່ງໄດ້ເພີ່ມນ້ຳໜັກໃນການສະໜັບສະໜູນການພັດທະນາເສດຖະກິດຂອງເຂດຊົນເຜົ່າສ່ວນໜ້ອຍ.
ຫຼາຍປີຜ່ານມາ, ລັດຖະບານຈີນໄດ້ກຳນົດການສົ່ງເສີມການພັດທະນາຂອງເຂດຊົນເຜົ່າແລະຊົນເຜົ່າທີ່ມີປະຊາກອນໜ້ອຍນັ້ນເປັນໜຶ່ງໃນ 20 ແຜນສະເພາະກິດສຳຄັນທັງເພີ່ມທະວີການສະໜັບສະໜູນສະເພາະເພື່ອຊົນເຜົ່າສ່ວນໜ້ອຍແລະເຂດຊົນເຜົ່າຢ່າງຕໍ່ເນື່ອງ. ປີ 2015 ຜ່ານມາ, ຍອດປະຊາກອນທຸກຍາກຂອງ 5 ເຂດປົກຄອງຕົນເອງຄືມົງໂກໃນ,ກວາງຊີ, ຕິເບດ, ນິງເຊ້ຍແລະຊິນຈ່ຽງ ພ້ອມດ້ວຍແຂວງກຸ້ຍໂຈ່ວ, ແຂວງຢຸນນານແລະແຂວງຊິງໄຫໄດ້ຫຼຸດລົງຈາກ 31.210.000 ຄົນເມື່ອປີ 2012 ເຫຼືອພຽງ 18.130.000 ຄົນ.