ທູດຈີນປະຈຳຟິລິບປິນ: ການໄປມາຫາສູ່ແລກປ່ຽນກັນລະຫວ່າງຈີນ-ຟິລິບປິນໄດ້ຮັບຄວາມຄືບໜ້າເປັນຢ່າງດີ
2016-09-30 16:15:58 cri
ຫວ່າງມໍ່ໆມານີ້ ສະຖານທູດຈີນປະຈຳຟິລິບປິນໄດ້ຈັດງານລ້ຽງຮັບຮອງເພື່ອສະຫຼອງວັນຊາດຈີນຄົບຮອບ 67 ປີ ໂດຍທ່ານຈ້າວຈ້ຽນຫວາ ເອກອັກຄະລັດຖະທູດຈີນປະຈຳຟິລິບປິນກ່າວວ່າ, ນັບແຕ່ທ່ານໂຣດຣິງໂກ ດູເຕີເຕ ຂຶ້ນຮັບຕຳແໜ່ງເປັນປະທານາທິບໍດີຟິລິບປິນເປັນຕົ້ນມາ, ສອງປະເທດຈີນ-ຟິລິບປິນໄດ້ມີການຕິດຕໍ່ພົວພັນກັນເປັນຢ່າງດີ ແລະໄດ້ຮັບຄວາມຄືບໜ້າຢ່າງຕັ້ງໜ້າ.
ທ່ານທູດຈ້າວຈ້ຽນຫວາໄດ້ປະກອບຄຳເຫັນວ່າ, ຄຽງຄູ່ກັບຟິລິບປິນໄດ້ກາຍເປັນປະເທດສະມາຊິກໃນການສ້າງທະນາຄານລົງທຶນພື້ນຖານໂຄງລ່າງອາຊີ ແລະການສ້າງກອງທຶນເສັ້ນທາງສາຍໄໝທີ່ມີມູນຄ່າ 40 ຕື້ໂດລາຂອງລັດຖະບານຈີນຂຶ້ນ ນັ້ນກໍ່ຈະໄດ້ຮັບການລົງທຶນຫຼາຍກວ່າເກົ່າໃນຂົງເຂດພື້ນຖານໂຄງລ່າງ, ການຮ່ວມມືດ້ານການເພີ່ມຂີດຄວາມສາມາດການຜະລິດ ກະສິກຳ ແລະອື່ນໆ. ເພື່ອເພີ່ມທະວີການແລກປ່ຽນດ້ານບຸກຄະລາກອນລະຫວ່າງຈີນ-ຟິລິບປິນ ແລະໃຫ້ບັນດາວິສາຫະກິດຂະໜາດກາງແລະຂະໜາດນ້ອຍໄດ້ຮັບຜົນປະໂຫຍດ, ຈີນຍິນດີລະດົມປະຊາຊົນຈີນໄປທ່ອງທ່ຽວຟິລິບປິນໃຫ້ຫຼາຍຂຶ້ນ.
ທ່ານຈ້າວຈ້ຽນຫວາຊີ້ອອກວ່າ, ຈີນ ແລະຟິລິບປິນໃນຖານະເປັນປະເທດເອກະລາດ ແລະເຖິງວ່າມີຄຳເຫັນຕ່າງກັນໃນບາງບັນຫາກໍ່ຕາມເພາະເປັນເລື່ອງທຳມະຊາດ, ແຕ່ສິ່ງສຳຄັນນັ້ນ ພວກເຮົາຕ້ອງສຸມໃສ່ແກ້ໄຂຄວາມຂັດແຍ້ງກັນຢ່າງສັນຕິໂດຍຜ່ານການສົນທະນາແລະປຶກສາຫາລືກັນລະຫວ່າງສອງຝ່າຍດ້ວຍໄມຕີຈິດມິດຕະພາບ, ສຸມໃສ່ການເພີ່ມພູນມິດຕະພາບແລະການຮ່ວມມືກັນ ແລະສະແຫວງຫາຜົນປະໂຫຍດຮ່ວມກັນໃຫ້ຫຼາຍກວ່າເກົ່າ.
