ຈີນ ອັງກິດ ຝຣັ່ງເຊັນສັນຍາໂຄງການໄຟຟ້ານິວເຄຼຍຮິນກຼີ
2016-09-30 16:16:24 cri
ວັນທີ 29 ກັນຍານີ້ ຢູ່ນະຄອນຫຼວງລອນດອນປະເທດອັງກິດ, ສາມຝ່າຍຈີນ ອັງກິດ ແລະຝຣັ່ງໄດ້ເຊັນສັນຍາກ່ຽວກັບການລົງທຶນໂຄງການໄຟຟ້ານິວເຄຼຍຮິນກຼີໃນຂັ້ນສຸດທ້າຍ ເຊິ່ງເປັນຂີດໝາຍສະແດງໃຫ້ເຫັນວ່າ ໂຄງການທີ່ເປັນສັນຍະລັກໃຫ້ແກ່ການພົວພັນຈີນ-ອັງກິດທີ່ເຂົ້າສູ່ໄລຍະຄຳນັ້ນໄດ້ເລີ່ມຕົ້ນຫຼັງຜ່ານຈາກຄວາມລະອິດລະອ້ຽວ, ພ້ອມກັນນັ້ນ ເຕັກນິກຜະລິດໄຟຟ້າດ້ວຍພະລັງງານນິວເຄຼຍຮຸ່ນໃໝ່ຂອງຈີນຈະອອກໄປສູ່ຕ່າງປະເທດ.
ໂຄງການໄຟຟ້ານິວເຄຼຍຮິນກຼີຈະສ້າງຢູ່ແຂວງຊັມເມີເຊັດຂອງອັງກິດ ເຊິ່ງຈະລົງທຶນກໍ່ສ້າງໂດຍວິສາຫະກິດຈີນທີ່ມີກຸ່ມພະລັງງານນິວເຄຼຍຈີນເປັນຜູ້ນຳພາ ແລະກຸ່ມພະລັງງານໄຟຟ້າຝຣັ່ງ. ອີງຕາມສັນຍາດັ່ງກ່າວ, ການວາງແຜນໂຄງການ ແລະການບຸກເບີກສະຖານທີ່ຈະເລີ່ມຕົ້ນໃນໄວໆນີ້ ຄາດວ່າ ປີ 2025 ຈັກຜະລິດໄຟຟ້ານິວເຄຼຍໜ໋ວຍທຳອິດຈະເລີ່ມຜະລິດ, ແລະສາມາດສະໜອງພະລັງງານໄຟຟ້າທີ່ກາກບອນຕ່ຳໃຫ້ແກ່ປະຊາຊົນອັງກິດ 6 ລ້ານຄົນ.
ທ່ານນາງເທເຣຊາ ເມ ນາຍົກລັດຖະມົນຕີອັງກິດໄດ້ຕົກລົງພິຈາລະນາໂຄງການດັ່ງກ່າວຄືນໃໝ່ຫຼັງຈາກໄດ້ຮັບຕຳແໜ່ງບໍ່ເທົ່າໃດອາທິດ, ສື່ມວນຊົນອັງກິດລາຍງານວ່າລັດຖະບານອັງກິດອາດຈະຫັນປ່ຽນທ່າທີຕໍ່ການລົງທຶນຈາກຈີນ.