ເກີດເຫດເສົ້າສະຫລົດໃຈຂຶ້ນ ເມື່ອເວລາປະມານ 7 ໂມງ ຂອງວັນທີ 30 ກັນຍາ 2016 ນີ້ ເຊິ່ງຂົວອູ່ຂ້າມນ້ຳແຊງ ຢູ່ເມືອງວຽງຄຳ ແຂວງຫລວງພະບາງ ຂາດຂ້າງໜຶ່ງ ໃນຂະນະ ທີ່ນັກຮຽນຈຳນວນຫລາຍ ກຳລັງໄປໂຮງຮຽນ ເຮັດໃຫ້ນັກຮຽນ ຕົກລົງໃສ່ນ້ຳແຊງ ທີ່ກຳລັງໄຫລແຮງ ເບື້ອງຕົ້ນມີຜູ້ບາດເຈັບ 20 ກວ່າຄົນ ແລະ ເສຍຊີວິດ 2 ຄົນ ເປັນຍິງໜຶ່ງຊາຍໜຶ່ງ.
ແຫລ່ງຂ່າວຈາກ ຂະແໜງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ເມືອງວຽງຄຳ ໃຫ້ຮູ້ວ່າ: ຂົວອູ່ດັ່ງກ່າວ, ສ້າງຂຶ້ນເມື່ອ ປີ 2012 ຮັບເໝົາກໍ່ສ້າງໂດຍ ບໍລິສັດ ອ່ອນສີ ຂົວອູ່ ມີຄວາມຍາວ 100 ກວ່າແມັດ ແລະ ກວ້າງ 2 ແມັດ. ຈຸດປະສົງແມ່ນ ຮອງຮັບນັກຮຽນ ທີ່ໄປຮຽນໜັງສື ຢູ່ມັດທະຍົມສົມບູນວຽງຄຳ ໂຮງຮຽນຫລັງໃໝ່ ຟາກນ້ຳແຊງ, ຂົວແຫ່ງນີ້ ໄດ້ນຳໃຊ້ມາປະມານ 4 ປີ ແລະ ກໍເກີດເຫດທີ່ບໍ່ຄາດຄິດດັ່ງກ່າວຂຶ້ນ.
ປັດຈຸບັນ ເຈົ້າໜ້າທີ່ກ່ຽວຂ້ອງ ກຳລັງຄົ້ນຫາ ຜູ້ທີ່ຄາດວ່າສູນຫາຍ ດ້ວຍຄວາມເຄັ່ງຮ້ອນ ແລະ ມີຄວາມຄືບໜ້າເພີ່ມເຕີ່ມ ຈະລາຍງານ ໃຫ້ຊາບອີກ