ວັນທີ 1 ຕຸລານີ້, ທະນາຄານປະຊາຊົນຈີນເຊິ່ງເປັນທະນາຄານກາງຈີນໄດ້ແຈ້ງຂ່າວວ່າ:ຈະຖືການເຂົ້າເປັນເງິນຕາທີ່ມີສິດຖອນເງິນພິເສດຫຼື SDR ຂອງອົງການກອງທຶນການເງິນສາກົນຫຼືIMFເປັນໂອກາດເພື່ອລົງເລິກການປະຕິຮູບແລະເປີດກວ້າງການໄຂປະຕູສູ່ພາຍນອກໃນດ້ານການທະນາຄານຕື່ມອີກ ທັງປະກອບສ່ວນຢ່າງຕັ້ງໜ້າເຂົ້າໃນການຊຸກຍູ້ເສດຖະກິດໂລກໃຫ້ຂະຫຍາຍຕົວ, ປົກປັກຮັກສາຄວາມໝັ້ນທ່ຽງດ້ານການທະນາຄານໃນທົວໂລກແລະປັບປຸງການຄຸ້ມຄອງເສດຖະກິດໂລກໃຫ້ສົມບູນຂຶ້ນ.
ເຈົ້າໜ້າທີ່ທະນາຄານປະຊາຊົນຈີນຢືນຢັນວ່າ: ຊົມເຊີຍເງິນຢວນຖືກຈັດເຂົ້ນເປັນເງິນຕາ SDRຂອງ IMF ຢ່າງເປັນທາງການ ເຊິ່ງເປັນຂີດໝາຍສຳຄັນໃນປະຫວັດສາດແຫ່ງເງິນຢວນຈີນຫັນເປັນເງິນຕາສາກົນ ແລະເປັນການຢືນຢັນເຖິງຜົນສຳເລັດດ້ານການພັດທະນາເສດຖະກິດແລະການປະຕິຮູບແລະໄຂປະຕູສູ່ພາຍນອກດ້ານການທະນາຄານຂອງຈີນ ທັງມີຜົນດີຕໍ່ການເຮັດໃຫ້ SDRມີລັກສະນະຕົວແທນ,ຄວາມໝັ້ນທ່ຽງແລະຄວາມດຶງດູດຫຼາຍຂຶ້ນກວ່າເກົ່າ ແລະກໍມີຜົນດີຕໍ່ການຊຸກຍູ້ການປະຕິຮູບລະບົບເງິນຕາສາກົນໃຫ້ພັດທະນາກ້າວໄປຂ້າງໜ້າ.
ວັນທີ 30 ກັນຍາຜ່ານມາ ຕາມເວລາວໍຊິງຕັນ, IMF ໄດ້ປະກາດກະຕ່າເງິນຕາSDR ທີ່ຮັບເອົາເງິນຢວນເຂົ້າໃໝ່ນັ້ນເກີດມີຜົນສັກສິດໃນວັນທີ 1 ຕຸລານີ້ຢ່າງເປັນທາງການ. ຜູ້ອຳນວຍການໃຫຍ່ IMF ໄດ້ອອກຖະແຫຼງການວ່າ ນີ້ໄດ້ສ່ອງແສງໃຫ້ເຫັນເງິນຢວນມີຖານະບົດບາດນັບມື້ສູງຂຶ້ນໃນລະບົບເງິນຕາສາກົນ ເຊິ່ງເປັນຜົນດີຕໍ່ການສ້າງລະບົບການທະນາຄານເງິນຕາສາກົນໃຫ້ເຂັ້ມແຂງກວ່າເກົ່າ.