ໜັງສືພິມວັນນະຄະດີ ເຊິ່ງເປັນສື່ມວນຊົນທີ່ສຳຄັນຂອງສາທາລະນະລັດເຊັກ ສະບັບວັນທີ 1 ຕຸລານີ້ໄດ້ລົງພິມບົດຄວາມຂອງທ່ານມິໂລສ ເຊເມັນ ປະທານາທິບໍດີປະເທດດັ່ງກ່າວທີ່ມີຫົວຂໍ້ "ເພື່ອຊີວິດທີ່ດີງາມກວ່າເກົ່າຂອງປະຊາຊົນເຊັກ-ຈີນ"ໂດຍໄດ້ຊົມເຊີຍຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ"ທີ່ສະເໜີໂດຍຜູ້ນຳຈີນນັ້ນໄດ້ສະໜອງໂອກາດໃຫ້ແກ່ສອງປະເທດລົງເລິກການຮ່ວມມືກັນ.
ບົດຄວາມຂອງທ່ານເຊເມັນຂຽນວ່າ: ການແລກປ່ຽນລະຫວ່າງເຊັກກັບຈີນທີ່ເປັນຄູ່ຮ່ວມມືທີ່ສຳຄັນທີ່ສຸດໃນອາຊີຕົ້ນຕໍສະແດງໃຫ້ເຫັນໃນ 3 ດ້ານຄື ສາຍພົວພັນຄູ່ຮ່ວມຍຸດທະສາດຈີນ-ເອີຣົບ, ການຮ່ວມມືຈີນ-ເອີຣົບກາງແລະເອີຣົບຕາເວັນອອກຫຼື 16ບວກ1 ແລະການຮ່ວມມືລະຫວ່າງເຊັກ-ຈີນ.
ບົດຄວາມຂຽນວ່າ: ຜົນສຳເລັດທີ່ພົ້ນເດັ່ນທີ່ສຸດແມ່ນການຮ່ວມມືລະຫວ່າງສອງຝ່າຍໂດຍບໍ່ຕ້ອງສົງໃສ. ມິດຕະພາບອັນເປັນມູນເຊື້ອລະຫວ່າງເຊັກ-ຈີນໄດ້ບັນລຸການພັດທະນາແບບກ້າວກະໂດດໃນໄລຍະໃໝ່. ເດືອນມີນາປີນີ້, ທ່ານສີຈິ້ນຜິງ ປະທານປະເທດຈີນໄດ້ສຳເລັດການຢ້ຽມຢາມຄັ້ງປະຫວັດການຕໍ່ເຊັກຢ່າງສຳເລັດຜົນ ເຊິ່ງໄດ້ຊຸກຍູ້ສາຍພົວພັນສອງຝ່າຍໃຫ້ຂຶ້ນສູ່ລະດັບສູງອີກຄັ້ງໃໝ່. ໃນໄລຍະຢ້ຽມຢາມເທື່ອນີ້, ສອງຝ່າຍໄດ້ເຊັນສັນຍາຫຼາຍໆສະບັບໂດຍສະເພາະການສ້າງຕັ້ງສາຍພົວພັນຄູ່ຮ່ວມຍຸດທະສາດເປັນສັນຍາສຳຄັນທີ່ສຸດ. ຂະນະທີ່ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ"ບໍ່ພຽງແຕ່ເປັນວິໄສທັດໃຫ້ແກ່ພວກເຮົາເທົ່ານັ້ນ, ແຕ່ຍັງໄດ້ສະໜອງເສັ້ນທາງທີ່ໜັກແໜ້ນພຽງພໍເພື່ອໃຫ້ພວກເຮົາສາມາດກ້າວໄປໜ້າພາຍໃຕ້ການຊີ້ນຳຂອງຖະແຫຼງການການເມືອງ.
 |
