ວັນທີ7ຕຸລານີ້,ທ່ານເດວຟິນ ໂລເຣັນຊານາ,ລັດຖະມົນຕີກະຊວງປ້ອງກັນປະເທດຟິລິບປິນຢືນຢັນວ່າ,ອີງຕາມຄຳສັ່ງຂອງທ່ານໂຣດຣີໂກ ດູເຕີເຕ, ປະທານາທິບໍດີຟິລິບປິນ, ລັດຖະບານຟິລິບປິນໄດ້ແຈ້ງອາເມລິກາຢ່າງເປັນທາງການໃຫ້ຢຸດຕິ ແຜນການລາດຕະເວນຮ່ວມກັບກອງທັບອາເມລິກາຢູ່ທະເລຈີນໃຕ້.
ທ່ານໂລເຣັນຊານາໃຫ້ຮູ້ວ່າ,ທ່ານດູເຕີເຕຍັງຫວັງໃຫ້ຢຸດຕິການຊ້ອມຮົບຮ່ວມ28ຄັ້ງໃນທຸກປີລະຫວ່າງຟິລິບປິນກັບອາເມລິກາໃນປັດຈຸບັນ,ທັງເນັ້ນວ່າ,ຖ້າອາເມລິກາຍົກເລີກການຊ່ວຍເຫຼືອທາງການທະຫານຕໍ່ຟິລິບປິນ, ກອງທະຫານຟິລິບປິນກໍ່ມີວີທີແກ້ໄດ້.
ໃນເວທີປຶກສາຫາລືສື່ມວນຊົນທີ່ຈັດຂຶ້ນຢູ່ມະນີລາ, ທ່ານໂລເຣັນຊານາເຜີຍໃຫ້ຮູ້ວ່າ, ອາເມລິກາໄດ້ຊ່ວຍເຫຼືອຟິລິບປິນດ້ານການທະຫານ ມີມູນຄ່າແຕ່50ລ້ານຫາ 100ລ້ານໂດລາໃນທຸກປີ,ໃນນັ້ນ 30ລ້ານໂດລາສະໜອງໃຫ້ແກ່ການຊ້ອມຮົບຮ່ວມ.ຍ້ອນວ່າທ່ານດູເຕີເຕກ່າວວ່າ, ການຊ້ອມຮົບຮ່ວມຂຶ້ນບົກ"ຟິບເລັກສ໌"ປີ2016ທີ່ກຳລັງຈັດຂຶ້ນນັ້ນຈະແມ່ນ "ການຊ້ອມຮົບຮ່ວມເທື່ອສຸດທ້າຍລະຫວ່າງຟິລິບປິນກັບອາເມລິກາ", ຈາກນີ້ຈະເຮັດໃຫ້ຟິລິບປິນບໍ່ໄດ້ຮັບການຊ່ວຍເຫຼືອດ້ານການທະຫານເຫຼົ່ານີ້.
ທ່ານໂລເຣັນຊານາກ່າວໂດຍເຊື່ອວ່າເປົ້າໝາຍຂອງທ່ານດູເຕີເຕ,ຄືຢາກໃຫ້ຟິລິບປິນອາໄສອາເມລິກາໜ້ອຍລົງ.
 |
