ກອງກຳລັງຮັກສາສັນຕິພາບຈີນປະຕິບັດໜ້າທີ່ຢູ່ຊູດັງໃຕ້.
ເມື່ອບໍ່ດົນມານີ້, ສູນ "ສາມັນຊົນຢູ່ເຂດປະທະກັນ" ເຊິ່ງເປັນອົງການຈັດຕັ້ງທີ່ບໍ່ຂຶ້ນກັບລັດຖະບານທີ່ມີສຳນັກງານໃຫຍ່ຕັ້ງຢູ່ນະຄອນຫຼວງວໍຊິງຕັນສະຫະລັດອາເມລິກາໄດ້ເປີດເຜີຍບົດລາຍງານສະບັບໜຶ່ງກ່ຽວກັບກອງກຳລັງຮັກສາສັນຕິພາບສະຫະປະຊາຊາດຮັບມືກັບເຫດປະທະກັນຢ່າງຂະໜາດໃຫຍ່ຢູ່ນະຄອນຫຼວງຈູບາປະເທດຊູດັງໃຕ້ໃນເດືອນກໍລະກົດປີນີ້ໂດຍມີເນື້ອໃນຕຳໜິການປະຕິບັດໜ້າທີ່ຂອງກອງກຳລັງຮັກສາສັນຕິພາບຈີນປະຈຳຊູດັງໃຕ້.
ຕໍ່ກໍລະນີດັ່ງກ່າວ, ທ່ານຢາງຢູຈຸ່ນ ໂຄສົກກະຊວງປ້ອງກັນປະເທດຈີນຢືນຢັນໃນວັນທີ 11 ຕຸລານີ້ວ່າ: ການຕຳໜິດັ່ງກ່າວ ບໍ່ຖືກກັບຄວາມຈິງແຕ່ປະການໃດ ແລະເປັນການເສກສັນປັ້ນຂ່າວດ້ວຍເຈດຕະນາຮ້າຍ. ທ່ານຢາງຢູຈຸ່ນຢືນຢັນວ່າ: ວັນທີ 11 ກໍລະກົດຜ່ານມາ, ສອງຝ່າຍທີ່ຂັດແຍ້ງກັນພາຍໃນຊູດັງໃຕ້ໄດ້ຍິງປະທະກັນຢ່າງຮຸນແຮງ. ແນວໃດກໍດີ, ເຖິງວ່າມີກໍລະນີທີ່ທະຫານຮັກສາສັນຕິພາບຈີນບາດເຈັບແລະເສຍຊີວິດກໍຕາມແຕ່ກອງກຳລັງຮັກສາສັນຕິພາບຈີນຍັງຄົງປະຕິບັດໜ້າທີ່ຮັກສາສັນຕິພາບຂອງຕົນຢ່າງເດັດດ່ຽວ. ກ່ອນທີ່ອົງການສະຫະປະຊາຊາດເປີດເຜີຍຜົນການສືບສວນ, ການຕຳໜິຕິຕຽນທີ່ບໍ່ມີມູນຄວາມຈິງແຕ່ປະການໃດຕໍ່ການເຄື່ອນໄຫວຮັກສາສັນຕິພາບແລະເຈົ້າໜ້າທີ່ຮັກສາສັນຕິພາບຂອງອົງການສະຫະປະຊາຊາດນັ້ນລ້ວນແຕ່ເປັນການກະທຳທີ່ຂາດຄວາມຮັບຜິດຊອບ.