ວັນທີ 13 ຕຸລານີ້, ສະມັດຊາໃຫຍ່ອົງການສະຫະປະຊາຊາດໄດ້ຜ່ານມະຕິ, ແຕ່ງຕັ້ງ ທ່ານອັນໂຕນີໂອ ກູເທີເຣສ໌ ອະດີດນາຍົກລັດຖະມົນຕີບອກຕຸຍການ, ອະດີດເຈົ້າໜ້າທີ່ລະດັບສູງຂອງອົງການສະຫະປະຊາຊາດເພື່ອຊາວອົບພະຍົບ ຫຼື UNHCR ເປັນເລຂາທິການໃຫຍ່ອົງການສະຫະປະຊາຊາດໃນຊຸດໜ້າ.
ທ່ານປິເຕີ ທອມເຊິນ , ປະທານສະມັດຊາໃຫຍ່ອົງການສະຫະປະຊາຊາດຄັ້ງທີ 71 ເປັນປະທານພິທີແຕ່ງຕັ້ງດັ່ງກ່າວ, ໂດຍຜູ້ຕາງໜ້າປະເທດຕ່າງໆທີ່ເຂົ້າຮ່ວມໄດ້ເຫັນດີເປັນເອກະພາບຕາມມະຕິແຕ່ງຕັ້ງດັ່ງກ່າວ.
ທ່ານ ອັນໂຕນີໂອ ກູເທີເຣສ໌ ໄດ້ກ່າວຄຳປາໄສຫຼັງພິທີແຕ່ງຕັ້ງ, ໂດຍໄດ້ກ່າວສະແດງຄວາມຂອບໃຈປະເທດສະມາຊິກອົງການສະຫະປະຊາຊາດທີ່ເຊື່ອໝັ້ນຕໍ່ຕົນ. ແລະສັນຍາວ່າຈະເສີມຂະຫຍາຍບົດບາດສຳຄັນຂອງເລຂາທິການໃຫຍ່ອົງການສະຫະປະຊາຊາດໃນການເປັນຜູ້ໄກ່ເກ່ຍ, ຜູ້ຮຽກປະຊຸມແລະຜູ້ຕິດຕໍ່ພົວພັນແລະອື່ນໆ. ຂະນະດຽວກັນກໍຈະພະຍາຍາມຊຸກຍູ້ປະຕິບັດວາລະ 2030 ກ່ຽວກັບການພັດທະນາແບບຍືນຍົງ, ຮັບມືກັບການປ່ຽນແປງຂອງດິນຟ້າອາກາດແລະຊຸກຍູ້ໃຫ້ປະຊາຄົມໂລກຮ່ວມກັນສ້າງຄວາມຜາສຸກໃຫ້ແກ່ມະນຸດ.
 |
