ວັນທີ 14 ຕຸລານີ້,ຢູ່ນະຄອນຫຼວງດາກາປະເທດບັງກະລາເດັດ, ທ່ານສີຈິ້ນຜິງ ປະທານປະເທດຈີນໄດ້ພົບປະກັບທ່ານຊີຣິນ ຊາມິນ ໂຊດູຣີ ປະທານສະພາແຫ່ງຊາດບັງກະລາເດັດ.
ທ່ານສີຈິ້ນຜິງກ່າວເນັ້ນວ່າ: ການແລກປ່ຽນແລະຮ່ວມມືກັນລະຫວ່າງອົງການນິຕິບັນຍັດຈີນ-ບັງກະລາເດັດເປັນສ່ວນປະກອບສຳຄັນຂອງສາຍພົວພັນລະຫວ່າງສອງປະເທດ. ຈີນຍ້ອງຍໍຊົມເຊີຍສະພາແຫ່ງຊາດບັງກະລາເດັດທີ່ໄດ້ໃຫ້ຄວາມສຳຄັນແກ່ການຂະຫຍາຍສາຍພົວພັນກັບຈີນ. ອົງການນິຕິບັນຍັດສອງປະເທດຄວນເພີ່ມທະວີການແລກປ່ຽນສົນທະນາກັນ, ເປີດກວ້າງພື້ນຖານປະຊາມະຕິເພື່ອໃຫ້ສອງປະເທດເພີ່ມທະວີຄວາມໄວ້ເນື້ອເຊື່ອໃຈທາງການເມືອງແລະເຊື່ອມຕໍ່ຍຸດທະສາດການພັດທະນາ, ທັງສະໜອງການຄ້ຳປະກັນທາງກົດໝາຍໃຫ້ແກ່ການແລກປ່ຽນຮ່ວມມືລະຫວ່າງສອງປະເທດໃນຂົງເຂດການເມືອງ,ເສດຖະກິດການຄ້າ,ວັດທະນະທຳແລະອື່ນໆ.
ທ່ານໂຊດູຣີຢືນຢັນວ່າ ການມາຢ້ຽມຢາມບັງກະລາເດັດຂອງທ່ານປະທານສີຈິ້ນຜິງເທື່ອນີ້ເປັນຂີດໝາຍໃນປະຫວັດສາຍພົວພັນບັງກະລາເດັດ-ຈີນ ເຊິ່ງຈະຍົກສາຍພົວພັນສອງປະເທດຂຶ້ນສູ່ລະດັບໃໝ່. ໃນຂະບວນການບັນລຸແຜນພັດທະນາປະເທດຊາດ, ບັງກະລາເດັດຫວັງເພີ່ມທະວີການຮ່ວມມືກັບຈີນໃນຂົງເຂດການຄ້າ,ການລົງທຶນ,ພື້ນຖານໂຄງລ່າງແລະອື່ນໆພາຍໃຕ້ຂອບ "ໜຶ່ງແລວທາງໜຶ່ງເສັ້ນທາງ".ຂະນະດຽວກັນສະພາແຫ່ງຊາດບັງກະລາເດັດຍິນດີເພີ່ມທະວີການແລກປ່ຽນກັນລະຫວ່າງອົງການນິຕິບັນຍັດຂອງສອງປະເທດເພື່ອປະກອບສ່ວນເຂົ້າໃນການເສີມຂະຫຍາຍສາຍພົວພັນບັງກະລາເດັດ-ຈີນ.
 |
