ໃນກອງປະຊຸມຖະແຫຼງຂ່າວທີ່ຈັດຂຶ້ນໃນວັນທີ 14 ຕຸລານີ້, ທ່ານເກິງສວາງ ໂຄສົກກະຊວງການຕ່າງປະເທດຈີນກ່າວວ່າ, ຫວັງວ່າອົງການສະຫະປະຊາຊາດສາມາດຈະເສີມຂະຫຍາຍບົດບາດສຳຄັນໃນການຮັກສາສັນຕິພາບສາກົນ, ຊຸກຍູ້ການພັດທະນາຮ່ວມກັນແລະອື່ນໆໃນໄລຍະທ່ານອັນໂຕນີໂອ ກູເທີເຣສ໌ ດຳລົງຕຳແໜ່ງເປັນເລຂາທິການໃຫຍ່.
ທ່ານເກິງສວາງກ່າວວ່າ, ຈີນສະແດງຄວາມຊົມເຊີຍຕໍ່ທ່ານອັນໂຕນີໂອ ກູເທີເຣສ໌ ອະດີດນາຍົກລັດຖະມົນຕີບອກຕຸຍການ, ອະດີດເຈົ້າໜ້າທີ່ລະດັບສູງຂອງອົງການສະຫະປະຊາຊາດເພື່ອຊາວອົບພະຍົບ ຫຼື UNHCR ໄດ້ຮັບເລືອກຕັ້ງເປັນເລຂາທິການໃຫຍ່ອົງການສະຫະປະຊາຊາດຊຸດໜ້າ. ທ່ານກ່າວວ່າ, ທ່ານກູເທີເຣສ໌ ມີບົດຮຽນອັນສົມບູນແລະຄວາມສາມາດດີເດັ່ນ, ຮູ້ວຽກງານສາກົນເປັນຢ່າງດີ, ແມ່ນຜູ້ເໝາະກັບເລຂາທິການໃຫຍ່ອົງການສະຫະປະຊາຊາດຊຸດໜ້າ. ພວກເຮົາມີຄວາມຫວັງແລະເຊື່ອໝັ້ນວ່າ, ໃນໄລຍະທ່ານອັນໂຕນີໂອ ກູເທີເຣສ໌ ດຳລົງຕຳແໜ່ງເປັນເລຂາທິການໃຫຍ່, ອົງການສະຫະປະຊາຊາດຈະເສີມຂະຫຍາຍບົດບາດສຳຄັນໃນການຮັກສາສັນຕິພາບຂອງໂລກ, ຊຸກຍູ້ການພັດທະນາຮ່ວມກັນ, ຊຸກຍູ້ການຮ່ວມມືສາກົນ, ສ້າງສາຍພົວພັນສາກົນແບບໃໝ່ທີ່ຖືການຮ່ວມມືຕ່າງຝ່າຍຕ່າງມີຜົນປະໂຫຍດເປັນໃຈກາງແລະສ້າງປະຊາຄົມຮ່ວມຊະຕາກຳຂອງມະນຸດ.
ທ່ານເກິງສວາງກ່າວວ່າ: "ໃນຖານະເປັນປະເທດສະມາຊິກຖາວອນສະພາຄວາມໝັ້ນຄົງແລະປະເທດທີ່ມີຄວາມຮັບຜິດຊອບຂອງປະຊາຄົມໂລກ, ຈີນຈະສືບຕໍ່ສະໜັບສະໜູນແລະປະສານສົມທົບກັບວຽກງານຂອງເລຂາທິການໃຫຍ່ອົງການສະຫະປະຊາຊາດ."