ກອງປະຊຸມສຸດຍອດປະເທດເບຣຊີນ,ຣັດເຊຍ,ອິນເດຍ,ຈີນແລະອາຟຣິກກາໃຕ້ຫຼືBRICS ຄັ້ງທີ 8 ໄດ້ຈັດຂຶ້ນຢູ່ລັດໂກອາ ປະເທດອິນເດຍໃນວັນທີ 16 ຕຸລານີ້ແລະໃນໂອກາດເຂົ້າຮ່ວມກອງປະຊຸມດັ່ງກ່າວ, ທ່ານສີຈິ້ນຜິງ ປະທານປະເທດຈີນໄດ້ກ່າວປາຖະກະຖາໃນຫົວຂໍ້ "ສ້າງຄວາມໝັ້ນໃຈຢ່າງເດັດດ່ຽວເພື່ອຮ່ວມກັນສະແຫວງຫາການພັດທະນາ"ໂດຍໄດ້ສະເໜີຂໍ້ລິເລີ່ມກ່ຽວກັບປະເທດBRICSຮ່ວມກັນຮັບມືກັບສິ່ງທ້າທາຍທີ່ເກີດຈາກສະພາບແວດລ້ອມສາກົນ ທັງເນັ້ນວ່າຈີນຍິນດີຮ່ວມກັບບັນດາຝ່າຍສ້າງແຜນພັດທະນາປະເທດBRICS.
ທ່ານສີຈິ້ນຜິງເນັ້ນວ່າ: ໃນປັດຈຸບັນ, ປະເທດBRICSກຳລັງຜະເຊີນກັບສະພາບແວດລ້ອມພາຍນອກທີ່ຜັນແປຢ່າງສັບສົນ, ຈາກນີ້,ຈຶ່ງສະເໜີຂໍ້ລິເລີ່ມ 5 ຂໍ້ຄື ໜຶ່ງ, ຄວນຊຸກຍູ້ການປະຕິຮູບອົງປະກອບເສດຖະກິດ, ປະດິດສ້າງຮູບແບບເຕີບໂຕອັນໃໝ່, ສ້າງເສດຖະກິດໃນລັກສະນະເປີດປະຕູ. ສອງ, ຄວນສືບຕໍ່ເພີ່ມທະວີການສົນທະນາເໜືອໃຕ້ແລະການຮ່ວມມືໃຕ້ໃຕ້, ຊຸກຍູ້ເສດຖະກິດທົ່ວໂລກໃຫ້ບັນລຸການເຕີບໂຕຢ່າງແຂງແຮງ, ຍືນຍົງ,ເທົ່າທ່ຽມກັນແລະກວມລວມ. ສາມ, ຄວນຮ່ວມກັນຮັບມືກັບການປ່ຽນແປງຂອງດິນຟ້າອາກາດ, ລັດທິກໍ່ການຮ້າຍແລະບັນຫາສາກົນອື່ນໆ. ສີ່, ຄວນສືບຕໍ່ເພີ່ມລັກສະນະການເປັນຕົວແທນແລະສິດປະກອບຄຳເຫັນຂອງປະເທດທີ່ເປັນຕະຫຼາດພັດທະນາໃໝ່ແລະປະເທດພວມພັດທະນາ, ສົ່ງເສີມການກສ້າງສາຍພົວພັນລະຫວ່າງຊາດແບບໃໝ່ທີ່ຮ່ວມມືແບບຕ່າງຝ່າຍຕ່າງມີຜົນປະໂຫຍດ. ຫ້າ, ຄວນຖືການຈັດຕັ້ງປະຕິບັດຍຸດທະສາດຄູ່ຮ່ວມມືເສດຖະກິດປະເທດBRICSເປັນໂອກາດເພື່ອລົງເລິກແລະເປີດກວ້າງການຮ່ວມມືດ້ານເສດຖະກິດໃນຂົງເຂດຕ່າງໆ.
 |
