ຫ້ອງການຖະແຫຼງຂ່າວລັດຖະບານຈີນໄດ້ເຜີຍແຜ່ປື້ມປົກຂາວ "ການເຄື່ອນໄຫວຫຼຸດຜ່ອນຄວາມທຸກຍາກແລະຄວາມກ້າວໜ້າດ້ານສິດທິມະນຸດຂອງຈີນ" ໃນວັນທີ 17 ຕຸລານີ້ ໂດຍຊີ້ໃຫ້ເຫັນວ່າ: ເພື່ອຕອບສະໜອງຕາມຄວາມຮຽກຮ້ອງຕ້ອງການດ້ານການທະນາຄານໃນການຫຼຸດຜ່ອນຄວາມທຸກຍາກດ້ວຍການພັດທະນາຂະແໜງການທີ່ມີສີສັນພິເສດ, ການຍົກຍ້າຍປະຊາກອນທຸກຍາກໄປຢູ່ບ່ອນທີ່ເງື່ອນໄຂເອື້ອອຳນວຍຕໍ່ການດຳລົງຊີວິດ, ການປະກອບອາຊີບ ຫຼື ການເຂົ້າຮ່ຳຮຽນຢູ່ໂຮງຮຽນຂອງປະຊາກອນທຸກຍາກ ຈີນໄດ້ປະດິດສ້າງ ແລະ ພັດທະນາເງິນກູ້ລາຍຍ່ອຍ ເພື່ອສະໜັບສະໜູນຄອບຄົວທຸກຍາກໃນການພັດທະນາເຕັກນິກວິຊາຊີບ, ສ້າງລາຍຮັບໃຫ້ຄອບຄົວເພີ່ມຂຶ້ນ ໂດຍມາຮອດທ້າຍປີ 2015 ຜ່ານມາ, ໄດ້ປ່ອຍເງິນກູ້ລາຍຍ່ອຍ 120 ຕື້ຢວນໃຫ້ແກ່ຄອບຄົວທຸກຍາກແລ້ວ.
ນັບແຕ່ປີ 2012 ເປັນຕົ້ນມາ, ລັດຖະບານຈີນໄດ້ສືບຕໍ່ເພີ່ມທະວີໃນການຫຼຸດຜ່ອນຄວາມທຸກຍາກ ໂດຍໄດ້ປະຕິຮູບແລະປະດິດສ້າງກົນໄກວຽກງານຫຼຸດຜ່ອນຄວາມທຸກຍາກຢ່າງບໍ່ຢຸດຢັ້ງ, ນຳພາ ແລະ ສົ່ງເສີມການເຂົ້າຮ່ວມຂອງທົ່ວສັງຄົມແລະສະໜັບສະໜູນການຫຼຸດຜ່ອນຄວາມທຸກຍາກທີ່ມີຄວາມຫຍຸ້ງຍາກທີ່ສຸດ, ບູລະນະກົນໄກຕິດຕາມປະຊາທິປະໄຕໃຫ້ສົມບູນຂຶ້ນຕື່ມອີກ ເພື່ອຍົກປະສິດທິຜົນການຫຼຸດຜ່ອນຄວາມທຸກຍາກໃຫ້ສູງຂຶ້ນຢ່າງແທ້ຈິງ.