ເວທີປຶກສາຫາລືແມ່ຍິງແມ່ນ້ຳລ້ານຊ້າງ-ແມ່ນ້ຳຂອງທີ່ຈະດຳເນີນໄປເປັນເວລາ 4 ວັນໄດ້ໄຂຂຶ້ນໃນວັນທີ 19 ຕຸລານີ້ຢູ່ສູນປະຊຸມສາກົນນະຄອນຫຼວງປັກກິ່ງ ສປ ຈີນໂດຍຜູ້ແທນແມ່ຍິງເກືອບ 200 ທ່ານຈາກ 6 ປະເທດຄື ຈີນ,ລາວ,ຫວຽດນາມ, ກຳປູເຈຍ, ມຽນມາແລະໄທໄດ້ເຂົ້າຮ່ວມ.
ເວທີປຶກສາຫາລືຄັ້ງນີ້ຈັດຂຶ້ນພາຍໃຕ້ການເປັນເຈົ້າພາບຮ່ວມຂອງມູນນິທິຊົ້ງຊິ້ງລິນຈີນ, ສູນຈີນ-ອາຊຽນແລະວິທະຍາໄລເພດຍິງຈີນໂດຍຜູ້ແທນທີ່ຮ່ວມປະຊຸມຈະລົງເລິກຫາລືຫົວຂໍ້ຕ່າງໆເປັນຕົ້ນແມ່ຍິງກັບການຄຸ້ມຄອງສັງຄົມ,ການມອບສິດທາງເສດຖະກິດໃຫ້ແມ່ຍິງ, ການອະນຸລັກມໍລະດົກວັດທະນະທຳທີ່ບໍ່ແມ່ນວັດຖຸກັບການພັດທະນາແມ່ຍິງ.
ຂ່າວແຈ້ງວ່າ: ເວທີປຶກສາຫາລືດັ່ງກ່າວເນັ້ນການແລກປ່ຽນລະຫວ່າງປະຊາຊົນເພື່ອເພີ່ມທະວີການພົວພັນຢ່າງມີໄມຕີຈິດມິດຕະພາບກັບອົງການຈັດຕັ້ງປະຊາຊົນແລະອົງການທີ່ບໍ່ຂຶ້ນກັບລັດຖະບານຂອງປະເທດອ້ອມຂ້າງ ເຊິ່ງຈະມີບົດບາດຕ່າງໆເຊັ່ນປົກປັກຮັກສາສັນຕິພາບຂອງຈີນແລະອາຊຽນ, ສົ່ງເສີມການພັດທະນາຢ່າງໝັ້ນທ່ຽງແລະຄວາມຈະເລີນຮຸ່ງເຮືອງຂອງສອງຝ່າຍ, ລົງເລິກການຮ່ວມມືຕົວຈິງ ທັງເສີມສ້າງກົນໄກເຈລະຈາຮ່ວມມືແມ່ນ້ຳລ້ານຊ້າງ-ແມ່ນ້ຳຂອງຕື່ມອີກ.