ວັນທີ 21 ຕຸລານີ້, ທ່ານໂຣເບີໂທ ອາເຊເວໂດ ຜູ້ອຳນວຍການໃຫຍ່ອົງການການຄ້າໂລກກ່າວວ່າ, ຄວາມບໍ່ໝັ້ນທ່ຽງຂອງຕະຫຼາດແຮງງານໃນທົ່ວໂລກເພີ່ມຂຶ້ນ ແລະບັນຫາອື່ນໆ ບໍ່ຢູ່ນຳການຄ້າ, ລັດທິປົກປ້ອງການຄ້າບໍ່ແມ່ນຢາແກ້ໄຂບັນຫາ.
ມື້ດຽວກັນ ທ່ານອາເຊເວໂດໄດ້ເຂົ້າຮ່ວມກອງປະຊຸມລະດັບລັດຖະມົນຕີວົງແຄບຂອງອົງການການຄ້າໂລກຢູ່ເມືອງໂອສໂລ ແລະຮ່ວມກັບທ່ານໂບຈ ແບຼນເຕີ ລັດຖະມົນຕີກະຊວງການຕ່າງປະເທດນັອກແວຈັດງານຖະແຫຼງຂ່າວ. ໂດຍແນໃສ່ກະແສຕ້ານການຄ້າທີ່ຟື້ນຕົວຄືນຢູ່ປະເທດອາເມລິກາແລະເອີລົບ, ທ່ານອາເຊເວໂດຊີ້ອອກວ່າ, ໃນອົງກອນເສດຖະກິດທີ່ພັດທະນາແລ້ວ, ມີພຽງການຫວ່າງງານທີ່ໜ້ອຍກວ່າ 20% ແມ່ນເກີດຂຶ້ນຍ້ອນສາເຫດທາງການຄ້າ, ຫຼາຍກວ່າ 80% ແມ່ນກ່ຽວຂ້ອງກັບເຕັກນິກໃໝ່ ການປະດິດສ້າງໃໝ່ແລະການນຳໃຊ້ອັດຕະໂນມັດ.
ທ່ານເຫັນວ່າ, ເພື່ອຮັບມືກັບການທ້າທາຍດັ່ງກ່າວ, ຕ້ອງພະຍາຍາມຈາກດ້ານພາຍໃນຂອງທຸກອົງກອນເສດຖະກິດແລະທົ່ວໂລກ, ໜຶ່ງແມ່ນປັບປຸງນະໂຍບາຍການສຶກສາ, ການອົບຮົມ ແລະການລົງທຶນພາຍໃນທຸກອົງກອນເສດຖະກິດ, ໂດຍສະເພາະແມ່ນເຈາະຈົງສະໜັບສະໜູນວິສາຫະກິດຂະໜາດກາງແລະນ້ອຍທີ່ອຳນວຍຕຳແໜ່ງວຽກງານຈຳນວນຫຼວງຫຼາຍໄດ້, ສອງແມ່ນ ທຸກອົງກອນເສດຖະກິດຕ້ອງເພີ່ມທະວີການຮ່ວມມືທົ່ວໂລກ, ຊຸກຍູ້ການພັດທະນາການຄ້າ, ສ້າງຕຳແໜ່ງອາຊີບໃຫ້ຫຼາຍກວ່າເກົ່າ, ຊຸກຍູ້ເສດຖະກິດເພີ່ມຂຶ້ນ.
ກອງປະຊຸມລະດັບລັດຖະມົນຕີວົງແຄບຂອງອົງການການຄ້າໂລກຄັ້ງນີ້ ແມ່ນຈັດຂຶ້ນຢູ່ເມືອງໂອສໂລໃນວັນທີ 21-22 ຕຸລານີ້, 24 ສະມາຊິກສຳຄັນຂອງອົງການການຄ້າໂລກ ຄືອາເມລິກາ ສະຫະພາບເອີລົບແລະຈີນ ໄດ້ສົ່ງຜູ້ຕາງໜ້າເຂົ້າຮ່ວມກອງປະຊຸມ. ຜູ້ຕາງໜ້າທັງໝົດຈະປຶກສາຫາລືກັນກ່ຽວກັບຫົວຂໍ້ຕ່າງໆ ຄືປົກປ້ອງໂຄງປະກອບການຄ້າຫຼາຍຝ່າຍ, ຊຸກຍູ້ເສດຖະກິດເພີ່ມຂຶ້ນໂດຍຜ່ານການຄ້າສາກົນ, ເຮັດແນວໃດຮັບມືກັບການທ້າທາຍຕົ້ນຕໍທີ່ມາຈາກການຕ້ານການຄ້າ ແລະອື່ນໆ.
 |
