ຕາມຂ່າວສານຊິນຮວາ:ຕໍ່ກັບມີລາຍງານຂ່າວກ່າວວ່າ,ລັດຖະບານຍີ່ປຸ່ນສະແດງຄວາມເປັນຫ່ວງຕໍ່ຈີນ-ຟິລິບປິນກ້າວເຖິງຂັ້ນມີຄວາມເຫັນເປັນເອກະສັນກັນກ່ຽວກັບການໂຈະຄວາມຂັດ ແຍ້ງຢູ່ທະເລຈີນໃຕ້,ວັນທີ 21 ຕຸລານີ້,ທ່ານນາງຮວ້າຊຸນຢິງ ໂຄສົກກະຊວງການຕ່າງປະເທດຈີນທວງໃຫ້ຍີ່ປຸນຈົ່ງຢຸດຕິການຍຸແຫຍ່ໃນທັນທີ.
ໃນກອງປະຊຸມຂ່າວໃນວັນດຽວກັນ,ມີນັກຂ່າວຖາມວ່າ,ຂ່າວສານກຽວໂຕລາຍງານວ່າ,ຕໍ່ກັບຜູ້ນຳຈີນ-ຟິລິບປິນກ້າວເຖິງຂັ້ນມີຄວາມເຫັນເປັນເອກະສັນກັນກ່ຽວກັບການໂຈະຄວາມຂັດແຍ້ງຢູ່ທະເລຈີນໃຕ້,ລັດຖະບານຍີ່ປຸ່ນມີຄວາມເປັນຫ່ວງຫຼາຍຂຶ້ນ,ກຽມທວງໃຫ້ຟິລິບປິນເຄົາລົບການຕັດສິນອະນຸຍາໂຕຕຸລາການ.ນອກນີ້,ມີຂ່າວແຈ້ງອີກວ່າ,ວັນທີ 20 ຕຸລານີ້,ທ່ານໂຢຊີຮິເດ ຊູກາ ເລຂາທິການຄະນະລັດຖະບານຍີ່ປຸ່ນກ່າວວ່າ,ບັນຫາທະເລຈີນໃຕ້ແມ່ນບັນຫາທີ່ປະຊາຄົມໂລກສົນໃຈຮ່ວມກັນ,ທ່ານນາຍົກຊິນໂຈະ ອາເບະຫວັງທວງໃຫ້ຟິລິບປິນເພີ່ມທະວີການຮ່ວມມືກັບອາເມລິກາແລະຍີ່ປຸ່ນໃນໄລຍະທ່ານດູເຕິເຕ ປະທານາທິບໍດີຟິລິບປິນຢ້ຽມຢາມຍີ່ປຸ່ນ.ຈີນມີການວິຈານແນວໃດຕໍ່ເລື່ອງນີ້?
ທ່ານນາງຮວ້າຊຸນຢິງກ່າວວ່າ,ຄຳເວົ້າເຫຼົ່ານີ້ຂອງຍີ່ປຸ່ນແມ່ນບໍ່ຮູ້ຈັກກາລະເທສະ.ການພົວພັນຈີນ-ຟິລິບປິນດີຂຶ້ນຢ່າງຮອບດ້ານແລະພັດທະນາ,ບັນຫາທະເລຈີນໃຕ້ກັບຄືນສູ່ວິຖີທາງອັນຖືກຕ້ອງທີ່ສອງຝ່າຍແກ້ໄຂດ້ວຍການສົນທະນາແລະປຶກສາຫາລືເຊິ່ງນີ້ສອດຄ່ອງກັບຜົນປະໂຫຍດພື້ນຖານຮ່ວມຂອງປະຊາຊົນສອງຊາດຈີນ-ຟິລິບປິນ,ກໍມີຜົນດີຕໍ່ສັນຕິພາບແລະສະຖຽນລະພາບຂອງພາກພື້ນ.
ທ່ານນາງກ່າວວ່າ,ຍີ່ປຸ່ນມີຄົນຈຳນວນໜຶ່ງມັກເວົ້າສັນຕິພາບແລະສະຖຽນລະພາບຂອງພາກພື້ນຕິດປາກ,ແຕ່ເມື່ອສັນຕິພາບແລະສະຖຽນລະພາບຂອງພາກພື້ນຈະບັນລຸຜົນເປັນຈິງຢ່າງແທ້ຈິງນັ້ນ,ເຂົາເຈົ້າພັດຮ້ອນຮົນກັງວົນ. "ພວກເຮົາທວງໃຫ້ຍີ່ປຸ່ນຈົ່ງຢຸດຕິການຍຸແຫຍ່ລະຫວ່າງປະເທດໃນພາກພື້ນນີ,ເພື່ອສົ່ງເສີມບົດບາດລັກສະນະສ້າງສັນໃຫ້ແກ່ສັນຕິພາບແລະສະຖຽນລະພາບຂອງພາກພື້ນ.