ທູດພິເສດຂອງປະທານປະເທດຈີນເດີນທາງໄປໄທເພື່ອໄວ້ອາໄລເຖິງດວງວິນຍານຂອງເຈົ້າຊີວິດພູມີພົນ ອະດຸນຍະເດດ
2016-10-23 15:09:55 cri
ຕາມຂ່າວ CRI: ວັນທີ 22 ຕຸລານີ້ ທ່ານຫຼີຢວນຊາວ ຮອງປະທານປະເທດຈີນ ທູດພິເສດຂອງທ່ານປະທານປະເທດສີຈິ້ນຜິງໄດ້ເດີນທາງໄປປະເທດໄທ ເພື່ອໄວ້ອາໄລເຖິງດວງວິນຍານຂອງເຈົ້າຊີວິດພູມີພົນ ອະດຸນຍະເດດ.
ໃນເວລາພົບປະກັບທ່ານນະລົງ ພິບພັດທະນະໄຊ ຮອງນາຍົກລັດຖະມົນຕີໄທ, ທ່ານຫຼີຢວນຊາວກ່າວວ່າ, ການພົວພັນລະຫວ່າງຈີນ-ໄທ ໄດ້ຮັບການຂະຫຍາຍຕົວຢ່າງປອດໃສແມ່ນແຍກອອກຈາກຄວາມເອົາໃຈໃສ່ ແລະການສະໜັບສະໜຸນຂອງເຈົ້າຊີວິດພູມີພົນ ອະດຸນຍະເດດພ້ອມດ້ວຍພະບໍລົມວົງສະນຸວົງຂອງໄທບໍ່ໄດ້. ຈີນ ແລະໄທພະຍາຍມຊຸກຍູ້ໃຫ້ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງຝ່າຍຂະຫຍາຍຕົວໄປເລື້ອຍໆ ກໍເປັນການເສີມຂະຫຍາຍ ແລະສືບທອດເຈດຕະນາລົມຂອງເຈົ້າຊີວິດພູມີພົນ ອະດຸນຍະເດດ. ຈີນສຸດທີ່ເອົາໃຈໃສ່ນຳການພົວພັນຈີນ-ໄທ, ແລະຖະໜຸຖະໜອມມິດຕະພາບກັບພະບໍລົມວົງສານຸວົງໄທ, ເຊື່ອວ່າມິດຕະພາບຈີນ-ໄທຍ່ອມຈະໄດ້ຮັບການສືບທອດໄປທຸກເຊັ່ນຄົນ. ຈີນຍິນດີຮ່ວມກັບໄທທຳຄວາມພະຍາຍາມ, ສືບທອດມິດຕະພາບ, ເພີ່ມພູນຄວາມໄວ້ເນື້ອເຊື່ອໃຈເຊິ່ງກັນແລະກັນ, ຍົກລະດັບຂອງການຮ່ວມມືໃຫ້ສູງຂຶ້ນ ເພື່ອນຳເອົາຄວາມຜາສຸກຫຼາຍກວ່າເກົ່າມາໃຫ້ລັດຖະບານ ແລະປະຊາຊົນສອງປະເທດ.
ທ່ານນະລົງ ພິບພັດທະນະໄຊກ່າວວ່າ, ຂອບໃຈທ່ານຮອງປະທານປະເທດຫຼີຢວນຊາວເດີນທາງໄປໄວ້ອາໄລເຖິງດວງວິນຍານຂອງເຈົ້າຊີວິດພູມີພົນອະດຸນຍະເດດ ໃນຖານະເປັນທູດພິເສດຂອງທ່ານປະທານປະເທດສີຈິ້ນຜິງ ເຊິ່ງສະແດງໃຫ້ເຫັນເຖິງຄວາມຮັກແພງກັນຂອງຜູ້ນຳ ລັດຖະບານກໍຄືປະຊາຄົນຈີນທີ່ມີຕໍ່ພະບໍລົມວົງສານຸວົງ ລັດຖະບານ ແລະປະຊາຊົນໄທ. ລັດຖະບານໄທຖືສຳຄັນການພົວພັນຕໍ່ຈີນ, ຍິນດີຮ່ວມກັບຈີນຊຸກຍູ້ໃຫ້ການ ພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດໄດ້ຮັບຄວາມຄືບໜ້າໃໝ່ເລື້ອຍໆ.
