ກອງປະຊຸມປຶກສາຫາລືການຕ້ານລັດທິກໍ່ການຮ້າຍລະດັບຮອງລັດຖະມົນຕີຈີນ-ອາເມລິກາຄັ້ງທີ 3 ແລະ ການສຳມະນາບັນຫາການສະກັດກັ້ນເຄື່ອງລະເບີດແບບງ່າຍດາຍຈີນ-ອາເມລິກາຄັ້ງທີ 2 ໄດ້ຈັດຂຶ້ນຢູ່ນະຄອນຫຼວງວໍຊິງຕັນໃນວັນທີ 25 ຕຸລານີ້. ຂະນະທີ່ກະຊວງການຕ່າງປະເທດອາເມລິກາໄດ້ຢືນຢັນໃນມື້ດຽວກັນວ່າ ຍິນດີເປີດກວ້າງແລະລົງເລິກການຮ່ວມມືຕ້ານລັດທິກໍ່ການຮ້າຍລະຫວ່າງສອງປະເທດຕື່ມອີກ.
ໃນວັນດັ່ງກ່າວ, ກະຊວງການຕ່າງປະເທດອາເມລິກາໄດ້ອອກຖະແຫຼງການວ່າ: ການປຶກສາຫາລືຕ້ານລັດທິກໍ່ການຮ້າຍລະດັບຮອງລັດຖະມົນຕີຈີນ-ອາເມລິກາຄັ້ງນີ້ແນໃສ່ເພີ່ມທະວີການປະສານງານລະຫວ່າງສອງປະເທດໃນບັນຫາຕ້ານລັດທິກໍ່ການຮ້າຍ ໂດຍຫົວຂໍ້ປຶກສາຫາລືລວມມີໄພຂົ່ມຂູ່ຈາກລັດທິກໍ່ການຮ້າຍໃນພາກພື້ນ, ຄວາມປອດໄພທາງການບິນ, ການຮ່ວມຊົມໃຊ້ຂໍ້ມູນຂ່າວສານ, ຄວາມໝັ້ນຄົງຕາມຊາຍແດນ, ການປົກປັກຮັກສາສິດທິມະນຸດ, ການສະກັດກັ້ນລັດທິຫົວຮຸນແຮງ ແລະອື່ນໆ.
ຖະແຫຼງການຍັງລະບຸວ່າ: ອາເມລິກາຫວັງວ່າຈະເພີ່ມທະວີການປຶກສາຫາລືກັບຈີນຢ່າງຕໍ່ເນື່ອງໃນການຕ້ານລັດທິກໍ່ການຮ້າຍ ທັງເປີດກວ້າງແລະລົງເລິກການຮ່ວມມືຕ້ານລັດທິກໍ່ການຮ້າຍລະຫວ່າງສອງປະເທດຕື່ມອີກ.