ຕອນບ່າຍວັນທີ 25 ຕຸລານີ້, ກອງປະຊຸມແມ່ນ້ຳຂອງຂອງເວທີປຶກສາຫາລືເສດຖະກິດໂລກຄັ້ງທຳອິດໄດ້ໄຂຂຶ້ນຢູ່ນະຄອນຫຼວງຮາໂນ້ຍ ສສ ຫວຽດນາມ, ໂດຍມີຜູ້ນຳ, ລັດຖະມົນຕີກະຊວງການເງິນ, ນັກທຸລະກິດແລະນັກວິຊາການປະມານ 200 ທ່ານໃນປະເທດອະນຸພາກພື້ນແມ່ນ້ຳຂອງເຂົ້າຮ່ວມ.
ຫົວຂໍ້ຕົ້ນຕໍຂອງກອງປະຊຸມດັ່ງກ່າວແມ່ນ "ຊຸກຍູ້ການພັດທະນາອະນຸພາກພື້ນແມ່ນ້ຳຂອງ: ເພີ່ມການລົງທຶນຕໍ່ການກໍ່ສ້າງພື້ນຖານໂຄງລ່າງ, ຊັບພະຍາກອນມະນຸດແລະການເຊື່ອມຈອດກັນ." ເວທີປຶກສາຫາລືເທື່ອນີ້ຈະຈັດກອງປະຊຸມປຶກສາຫາລື 5 ຄັ້ງ, ຈະປຶກສາຫາລືກ່ຽວກັບການພັດທະນາຂອງປະເທດອະນຸພາກພື້ນແມ່ນ້ຳຂອງແລະບັນຫາທີ່ກ່ຽວຂ້ອງຂອງຂະບວນການ ເຊື່ອມໂຍງເຂົ້າກັນຂອງພາກພື້ນເປັນຕົ້ນ, ວິໄສທັດແລະທິດທາງພັດທະນາຂອງອະນຸພາກພື້ນແມ່ນ້ຳຂອງ, ກະກຽມເງິນທຶນເພື່ອຊຸກຍູ້ການກໍ່ສ້າງພື້ນຖານໂຄງລ່າງ, ເຮັດໃຫ້ການຄ້າ, ການລົງທຶນແລະການທ່ອງທ່ຽວມີຄວາມສະດວກກວ່າເກົ່າ, ເລັ່ງໃຫ້ອະນຸພາກພື້ນແມ່ນ້ຳຂອງຫັນເປັນອຸດສາຫະກຳແລະພັດທະນາແບບຍືນຍົງ.
ກອງປະຊຸມແມ່ນ້ຳຂອງຂອງເວທີປຶກສາຫາລືເສດຖະກິດໂລກແມ່ນການລິເລີ່ມຈັດຂຶ້ນຂອງ ສສ ຫວຽດນາມ, ແລະໄດ້ຮັບການສະໜັບສະໜູນຈາກປະເທດຕ່າງໆຂອງອະນຸພາກພື້ນແມ່ນ້ຳຂອງ. ທ່ານຫງວຽນຊວນຟຸກ ນາຍົກລັດຖະມົນຕີຫວຽດນາມ, ທ່ານຮຸນແຊນ, ນາຍົກລັດຖະມົນຕີກຳປູເຈຍ, ທ່ານທອງລຸນ ສີສຸລິດ ນາຍົກລັດຖະມົນຕີລາວແລະທ່ານສົມຄິດ ຈະຕຸສີພິທັກ ຮອງນາຍົກລັດຖະມົນຕີໄທໄດ້ເຂົ້າຮ່ວມກອງປະຊຸມເທື່ອນີ້.