ຕອນບ່າຍວັນທີ 28 ຕຸລານີ້, ຄະນະໂຄສະນາອົບຮົມສູນກາງພັກກອມມູນິດຈີນໄດ້ຈັດພິທີ ຖະແຫຼງຂ່າວກ່ຽວກັບກອງປະຊຸມຄົບຄະນະຂອງຄະນະກຳມະການສູນກາງພັກກອມມູນິດຈີນຄັ້ງທີ 6 ສະໄໝທີ 18, ເຊິ່ງໄດ້ອະທິບາຍ "ກົດລະບຽບການຮ່ວມຊີວິດການເມືອງພາຍໃນພັກພາຍໃຕ້ສະຖານະການໃໝ່", "ກົດລະບຽບການຕິດຕາມພາຍໃນພັກກອມມູນິດຈີນ", ແລະໄດ້ຕອບຄຳຖາມຂອງນັກຂ່າວຈີນແລະຕ່າງປະເທດ.
ທ່ານຫວງຄຸນມິງ, ຮອງຫົວໜ້າປະຈຳຄະນະໂຄສະນາອົບຮົມສູນກາງພັກຄອມມູນິດຈີນກ່າວວ່າ, ຈິດໃຈພື້ນຖານແລະໝາກຜົນສຳຄັນຂອງກອງປະຊຸມຄົບຄະນະໄດ້ບັນລະຍາຍໝົດໃນຖະແຫຼງການຂອງກອງປະຊຸມ. ການທີ່ຮ່ຳຮຽນ, ໂຄສະນາແລະປະຕິບັດຈິດໃຈຂອງ ກອງປະຊຸມຄົບຄະນະຂອງຄະນະກຳມະການສູນກາງພັກກອມມູນິດຈີນຄັ້ງທີ 6 ໃຫ້ດີ, ແມ່ນໜ້າທີ່ການເມືອງສຳຄັນຂອງທົ່ວພັກແລະລັດໃນປັດຈຸບັນແລະໄລຍະຕໍ່ໄປ. ກອງປະຊຸມຄົບຄະນະເທື່ອນີ້ໄດ້ຊີ້ແຈງຖານະໃຈກາງຂອງທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນຢ່າງແຈ່ມແຈ້ງ, ສະເໜີຖ້ອຍຄວາມ "ສູນກາງພັກທີ່ຖືທ່ານສີຈິ້ນຜີງເປັນໃຈກາງ" ຢ່າງເປັນທາງການ, ມີຄວາມໝາຍເລິກເຊິ່ງຍາວໄກແລະສຳຄັນຕໍ່ການຮັກສາຄວາມສາມັກຄີແລະການນຳພາຂອງພັກ, ຮັບປະກັນໃຫ້ພັກແລະລັດພັດທະນາຈະເລີນຮຸ່ນເຮືອງ.
ທ່ານສີຢີ້, ຮອງຫົວໜ້າຄະນະຈັດຕັ້ງສູນກາງພັກກອມມູນິດຈີນກ່າວວ່າ, ການທີ່ວາງ"ກົດລະບຽບການຮ່ວມຊີວິດການເມືອງພາຍໃນພັກພາຍໃຕ້ສະຖານະການໃໝ່" ເທື່ອນີ້, ໜຶ່ງແມ່ນຄວາມຕ້ອງການທີ່ປັບປຸງການຈັດວາງຍຸດທະສາດ "ສີ່ຮອບດ້ານ" ໃຫ້ສົມບູນຂຶ້ນ, ສອງແມ່ນຄວາມຕ້ອງການທີ່ຄວບຄຸມພັກຢ່າງເຂັ້ມງວມລົງສູ່ລວງເລິກຢ່າງຮອບດ້ານ, ສາມແມ່ນຄວາມຕ້ອງການທີ່ແກ້ໄຂບັນຫາແລະຄວາມຂັດແຍ້ງກັນອັນພົ້ນເດັ່ນທີ່ມີຢູ່ໃນທົ່ວພັກ.
ທ່ານອູຢີ້ລຽງ, ຮອງເລຂາທິການຂອງຄະນະກຳມະການກວດກາລະບຽບວິໄນສູນກາງພັກກອມມູນິດຈີນໄດ້ແນະນຳສະພາບການທີ່ກ່ຽວຂ້ອງຂອງ"ກົດລະບຽບການຕິດຕາມພາຍໃນພັກກອມມູນິດຈີນ"ແລະການຄວບຄຸມພັກຢ່າງເຂັ້ມງວດແລະຮອບດ້ານ, ເພີ່ມທະວີການກໍ່ສ້າງດ້ານລະບຽບວິໄນແລະເພີ່ມທະວີການຕິດຕາມພາຍໃນພັກ.
ທ່ານຈຽງຈ້ຽນໂກວ, ຮອງຫົວໜ້າຄະນະໂຄສະນາອົບຮົມສູນກາງພັກຄອມມູນິດຈີນທັງເປັນຫົວໜ້າຫ້ອງການຖະແຫຼງຂ່າວຂອງລັດຖະບານຈີນເປັນປະທານຈັດພິທີຖະແຫຼງຂ່າວ, ນັກຂ່າວຈີນແລະຕ່າງປະເທດ 120 ກວ່າຄົນໄດ້ເຂົ້າຮ່ວມ.
 |
