ຕາມຂ່າວCRI: ສຳນັກງານເລຂາຂອງງານວາງສະແດງສິນຄ້າສາກົນເສັ້ນທາງສາຍໄໝທາງທະເລສັດຕະວັດທີ 21 ກວາງຕຸ້ງ 2016 ໄດ້ຈັດພິທີຖະແຫຼງຂ່າວໃນຕອນບ່າຍວັນທີ 29 ຕຸລານີ້ໂດຍຢືນຢັນວ່າ,ໃນງານວາງສະແດງສິນຄ້າເສັ້ນທາງສາຍໄໝທາງທະເລປີນີ້ໄດ້ເຊັນສັນຍາໂຄງການປະເພດຕ່າງໆ 700 ສະບັບ. ຜູ້ເຂົ້າຊົມງານວາງສະແດງບັນລຸ 1 ແສນ 3 ໝື່ນ 9 ພັນເທື່ອຄົນ, ໃນນັ້ນ, ນັກທຸລະກິດຝ່າຍຈັດຊື້ມີ 2 ໝື່ນ 5 ພັນ 3 ຮ້ອຍເທື່ອຄົນ. ມູນຄ່າໃນສັນຍາ ແລະ ຈຳນວນນັກທຸລະກິດຝ່າຍຈັດຊື້ທີ່ເຂົ້າຮ່ວມງານວາງສະແດງລ້ວນແຕ່ສູງກວ່າ 2 ຄັ້ງກ່ອນ ແລະ ສ້າງສະຖິຕິໃໝ່.
ງານວາງສະແດງສິນຄ້າເສັ້ນທາງສາຍໄໝທາງທະເລປີນີ້ໄດ້ດຶງດູດ 73 ປະເທດ ແລະ ເຂດແຄວ້ນມາເຂົ້າຮ່ວມ, ໃນນັ້ນ, ມີ 52 ປະເທດ ແລະ ເຂດແຄວ້ນຈັດການວາງສະແດງ, 39 ປະເທດ ແລະ ເຂດແຄວ້ນຈັດຮ້ານວາງສະແດງລະດັບຊາດຂອງຕົນ ເຊິ່ງລ້ວນແຕ່ຫຼາຍກວ່າປີທີ່ຜ່ານມາ. ເນື້ອທີ່ວາງສະແດງຂອງງານວາງສະແດງປີນີ້ມີປະມານ 7 ໝື່ນຕາແມັດມີວິສາຫະກິດຈີນ ແລະ ຕ່າງປະເທດ 1.526 ແຫ່ງເຂົ້າຮ່ວມ.
ງານວາງສະແດງສິນຄ້າເສັ້ນທາງສາຍໄໝທາງທະເລຄັ້ງຕໍ່ໄປຈະຈັດຂຶ້ນຢູ່ເມືອງຕົ່ງກວນແຂວງກວາງຕຸ້ງແຕ່ວັນທີ 26 ຫາວັນທີ 29 ຕຸລາປີ 2017 ໂດຍເນື້ອທີ່ວາງສະແດງຈະຂະຫຍາຍຈາກ 7 ໝື່ນຕາແມັດກວ້າງອອກເປັນ 1 ແສນຕາແມັດ.
