ເວທີປຶກສາຫາລືການຮ່ວມມືລະຫວ່າງເມືອງທ່ອງທ່ຽວປະເທດແມ່ນ້ຳລ້ານຊ້າງ-ແມ່ນ້ຳຂອງ 2016 ໄດ້ຈັດຂຶ້ນຢູ່ເມືອງຊ່ານຢ້າ ແຂວງໄຫຫຼຳແຕ່ວັນທີ 27-28 ຕຸລານີ້ໂດຍຊ່ຽວຊານ 140 ທ່ານຈາກຈີນ,ລາວ,ກຳປູເຈຍ,ມຽນມາ,ໄທ,ຫວຽດນາມແລະປະເທດອື່ນໆເຂົ້າຮ່ວມ. ຜູ້ແທນທີ່ເຂົ້າຮ່ວມກອງປະຊຸມຢືນຢັນວ່າ: ຫວັງເພີ່ມທະວີການຮ່ວມມືດ້ານການທ່ອງທ່ຽວລະຫວ່າງປະເທດແມ່ນ້ຳລ້ານຊ້າງ-ແມ່ນ້ຳຂອງຕື່ມອີກເພື່ອນຳເອົາຜົນປະໂຫຍດມາສູ່ການພັດທະນາຂອງປະເທດໃນພາກພື້ນ.
ທ່ານຄຳຜອງ ດວງວິໄລ ເຈົ້າເມືອງເມືອງວັງວຽງ ສປປ ລາວກ່າວວ່າຕົນຫວັງເປັນຢ່າງຍິ່ງຕໍ່ອະນາຄົດຂອງການຮ່ວມມືດ້ານການທ່ອງທ່ຽວລະຫວ່າງປະເທດແມ່ນ້ຳລ້ານຊ້າງ-ແມ່ນ້ຳຂອງໃນຕໍ່ໜ້າເນື່ອງຈາກການຮ່ວມມືດ້ານການທ່ອງທ່ຽວລະຫວ່າງປະເທດເຫຼົ່ານີ້ມີຄວາມໝາຍສຳຄັນຍິ່ງຕໍ່ 6 ປະເທດ ແລະຫວັງວ່າຜົນສຳເລັດຂອງເວທີປຶກສາຫາລືຄັ້ງນີ້ຈະໄດ້ຮັບການຈັດຕັ້ງປະຕິບັດຕົວຈິງ. ແນວໃດກໍດີ, ປັດຈຸບັນ,ຈີນແລະເມືອງຂອງຕົນໄດ້ຮ່ວມມືດ້ານການທ່ອງທ່ຽວແລ້ວແລະຫວັງວ່າຜ່ານການຮ່ວມມືດ້ານການທ່ອງທ່ຽວລະຫວ່າງປະເທດແມ່ນ້ຳລ້ານຊ້າງ-ແມ່ນ້ຳຂອງໃນຕໍ່ໜ້າຈະຍົກລະດັບວັງວຽງໃຫ້ເປັນແຫຼ່ງທ່ອງທ່ຽວປາຍທາງຂອງພາກພື້ນ.
ໃນໄລຍະດຳເນີນກອງປະຊຸມເວທີປຶກສາຫາລືດັ່ງກ່າວໄດ້ຮັບຮອງແລະເປີດເຜີຍວິໄສທັດການຮ່ວມມືຊ່ານຢ້າທີ່ເປັນບົດບັນທຶກການຮ່ວມມືລະຫວ່າງເມືອງທ່ອງທ່ຽວປະເທດແມ່ນ້ຳລ້ານຊ້າງ-ແມ່ນ້ຳຂອງ 2016, ຂະນະດຽວກັນ, ບັນດາເມືອງທ່ອງທ່ຽວທີ່ກ່ຽວຂ້ອງຂອງປະເທດແມ່ນ້ຳລ້ານຊ້າງ-ແມ່ນ້ຳຂອງໄດ້ບັນລຸວິໄສທັດການຮ່ວມມື 8 ດ້ານເຊັ່ນກົນໄກປຶກສາຫາລືລະຫວ່າງຕົວເມືອງ, ການຮ່ວມມືໃນໂຄງການທ່ອງທ່ຽວແລະອື່ນໆໂດຍເອກະສານດັ່ງກ່າວນີ້ຈະເປັນທິດຊີ້ນຳບັນດາເມືອງທ່ອງທ່ຽວປະເທດແມ່ນ້ຳລ້ານຊ້າງ-ແມ່ນ້ຳຂອງເພີ່ມທະວີການສ້າງຄວາມເຂົ້າໃຈແລະແລກປ່ຽນກັນ ທັງສົ່ງເສີມການພັດທະນາຂະແໜງການທ່ອງທ່ຽວຂອງແຕ່ລະປະເທດ.