ໂດຍຕອບສະໜອງຕາມຄຳເຊີນຂອງທ່ານຫຼີເຄີ້ສຽງ ນາຍົກລັດຖະມົນຕີຈີນ, ທ່ານນາຈິບ ຕູນ ຣາຊັກ ນາຍົກລັດຖະມົນຕີມາເລເຊຍຈະຢ້ຽມຢາມຈີນຢ່າງເປັນທາງການແຕ່ວັນທີ 31 ຕຸລານີ້ເປັນຕົ້ນໄປ, ຂະນະທີ່ທ່ານນາຈິບໄດ້ຢືນຢັນຢູ່ນະຄອນຫຼວງກົວລາລຳເປີໃນວັນທີ 30 ຕຸລານີ້ວ່າ, ຈີນເປັນເພື່ອນມິດແລະຄູ່ຮ່ວມຍຸດທະສາດທີ່ແທ້ຈິງຂອງມາເລເຊຍ.
ທ່ານນາຈິບກ່າວວ່າ: ສາຍພົວພັນມາເລເຊຍ-ຈີນຢູ່ບົນພື້ນຖານຂອງຄວາມໄວ້ເນື້ອເຊື່ອໃຈກັນ,ມີຄວາມຈິງໃຈແລະເຄົາລົບເຊິ່ງກັນແລະກັນ, ສາຍພົວພັນມິດຕະພາບລະຫວ່າງສອງປະເທດບໍ່ພຽງແຕ່ຈະເປັນຜົນດີຕໍ່ປະຊາຊົນສອງຊາດເທົ່ານັ້ນ, ທັງເປັນຜົນດີຕໍ່ການສົ່ງເສີມສັນຕິພາບແລະສະຖຽນລະພາບຂອງພາກພື້ນອີກດ້ວຍ ແລະຫວັງວ່າການຢ້ຽມຢາເທື່ອນີ້ຈະຊ່ວຍເພີ່ມທະວີສາຍພົວພັນມິດຕະພາບລະຫວ່າງສອງປະເທດແລະສ້າງຄວາມສົມບູນພູນສຸກໃຫ້ແກ່ປະຊາຊົນສອງຊາດທັງສົ່ງເສີມສັນຕິພາບແລະສະຖຽນລະພາບຂອງໂລກກໍຄືພາກພື້ນຕື່ມອີກ. ແນວໃດກໍດີ, ການຢ້ຽມຢາມເທື່ອນີ້ຈະຍົກລະດັບການຄ້າລະຫວ່າງສອງປະເທດໃຫ້ສູງຂຶ້ນຕື່ມອີກ ແລະສົ່ງເສີມການຮ່ວມມືລະຫວ່າງສອງປະເທດໃນການກໍ່ສ້າງພື້ນຖານໂຄງລ່າງ.
ເມື່ອກ່າວເຖິງ "ໜຶ່ງແລວທາງໜຶ່ງເສັ້ນທາງ", ທ່ານນາຈິບກ່າວວ່າ: ພວກຂ້າພະເຈົ້າມີຄວາມໝັ້ນໃຈຢ່າງຍິ່ງຕໍ່ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ"ຂອງລັດຖະບານຈີນ ແລະການຈັດຕັ້ງປະຕິບັດຂໍ້ລິເລີ່ມດັ່ງກ່າວບໍ່ພຽງແຕ່ຈະເປັນຜົນດີຕໍ່ປະຊາຊົນສອງຊາດມາເລເຊຍ-ຈີນເທົ່ານັ້ນ ຫາກຍັງມີຄວາມໝາຍຢ່າງເລິກເຊິ່ງຍາວນານຕໍ່ການພັດທະນາຂອງບັນດາປະເທດທີ່ຢູ່ລຽບຕາມ "ໜຶ່ງແລວທາງໜຶ່ງເສັ້ນທາງ"ອີກດ້ວຍ.
 |
