ພັກກອມມູນິດຈີນໄດ້ເປີດເຜີຍຂໍ້ກຳນົດວ່າດ້ວຍຊີວິດການເມືອງພາຍໃນພັກພາຍໃຕ້ສະຖານະການໃໝ່ແລະກົດລະບຽບຕິດຕາມພາຍໃນພັກຢ່າງເປັນທາງການໃນວັນທີ 2 ພະຈິກນີ້ ເຊິ່ງເອກະສານສອງສະບັບດັ່ງກ່າວໄດ້ຜ່ານການພິຈາລະນາແລະຮັບຮອງໃນກອງປະຊຸມຄົບຄະນະເທື່ອທີ 6 ສະໄໝທີ 18 ຂອງພັກກອມມູນິດຈີນທີ່ຫາກໍອັດລົງກ່ອນໜ້ານີ້ບໍ່ດົນ ໂດຍຈຸດປະສົງເພື່ອສ້າງຫຼັກການພື້ນຖານໃຫ້ແກ່ການເພີ່ມທະວີແລະສ້າງຄວາມເປັນລະບຽບແບບແຜນໃນການດຳເນີນຊີວິດການເມືອງພາຍໃນພັກກອມມູນິດຈີນພາຍໃຕ້ສະຖານະການໃໝ່ແລະການເພີ່ມທະວີການຕິດຕາມພາຍໃນພັກ.
ຂ່າວແຈ້ງວ່າ: ພາກສ່ວນຫຼັກຂອງຂໍ້ກຳນົດວ່າດ້ວຍຊີວິດການເມືອງພາຍໃນພັກໃນສະຖານະການໃໝ່ໄດ້ລະບຸຄວາມຮຽກຮ້ອງຕ້ອງການຢ່າງຈະແຈ້ງແລະວາງຂໍ້ກຳນົດລະອຽດ 12 ດ້ານເປັນຕົ້ນການຍຶດໝັ້ນແນວທາງພື້ນຖານຂອງພັກ, ເພີ່ມທະວີການຜູກມັດແລະຕິດຕາມການປະຕິບັດສິດອຳນາດແລະອື່ນໆ. ຂະນະທີ່ກົດລະບຽບຕິດຕາມພາຍໃນພັກກອມມູນິດຈີນໄດ້ເນັ້ນການກຳນົດພາລະໜ້າທີ່ໃນການຕິດຕາມຂອງ 4 ພາກສ່ວນຄືອົງການຈັດຕັ້ງສູນກາງ,ຄະນະພັກຫຼືໜ່ວຍພັກ, ຄະນະກຳມະການກວດກາລະບຽບວິໄນພັກ,ອົງການຈັດຕັ້ງພັກຂັ້ນຮາກຖານແລະສະມາຊິກພັກພ້ອມທັງກຳນົດລະບຽບການຕິດຕາມທີ່ກ່ຽວຂ້ອງ.
ຊ່ຽວຊານການເມືອງໄດ້ໃຫ້ສຳພາດຕໍ່ນັກຂ່າວCRI ວ່າ, ສອງເອກະສານດັ່ງກ່າວເປັນຂີດໝາຍສະແດງໃຫ້ເຫັນວ່າການຄຸ້ມຄອງພັກຢ່າງເຂັ້ມງວດຮອບດ້ານຂອງຈີນໄດ້ເຂົ້າສູ່ໄລຍະຫັນເປັນລະບຽບການ ເຊິ່ງມີຄວາມໝາຍສຳຄັນຕໍ່ພັກກອມມູນິດຈີນນຳພາປະເທດຊາດດຳເນີນການປະຕິຮູບແລະພັດທະນາໃນຕໍ່ໜ້າ.