ວັນທີ 3 ພະຈິກນີ້, ທ່ານສີຈິ້ນຜີງ ປະທານປະເທດຈີນໄດ້ໃຫ້ກຽດຕ້ອນຮັບການເຂົ້າຢ້ຽມຄຳນັບຂອງທ່ານຈານິບ ຕຸນ ຣາຊັກ ນາຍົກລັດຖະມົນຕີມາເລເຊຍໃນໂອກາດເດີຣທາງມາຢ້ຽມຢາມຈີນຢູ່ຫໍຮັບແຂກຕ້ຽວຢີຖາຍນະຄອນຫຼວງປັກກິ່ງ.
ທ່ານສີຈິ້ນຜີງ ເນັ້ນວ່າ, ຈີນແລະມາເລເຊຍຄວນຮັກສາການໄປມາຫາສູ່ຢ້ຽມຢາມກັນລະຫວ່າງການນຳຂັ້ນສູງໃຫ້ເປັນປົກກະຕິ, ແລະລົງເລິກຄວາມໄວ້ເນື້ອເຊື່ອໃຈດ້ານການເມືອງ. ສອງຝ່າຍຄວນເພີ່ມທະວີການເຊື່ອມຈອດກັນດ້ານຍຸດທະສາດພັດທະນາ, ສ້າງພື້ນຖານອັນໝັ້ນແກ່ນໃຫ້ແກ່ການລົງເລິກການຮ່ວມມືເສດຖະກິດການຄ້າ. ຈີນຍິນດີຕ້ອນຮັບມາເລເຊຍເຂົ້າຮ່ວມການຮ່ວມມື "ໜຶ່ງແລວທາງໜຶ່ງເສັ້ນທາງ" ຢ່າງຕັ້ງໜ້າ, ທັງຍິນດີຮ່ວມກັບມາເລເຊຍຊຸກຍູ້ການກໍ່ສ້າງເສັ້ນທາງສາຍໄໝທາງທະເລສະຕະວັດທີ 21, ລົງເລິກການຮ່ວມມືໃນຂົງເຂດການກໍ່ສ້າງພື້ນຖານໂຄງລ່າງ, ພະລັງງານ, ວິທະຍາສາດເຕັກນິກ, ກະສິກຳ, ການເງິນແລະອື່ນໆ, ເປີດກວ້າງຜົນຂອງການເຊື່ອມຈອດກັນຂອງພາກພື້ນ. ຂະນະດຽວກັນກໍຍິນດີຮ່ວມກັບມາເລເຊຍ, ເພີ່ມເນື້ອໃນຂອງສາຍພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດໃຫ້ສົມບູນຢ່າງບໍ່ຢຸດຢັ້ງ, ລົງເລິກການຮ່ວມມືທີ່ແທ້ຈິງໃນຂົງເຂດຕ່າງໆ, ເພື່ອສ້າງຄວາມຜາສຸກໃຫ້ແກ່ປະຊາຊົນສອງປະເທດໃຫ້ດີກວ່າເກົ່າ.
ທ່ານນາຈິບ ກ່າວວ່າ, ປັດຈຸບັນມາເລເຊຍແລະຈີນໄດ້ເພີ່ມຄວາມໄວ້ເນື້ອເຊື່ອໃຈກັນ, ສາຍພົວພັນລະຫວ່າງສອງຝ່າຍໄດ້ກ້າວຂຶ້ນສູ່ລະດັບສູງສຸດໃນປະຫວັດສາດ. ມາເລເຊຍດີໃຈທີ່ເຫັນວ່າຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ຂອງຈີນໄດ້ຮັບການຕອບຮັບຢ່າງກວ້າງຂວາງ, ແລະໄດ້ຮັບໝາກຜົນຢ່າງຕັ້ງໜ້າ, ທັງຍິນດີເພີ່ມທະວີການຮ່ວມມືກັບຈີນໃນຂົງເຂດເສດຖະກິດການຄ້າແລະການລົງທຶນ, ການຂົນສົ່ງຄົມມະນາຄົມ, ການກໍ່ສ້າງທ່າກ່ຳປັ່ນແລະອື່ນໆພາຍໃຕ້ຂອບ "ໜຶ່ງແລວທາງໜຶ່ງເສັ້ນທາງ", ເຮັດໃຫ້ການແລກປ່ຽນວັດທະນະທຳລະຫວ່າງສອງຝ່າຍໃກ້ຊິດກວ່າເກົ່າ. ແລະພ້ອມຈະສຸມທຸກກຳລັງເພື່ອຊຸກຍູ້ການພົວພັນລະຫວ່າງອາຊຽນ-ຈີນ.