ທ່ານ ສິຈິ້ນຜິງ ປະທານປະເທດຈີນໄດ້ສົ່ງສານຊົມເຊີຍເຖິງທ່ານ ບັນກີມູນ ເລຂາທິການໃຫຍ່ອົງການສະຫະປະຊາຊາດຫຼື UN ຫຼັງ "ສັນຍາປາຣີ" ເພື່ອຮັບມືກັບການປ່ຽນແປງຂອງດິນຟ້າອາກາດມີຜົນສັກສິດຢ່າງເປັນທາງການໃນວັນທີ 4 ພະຈິກນີ້.
ໃນສານຊົມເຊີຍ, ທ່ານ ສິຈິ້ນຜິງ ຊີ້ໃຫ້ເຫັນວ່າ, ຈາກຄວາມພະຍາຍາມຮ່ວມກັນຂອງຝ່າຍຕ່າງໆ, "ສັນຍາປາຣີ" ໄດ້ມີຜົນສັກສິດໃນວັນທີ 4 ພະຈິກນີ້ຢ່າງເປັນທາງການເຊິ່ງເປັນໜຶ່ງໃນສັນຍາສາກົນທີ່ໄດ້ຮັບການອະນຸມັດມີຜົນສັກສິດໄວກວ່າໝູ່ໃນປະຫວັດສາດ. ຈີນຂໍສະແດງຄວາມຊົມເຊີຍດ້ວຍຄວາມຈິງໃຈຕໍ່ຜົນສຳເລັດດັ່ງກ່າວ.
ທ່ານ ສິຈິ້ນຜິງ ເນັ້ນວ່າ: "ສັນຍາປາຣີ" ໄດ້ໄຂໄລຍະໃໝ່ໃນການຮ່ວມມືສາກົນເພື່ອຮັບມືກັບການປ່ຽນແປງຂອງດິນຟ້າອາກາດ. ຂະນະທີ່ປະເທດຕົນຍຶດໝັ້ນທັດສະນະການພັດທະນາແບບປະດິດສ້າງໃໝ່, ກົມກຽວກັນ, ສີຂຽວ, ເປີດກວ້າງແລະຊົມໃຊ້ຮ່ວມກັນໂດຍຈະສຸມໃສ່ຊຸກຍູ້ການພັດທະນາເສດຖະກິດແບບສີຂຽວ, ກາກບອນຕ່ຳແລະໝູນວຽນ ທັງຈະໃຊ້ມາດຕະການທີ່ເຂັ້ມແຂງເພື່ອຮັບມືກັບການປ່ຽນແປງຂອງດິນຟ້າອາກາດ. ແນວໃດກໍດີ, ຈີນໝັ້ນໃຈຢ່າງເຕັມສ່ວນຕໍ່ຂະບວນການຄຸ້ມຄອງດິນຟ້າອາກາດສາກົນໃນຕໍ່ໜ້າທັງຍິນດີເພີ່ມທະວີການຮ່ວມມືແລະປະສານງານກັບຝ່າຍຕ່າງໆເພື່ອປະກອບສ່ວນເຂົ້າໃນການສ້າງກົນໄກຄຸ້ມຄອງດິນຟ້າອາກາດສາກົນທີ່ຮ່ວມມືນຳກັນ, ຕ່າງຝ່າຍຕ່າງມີຜົນປະໂຫຍດແລະສົມເຫດສົມຜົນ.