ຕອນບ່າຍວັນທີ 5 ພະຈິກນີ້ຢູ່ຫໍສະໝຸດແຫ່ງຊາດນະຄອນຫຼວງຣີກາປະເທດລັດວີ, ທ່ານຫຼີເຄີ້ສຽງ ນາຍົກລັດຖະມົນຕີຈີນແລະທ່ານມາຣິສຄູຊິນສກິສ ນາຍົກລັດຖະມົນຕີລັດວີ, ທ່ານວິກໂຕ ໂອບັນ ນາຍົກລັດຖະມົນຕີຮົງກາຣີໄດ້ຮ່ວມກັນຖະແຫຼງຂ່າວຕໍ່ສື່ມວນຊົນໂດຍຍົກໃຫ້ເຫັນຜົນສຳເລັດຂອງກອງປະຊຸມສຸດຍອດຈີນ-ປະເທດເອີຣົບກາງແລະຕາເວັນອອກເທື່ອທີ 5.
ທ່ານຫຼີເຄີ້ສຽງຢືນຢັນວ່າ: ກອງປະຊຸມສຸດຍອດເທື່ອນີ້ໄດ້ຈັດຂຶ້ນພາຍໃຕ້ສະພາບເສດຖະກິດໂລກໃນປັດຈຸບັນຟື້ນຕົວຢ່າງຊັກຊ້າ, ການຄ້າຂະຫຍາຍຕົວຊ້າລົງ ແລະບັນຫາຈຸດສຸມໃນສາກົນແລະພາກພື້ນເກີດມີການຜັນແປແລະສັບສົນຂຶ້ນ. ແນວໃດກໍດີ, ກອງປະຊຸມເທື່ອນີ້ໄດ້ສົ່ງສັນຍານທາງບວກຈະປົກປັກຮັກສາສັນຕິພາບແລະສະເຖຍລະພາບຂອງໂລກ,ສົ່ງເສີມການຄ້າໃຫ້ມີຄວາມເສລີແລະການລົງທຶນມີຄວາມສະດວກຂຶ້ນ ທັງຊຸກຍູ້ຂະບວນການໂລກາພິວັດ. ການຮ່ວມມືລະຫວ່າງຈີນກັບບັນດາປະເທດເອີຣົບກາງແລະຕາເວັນອອກເປັນການຮ່ວມມືຂ້າມພາກພື້ນລະຫວ່າງຈີນໃນຖານະເປັນປະເທດພວມພັດທະນາໃຫຍ່ທີ່ສຸດ ກັບກຸ່ມເສດຖະກິດພັດທະນາໃໝ່ຂອງເອີຣົບກາງແລະຕາເວັນອອກ ເຊິ່ງເປັນຜົນດີຕໍ່ການປົກປັກຮັກສາລະບົບການຄ້າໂລກ, ສົ່ງເສີມເສດຖະກິດໂລກພັດທະນາຢ່າງກ້ຳເຄິ່ງແລະເຕີບໂຕແບບກວມລວມ.
ທ່ານມາຣິສ ຄູຊິນສກິສ ນາຍົກລັດຖະມົນຕີລັດວີຢືນຢັນວ່າ ກອງປະຊຸມສຸດຍອດເທື່ອນີ້ໄດ້ປະສົບຜົນສຳເລັດທີ່ດີ. ບັນດາປະເທດເອີຣົບກາງແລະຕາເວັນອອກລ້ວນແຕ່ຫວັງຈະເພີ່ມທະວີການຮ່ວມມືກັບຈີນໂດຍເຊື່ອມຕໍ່ຍຸດທະສາດການພັດທະນາເຊິ່ງກັນແລະກັນ, ຈັດຕັ້ງປະຕິບັດຄວາມເປັນເອກະພາບກັນໃນການຮ່ວມມື ແລະເພີ່ມທະວີການຮ່ວມມືໃນຂົງເຂດຄົມມະນາຄົມ,ການທະນາຄານ, ວິທະຍາສາດເຕັກໂນໂລຊີ,ວັດທະນະທຳແລະອື່ນໆ ທັງຊຸກຍູ້ການເຊື່ອມຕໍ່ກັນລະຫວ່າງການກໍ່ສ້າງ "ໜຶ່ງແລວທາງໜຶ່ງເສັ້ນທາງ"ກັບແຜນການລົງທຶນເອີຣົບແລະອື່ນໆເພື່ອປະກອບສ່ວນເຂົ້າໃນການເສີມຂະຫຍາຍສາຍພົວພັນເອີຣົບ-ຈີນໃຫ້ມີການພັດທະນາຫຼາຍກວ່າເກົ່າ.
ທ່ານວິກໂຕ ໂອບັນ ນາຍົກລັດຖະມົນຕີຮົງກາຣີຢືນຢັນວ່າ ການຮ່ວມມື "16ບວກໜຶ່ງ"ສອດຄ່ອງກັບຜົນປະໂຫຍດຂອງປະເທດເອີຣົບກາງແລະຕາເວັນອອກ ທັງໄດ້ເປີດໂອກາດໃໝ່ໃຫ້ແກ່ການພັດທະນາສາຍພົວພັນເອີຣົບ-ຈີນອີກດ້ວຍ. ຮົງກາຣີພາກພູມໃຈຫຼາຍທີ່ຈະເປັນເຈົ້າພາບຈັດກອງປະຊຸມສຸດຍອດຈີນ-ເອີຣົບກາງແລະຕາເວັນອອກຄັ້ງຕໍ່ໄປ ແລະຈະຮັບປະກັນຈັດກອງປະຊຸມໃຫ້ປະສົບຜົນສຳເລັດ.