ຕອນບ່າຍວັນທີ 7 ພະຈິກນີ້ ຕາມເວລາທ້ອງຖິ່ນ ຢູ່ວັງຄອນສຕານທິນເມືອງແຊນປີເຕີສເບີກປະເທດຣັດເຊຍ, ທ່ານຫຼີເຄີ້ສຽງ ນາຍົກລັດ ຖະມົນຕີຈີນແລະທ່ານດີມີຕຣີ ເມັດເວເດັຟ ນາຍົກລັດຖະມົນຕີຣັດເຊຍໄດ້ຮ່ວມກັນເປັນປະທານກອງປະຊຸມພົບປະປົກກະຕິຂອງນາຍົກ ລັດຖະມົນຕີຈີນ-ຣັດເຊຍເທື່ອທີ 21.
ທ່ານຫຼີເຄີ້ສຽງຢືນຢັນວ່າ: ຈີນຍິນດີຮ່ວມກັບຣັດເຊຍພະຍາຍາມເຮັດໃຫ້ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ"ເຊື່ອມຕໍ່ກັບສະຫະພັນເສດ ຖະກິດເອີຣົບ-ອາຊີໃຫ້ມີປະສິດທິຜົນ ແລະຍົກລະດັບສາຍພົວພັນຈີນ-ຣັດເຊຍແລະການຮ່ວມມືລະຫວ່າງສອງປະເທດໃຫ້ສູງຂຶ້ນຢ່າງບໍ່ຢຸດຢັ້ງ ເພື່ອບັນລຸເປົ້າໝາຍຕ່າງຝ່າຍຕ່າງໄດ້ຮັບຜົນປະໂຫຍດແລະສ້າງຄວາມສົມບູນພູນສຸກໃຫ້ແກ່ປະຊາຊົນສອງຊາດ. ຂະນະດຽວກັນ, ກໍຈະພະຍາຍາມຂຸດຄົ້ນທ່າແຮງບົ່ມຊ້ອນໃນການຮ່ວມມືໂດຍລົງເລິກການຮ່ວມມືໃນການກໍ່ສ້າງພື້ນຖານໂຄງລ່າງເປັນຕົ້ນພະລັງງານນິວເຄລຍທີ່ໃຊ້ເຂົ້າໃນທາງພົນລະເຮືອນ, ການຜະລິດອຸປະກອນການບິນ,ທາງລົດໄຟແລະອື່ນໆ.
ທ່ານເມັດເວເດັຟກ່າວວ່າ: ຣັດເຊຍ-ຈີນເປັນເພື່ອນບ້ານໃກ້ຄຽງທີ່ມີໄມຕີຈິດມິດຕະພາບກັນ. ປີນີ້, ສອງປະເທດຖືວັນລະນຶກການສ້າງຕັ້ງສາຍພົວພັນຄູ່ປະສານງານຍຸດທະສາດຄົບຮອບ 20 ປີ ແລະການເຊັນສົນທິສັນຍາການຮ່ວມມືໄມຕີຈິດຖານບ້ານໃກ້ເຮືອນຄຽງຣັດເຊຍ-ຈີນເປັນໂອກາດທີ່ດີເພື່ອຮັກສາສາຍພົວພັນຄູ່ປະສານງານຍຸດທະສາດຮອບດ້ານໃຫ້ຂະຫຍາຍຕົວໃຫ້ສູງຂຶ້ນ,ເພີ່ມທະວີການຮ່ວມມືລະຫວ່າງສອງປະເທດໃນວຽກງານສາກົນທັງພ້ອມກັນຮັບມືກັບສິ່ງທ້າທາຍຕ່າງໆໃນໂລກ.
ນາຍົກລັດຖະມົນຕີທັງສອງປະເທດໄດ້ຮັບຟັງການລາຍງານການປະຕິບັດໜ້າທີ່ຂອງ 4 ກົນໄກຮ່ວມມືສອງຝ່າຍຄື ຄະນະກຳມະການຮ່ວມມືວັດທະນະທຳຈີນ-ຣັດເຊຍ, ຄະນະກຳມະການພົບປະເປັນປົກກະຕິຂອງນາຍົກຈີນ-ຣັດເຊຍ,ຄະນະກຳມະການຮ່ວມມືດ້ານການລົງທຶນແລະຄະນະກຳມະການຮ່ວມມືດ້ານພະລັງງານ ທັງໄດ້ລົງເລິກແລກປ່ຽນຄວາມເຫັນກ່ຽວກັບແຜນແມ່ບົດຮ່ວມມືໃນອະນາຄົດອີກດ້ວຍ.
 |
