ວັນທີ 11 ພະຈິກນີ້, ຄະນະຜູ້ແທນສະມາຄົມຊຸກຍູ້ການຮ່ວມມືໃຕ້ໆຈີນທີ່ນຳພາໂດຍທ່ານຫຼຸຍຊີນຮວາ, ຮອງຫົວໜ້າຄະນະກຳມະການວຽກງານການຕ່າງປະເທດຂອງສະພາປຶກສາການເມືອງປະຊາຊົນຈີນ, ອະດີດຮອງລັດ
ຖະມົນຕີກະຊວງການຕ່າງປະເທດຈີນໄດ້ຈັດງານສົນທະນາກັບຜູ້ຕາງໜ້າສະຫະພັນອຸດສາຫະກຳແລະການຄ້າມຽນມາຢູ່ນະຄອນຢາງກຸ້ງເຊິ່ງເປັນໃຈກາງເສດຖະກິດຂອງມຽນມາ, ເພື່ອປຶກສາຫາລືກ່ຽວກັບວິສາຫະກິດຈີນໄປລົງທຶນຢູ່ມຽນມາ.
ຄະນະຜູ້ແທນສະມາຄົມຊຸກຍູ້ການຮ່ວມມືໃຕ້ໆຈີນທີ່ເດີນທາງໄປຢ້ຽມຢາມຢູ່ມຽນມາໃນຄັ້ງນີ້ລວມທັງຜູ້ຕາງໜ້າຈາກ 22 ວິສາຫະກິດໃນເຂດການກໍ່ສ້າງພື້ນຖານໂຄງລ່າງ, ການຜະລິດອຸປະກອນເຂື່ອນໄຟຟ້ານ້ຳຕົກ, ທະນາຄານ, ບໍລິສັດການລົງທຶນແລະອື່ນໆ. ທ່ານຫຼຸຍຊີນ ຮວາ, ຫົວໜ້າຄະນະຜູ້ແທນ, ປະທານສະມາຄົມຊຸກຍູ້ການຮ່ວມມືໃຕ້ໆຈີນກ່າວວ່າ, ສິ່ງສຳຄັນທີ່ສຸດໃນການປຶກສາຫາລືລະຫວ່າງຈີນກັບມຽນມາແມ່ນເຮັດວຽກງານຕິດຕໍ່ຄວາມຕ້ອງການໃຫ້ດີ. ປັດຈຸບັນນີ້, ຈີນແມ່ນຄູການຄ້າໃຫຍ່ທີ່ສຸດແລະແຫຼ່ງການລົງທຶນໃຫຍ່ທີ່ສຸດຂອງມຽນມາ. ໃນຂະນະທີ່ຍິນດີຕ້ອນຮັບວິສາຫະກິດຈີນຫຼາຍກວ່າເກົ່າມາລົງທຶນຢູ່ມຽນມາ, ທ່ານຕິນ ສະວາຍ, ຜູ້ປະຕິບັດງານຜູ້ທຳອິດຫຼື ceo ຂອງສະຫະພັນອຸດສາຫະກຳແລະການຄ້າມຽນມາກ່າວວ່າ, ສິ່ງກໍ່ສ້າງພື້ນຖານໂຄງລ່າງ, ໂທລະຄົມ, ພະລັງງານແລະໄຟຟ້າ, ການຂຸດຄົ້ນບໍ່ແຮ່ແລະການສຳຫຼວດ, ກະສິກຳລ້ວນແຕ່ແມ່ນຂະແໜງການທີ່ຕ້ອງການການລົງທຶນຢ່າງຮີບດ່ວນໃນປັດຈຸບັນນີ້.
ອີງຕາມຂໍ້ມູນຕົວເລກທີ່ເປີດເຜີຍໂດຍກົມຄຸ້ມຄອງການລົງທຶນແລະວິສາຫະກິດມຽນມາ, ນັບມາຮອດທ້າຍເດືອນມິຖຸນາປີ 2016 ນີ້, ມີນັກທຸລະກິດການລົງທຶນທີ່ມາຈາກ 41 ປະເທດມາລົງທຶນຢູ່ມຽນມາ, ຈີນໄດ້ລົງທຶນ 108 ໂຄງການ, ຍອດມູນຄ່າການລົງທຶນມີເກືອບ 18 ຕື້ໂດລາສະຫະລັດ, ແມ່ນປະເທດທີ່ໄດ້ລົງທຶນຢູ່ມຽນມາຫຼາຍທີ່ສຸດ.