ວັນທີ 11 ພະຈິກນີ້, ໃນກອງປະຊຸມຂ່າວ, ໃນເວລາຕອບຄຳຖາມກ່ຽວກັບຄຳເວົ້າຂອງທ່ານໂຣມານາ ເອກອັກຄະລັດຖະທູດຟີລິບປິນປະຈຳຈີນຜູ້ໃໝ່ທີ່ຍັງບໍ່ທັນດຳລົງຕຳແໜ່ງ, ທ່ານລູ້ຄ່າງ ໂຄສົກກະຊວງການຕ່າງປະເທດຈີນກ່າວວ່າ, ຫວັງໃຫ້ສື່ມວນຊົນທີ່ກ່ຽວຂ້ອງລາຍງານຂ່າວຢ່າງພາວະວິໄສແລະຖືກຕ້ອງ, ຢ່າເຮັດສິ່ງທີ່ບິດເບືອນຜູ້ໃຫ້ສຳພາດແລະເຮັດໃຫ້ຜູ້ອ່ານເຂົ້າໃຈຜິດ. ປັດຈຸບັນ, ການພົວພັນລະຫວ່າງຈີນກັບຟີລິບປິນໄດ້ຮັບການປັບປຸງໃຫ້ດີຂຶ້ນຢ່າງຮອບດ້ານ, ຝ່າຍຈີນຍິນດີຮ່ວມກັບຝ່າຍຟີລິບປິນອອກແຮງຂະຫຍາຍການຮ່ວມມືຢ່າງມີໄມຕີຈິດລະຫວ່າງປະເທດໃຫ້ກ້າວສູ່ລວງເລິກ.
ທ່ານກ່າວວ່າ, ໃນໄລຍະທ່ານດູເຕຣ໌ເຕຢ້ຽມຢາມຈີນ, ຜູ່ນຳສອງປະເທດຈີນຟີລິບປິນໄດ້ແລກປ່ຽນຄວາມເຫັນຢ່າງເຕັມທີ່ກ່ຽວກັບຫຼາຍບັນຫາ, ຍັງໄດ້ກ້າວເຖິງຂັ້ນມີຄວາມຮັບຮູ້ຄືກັນຫຼາຍດ້ານ, ລວມທັງເປັນເອກະສັນກັນເຫັນວ່າຄວນເນັ້ນໜັກການຮ່ວມມືແລະສະຫງວນຄວາມຂັດແຍ້ງ, ຮ່ວມກັນຊຸກຍູ້ໃຫ້ບັນຫາທະເລຈີນໃຕ້ກັບຄືນສູ່ວົງໂຄຈອນທີ່ໃຫ້ຝ່າຍກ່ຽວຂ້ອງໂດຍກົງມາແກ້ໄຂໂດຍຜ່ານການສົນທະນາແລະປຶກສາຫາລືລະຫວ່າງສອງຝ່າຍ. ສອງຝ່າຍຈີນຟີລິບປິນກໍ່ເຫັນວ່າ, ຄວາມຮັບຮູ້ທີ່ເປັນເອກະພາບກັນດັ່ງກ່າວມີຜົນດີຕໍ່ສອງປະເທດຈີນຟີລິບປິນແລະປະຊາຊົນສອງຊາດ, ຍັງໄດ້ສ້າງເງື່ອນໄຂທີ່ດີໃຫ້ແກ່ສັນຕິພາບ, ສະເຖຍລະພາບແລະການພັດທະນາຂອງພາກພື້ນ. ທ່ານກ່າວວ່າ, ປັດຈຸບັນ, ການພົວພັນລະຫວ່າງຈີນກັບຟີລິບປິນໄດ້ຮັບການປັບປຸງໃຫ້ດີຂຶ້ນຢ່າງຮອບດ້ານ. ຝ່າຍຈີນຍິນດີຮ່ວມກັບຟີລິບປິນອອກແຮງເປີດກວ້າງແລະລົງເລິກການຮ່ວມມືຢ່າງມີໄມຕີຈິດລະຫວ່າງສອງປະເທດ, ຊຸກຍູ້ໃຫ້ການຮ່ວມມືລະຫວ່າງສອງປະເທດໄດ້ຮັບໝາກຜົນອັນແທ້ຈິງຫຼາຍກວ່າເກົ່າ.
ຕາມຂ່າວແຈ້ງອີກວ່າ, ກ່ອນໜ້ານີ້, ທ່ານໂຣມານາຍັງກ່າວວ່າ, ສາມາດຖອດຖອນບົດຮຽນຈາກການແກ້ໄຂຄວາມຂັດແຍ້ງດ້ານຜືນແຜ່ນດິນໂດຍຜ່ານການປຶກສາຫາລືລະຫວ່າງຈີນກັບຫວຽດນາມແລະປະເທດອື່ນ, ໃນນັ້ນມີຈຸດພື້ນຖານກໍແມ່ນ, ຖ້າໃຊ້ມາດຕະການອັນແຂງແຮງ, ຈີນຈະມີການຕອບໂຕ້ອັນແຂງແຮງຫຼືແຂງແຮງກວ່າ. ຈີນກັບຫວຽດນາມແລະປະເທດອື່ນໄດ້ມີແຜນການແກ້ໄຂໂດຍຜ່ານການປຶກສາຫາລືຫຼາຍປີ. ນີ້ສະແດງໃຫ້ເຫັນວ່າ, ການແກ້ໄຂຄວາມຂັດແຍ້ງດ້ານຜືນແຜ່ນດິນກັບອົງກອນເສດຖະກິດໃຫຍ່ທີ່ສອງໃນໂລກແມ່ນເລື່ອງທີ່ເປັນໄປໄດ້, ພຽງແຕ່ຕ້ອງການເວລາຊື່ໆ.
