ໂດຍຕອບສະໜອງຕາມຄຳເຊີນຂອງທ່ານນາງຫງວຽນຕີກິມຫງັນ ກຳມະການກົມການເມືອງສູນກາງພັກກອມມູນິດຫວຽດນາມ, ປະທານສະພາແຫ່ງຊາດຫວຽດນາມ, ແຕ່ວັນທີ 8 ຫາວັນທີ 11 ພະຈິກນີ້, ທ່ານຈ່າງເຕີຈ່ຽງ ກຳມະການປະຈຳກົມການເມືອງສູນກາງພັກກອມມູນິດຈີນ, ປະທານສະພາປະຊາຊົນແຫ່ງຊາດຈີນໄດ້ນຳພາຄະນະຜູ້ແທນພັກການເມືອງຈີນໄປຢ້ຽມຢາມສັນທະວະໄມຕີຕໍ່ຫວຽດນາມຢ່າງເປັນທາງການ, ໃນໄລຍະຢ້ຽມຢາມ, ທ່ານຈ່າງເຕີຈ່ຽງໄດ້ພົບປະທ່ານຫງວຽນຟູຕົງ ເລຂາທິການໃຫຍ່ສູນກາງພັກກອມມູນິດຫວຽດນາມ, ທ່ານຕັນໄດກວາງ ປະທານແຫ່ງຊາດຫວຽດນາມ, ທ່ານຫງວນຊວນຟຸກ ນາຍົກລັດຖະມົນຕີຫວຽດນາມ, ແລະໄດ້ເຈລະຈາກັບທ່ານນາງຫງວຽນຕີກິມຫງັນ, ພົບປະທ່ານຣວນຊັນເຣນ ປະທານແນວປະເທດຊາດຫວຽດນາມ.
ໃນເວລາພົບປະທ່ານຫງວນຟູຕົງ, ທ່ານຈ່າງເຕີຈ່ຽງໄດ້ສົ່ງຄວາມຢື້ຢາມຖາມຂ່າວທີ່ອົບອຸ່ນຂອງທ່ານເລຂາທິການໃຫຍ່ສີຈີ້ນພິງໄປຍັງທ່ານຫງວຽນຟູຕົງ. ທ່ານຈ່າງເຕີຈ່ຽງໄດ້ຕີລາຄາສູງຕໍ່ຜົນສຳເລດທີ່ພັກແລະປະເທດຫວຽດນາມໄດ້ຮັບ. ທ່ານກ່າວວ່າ, ຈີນກັບຫວຽດນາມລ້ວນແຕ່ແມ່ນປະເທດສັງຄົມນິຍົມທີ່ນຳພາໂດຍພັກກອມມູນິດ, ການເພີ່ມທະວີແລະລົງເລິກການພົວພັນລະຫວ່າງສອງພັກແມ່ນເລື່ອງທີ່ສຳຄັນທີ່ສຸດ. ຝ່າຍຈີນຍິນດີພະຍາຍາມຮ່ວມກັບຝ່າຍຫວຽດນາມ, ຜັນຂະຫຍາຍຄວາມຮັບຮູ້ທີ່ເປັນເອກະພາບກັນອັນສຳຄັນລະຫວ່າງທ່ານເລຂາທິການໃຫຍ່ສີຈີ້ນພິງກັບທ່ານເລຂາທິການໃຫຍ່ຫງວຽນຟູຕົງ, ປະຕິບັດຕາມທິດທາງ " 16 ຕົວໜັງສື" ແລະຈິດໃຈ "ສີ່ດີ" , ສືບທອດມິດຕະພາບດັ້ງເດີມລະຫວ່າງຈີນຫວຽດນາມ, ເພີ່ມທະວີການອອກແບບລະດັບສູງ, ເນັ້ນໜັກການຊີ້ນຳທາງຍຸດທະສາດ, ເພີ່ມທະວີການພັດທະນາທີ່ຕິດຕໍ່ກັນ, ເຮັດໃຫ້ເນື້ອໃນການຮ່ວມມືມີຫຼາຍຮູບການ, ເພີ່ມທະວີການຕິດຕໍ່ພົວພັນກັນແລະປຶກສາຫາລືກັນ, ລົບລ້າງປັດໄຈລົບກວນ, ເພີ່ມທະວີການແລກປ່ຽນດ້ານວັດທະນະທຳ, ປັບປຸງພື້ນຖານປະຊາມະຕິໃຫ້ໝັ້ນຄົງ, ປັບປຸງແລະລົງເລິກປະຊາຄົມໂຊກຊະຕາຈີນຫວຽດນາມຢ່າງບໍ່ຢຸດຢັ້ງ.
ໃນກາພົບປະເຈລະຈາ, ທ່ານຈ່າງເຕີຈ່ຽງໄດ້ແນະນຳສະພາບກອງປະຊຸມຄົບຄະນະຄັ້ງທີ 6 ສູນກາງພັກກອມມູນິດຈີນ ສະໄໝທີ 18 .
ໃນໄລຍະຢ້ຽມຢາມ, ທ່ານຈ່າງເຕີຈ່ຽງຍັງໄດ້ເຂົ້າຮ່ວມກິດຈະກຳການແລກປ່ຽນໄມຕີຈິດລະຫວ່າງປະຊາຊົນຈີນຫວຽດນາມແລະງານມ່ວນຊື່ນຮ່ວມກັນຊາວໜຸ່ມຈີນຫວຽດນາມຄັ້ງທີ 3 ແລະກ່າວຄຳປາໄສ.