ວັນທີ 14 ພະຈິກນີ້, ທ່ານສີຈິ້ນຜິງ ປະທານປະເທດຈີນໄດ້ລົມໂທລະສັບກັບທ່ານໂດນັນ ທຣະ (Donald Trump) ວ່າທີ່ປະທານາທິບໍດີອາເມລິກາ.
ໂອກາດດັ່ງກ່າວ,ທ່ານສີຈິ້ນຜິງໄດ້ຊົມເຊີຍທ່ານທຣະທີ່ໄດ້ຮັບເລືອກຕັ້ງເປັນປະທານາທິບໍດີອາເມລິກາທັງກ່າວຢືນຢັນວ່າ ເລື່ອງຈິງໄດ້ພິສູດໃຫ້ເຫັນວ່າ ການຮ່ວມມືເປັນທາງເລືອກທີ່ຖືກຕ້ອງພຽງໜຶ່ງດຽວຂອງຈີນ-ອາເມລິກາ. ສອງປະເທດໃນຖານະເປັນປະເທດພວມພັດທະນາໃຫຍທີ່ສຸດ, ປະເທດທີ່ພັດທະນາແລ້ວໃຫຍ່ທີ່ສຸດ ແລະສອງກຸ່ມເສດຖະກິດໃຫຍ່ທີ່ສຸດຂອງໂລກໃນປັດຈຸບັນ, ການຮ່ວມມືຈີນ-ອາເມລິກາມີໂອກາດສຳຄັນແລະທ່າແຮງບົ່ມຊ້ອນຢ່າງມະຫາສານແລະສິ່ງທີ່ສອງຝ່າຍຕ້ອງການຮ່ວມມືແລະສາມາດຮ່ວມມືນັ້ນມີຢ່າງຫຼວງຫຼາຍ. ຂ້າພະເຈົ້າໃຫ້ຄວາມສຳຄັນສູງຕໍ່ສາຍພົວພັນຈີນ-ອາເມລິກາ ແລະຍິນດີຮ່ວມກັບອາເມລິກາສຸມທຸກຄວາມພະຍາຍາມຊຸກຍູ້ສາຍພົວພັນສອງປະເທດ ແລະສ້າງຄວາມສົມບູນພູນສຸກໃຫ້ແກ່ປະຊາຊົນສອງຊາດກໍຄືປະຊາຊົນປະເທດອື່ນໃຫ້ຫຼາຍກວ່າເກົ່າ.
ທ່ານທຣະຢືນຢັນວ່າ ຂ້າພະເຈົ້າເຫັນດີຕໍ່ຄວາມເຫັນຂອງທ່ານປະທານສີຈິ້ນຜິງກ່ຽວກັບສາຍພົວພັນອາເມລິກາ-ຈີນ. ຈີນເປັນປະເທດສຳຄັນທີ່ຍິ່ງໃຫຍ່ແລະມີອະນາຄົດທີ່ສົດໃສແຫ່ງການພັດທະນາທີ່ສາມາດດຶງດູດສາຍຕາຊາວໂລກ. ສອງປະເທດສາມາດບັນລຸການຮ່ວມມືຕ່າງຝ່າຍຕ່າງໄດ້ຮັບຜົນປະໂຫຍດນຳກັນ. ຂ້າພະເຈົ້າຍິນດີພ້ອມກັບທ່ານເພີ່ມທະວີການຮ່ວມມືລະຫວ່າງສອງປະເທດ ແລະເຊື່ອໝັ້ນວ່າ ສາຍພົວພັນອາເມລິກາ-ຈີນຈະໄດ້ຮັບການພັດທະນາທີ່ດີກວ່າເກົ່າ.
ທ່ານສີຈິ້ນຜິງແລະທ່ານທຣະເຫັນດີຮັກສາການຕິດຕໍ່ພົວພັນຢ່າງໃກ້ຊິດແລະສ້າງຕັ້ງສາຍພົວພັນທີ່ດີໃນການປະຕິບັດວຽກງານ ທັງຈະພົບປະກັນໂດຍໄວເພື່ອແລກປ່ຽນຄວາມເຫັນຢ່າງທັນການກ່ຽວກັບການຂະຫຍາຍຕົວຂອງການພົວພັນສອງປະເທດແລະບັນຫາທີ່ສອງຝ່າຍ ສົນໃຈຮ່ວມກັນ.