ທ່ານຣາຟາເອວ ຄໍເຣອາ ເດວກາໂດ ປະທານາທິບໍດີເອກວາດໍ ໄດ້ໃຫ້ສຳພາດນັກຂ່າວຫວ່າງມໍ່ໆມານີ້ວ່າ: ທ່ານສີຈິ້ນຜິງ ປະທານປະເທດຈີນ ຈະເດີນທາງຢ້ຽມຢາມປະເທດຕົນໃນມໍ່ໆນີ້ ຈະເປັນການຊຸກຍູ້ສາຍພົວພັນລະຫວ່າງສອງປະເທດໃຫ້ຂຶ້ນສູ່ລະດັບໃໝ່. ແນວໃດກໍດີ, ສອງປະເທດໄດ້ປະກາດສ້າງຕັ້ງສາຍພົວພັນຄູ່ຮ່ວມຍຸດທະສາດເມື່ອປີຜ່ານມາ ແລະປັດຈຸບັນ ສາຍພົວພັນລະຫວ່າງສອງປະເທດພວມຢູ່ໃນໄລຍະດີທີ່ສຸດໃນປະຫວັດສາດ. ບໍ່ຕ້ອງສົງໄສເລີຍວ່າ, ສາຍພົວພັນຄູ່ຮ່ວມຍຸດທະສາດທີ່ເອກວາດໍແລະຈີນສ້າງຕັ້ງຂຶ້ນບົນພື້ນຖານສະເໝີພາບ, ຕ່າງເຄົາລົບເຊິ່ງກັນແລະກັນນັ້ນ ໄດ້ຮັບໝາກຜົນທີ່ອຸດົມສົມບູນ. ຂະນະທີ່ທ່ານປະທານສີຈິ້ນຜິງ ເດີນທາງຢ້ຽມຢາມເທື່ອນີ້ ຈະເປັນການຊຸກຍູ້ການຮ່ວມມືທີ່ແທ້ຈິງໃນຂົງເຂດຕ່າງໆລະຫວ່າງສອງປະເທດໃຫ້ຂຶ້ນສູ່ລະດັບໃໝ່.
ທ່ານ ຣາຟາເອວ ຄໍເຣອາ ເດວກາໂດ ເຫັນວ່າ: ສາຍພົວພັນລະຫວ່າງເອກວາດໍ ແລະ ຈີນ ມີຊ່ອງທາງພັດທະນາທີ່ກວ້າງຂວາງ ແລະ ມີຄວາມສາມາດບົ່ມຊ້ອນຢ່າງມະຫາສານ ເຊິ່ງຫວັງວ່າຈີນຈະເພີ່ມທະວີການສະໜັບສະໜູນປະເທດຕົນໃນຂົງເຂດວິທະຍາສາດ-ເຕັກນິກ, ຖ່າຍທອດເຕັກນິກໃຫ້ປະເທດຕົນເພື່ອຊົມໃຊ້ໝາກຜົນວິທະຍາສາດ-ເຕັກນິກຮ່ວມກັນ. ທັງນີ້ຈະຊ່ວຍໃຫ້ປະເທດຕົນບັນລຸການຫັນເປັນອຸດສາຫະກຳ ແລະຊ່ວຍໃຫ້ຫຼຸດອອກຈາກການອາໄສຊັບພະຍາກອນນ້ຳມັນເຊື້ອໄຟທີ່ເປັນເສດຖະກິດຕົ້ນຕໍເທົ່ານັ້ນລົງເທື່ອລະກ້າວ.
