ວັນທີ 14 ພະຈິກນີ້, ທະນາຄານໂລກໄດ້ແຈ້ງ ວ່າ: ການພັດທະນາຂອງລາວໄດ້ມີຄວາມກ້າວໜ້າຢ່າງໃຫຍ່ຫຼວງໂດຍປະຊາກອນທີ່ທຸກຍາກໄດ້ຫຼຸດລົງເກືອບ 24% ຂອງປະຊາກອນໃນທົ່ວປະເທດ.
ທ່ານນາງວິກໂດເຣຍ ຄວັກວາ ຮອງຜູ້ວ່າການທະນາຄານໂລກປະຈຳອາຊີປາຊີຟິກກ່າວຂະນະຢ້ຽມຢາມນະຄອນຫຼວງວຽງຈັນແລະແຂວງຄຳມ່ວນ ສປປ ລາວລະຫວ່າງວັນທີ 9-12 ພະຈິກນີ້ວ່າ ຊີວິດການເປັນຢູ່ຂອງປະຊາຊົນທ້ອງຖິ່ນດັ່ງກ່າວໄດ້ຮັບການປັບປຸງດີຂຶ້ນໂດຍມີຫຼາຍຄອບຄົວໄດ້ຊົມໃຊ້ໄຟຟ້າຫຼາຍຂຶ້ນລວມທັງໄດ້ເຂົ້າເຖິງການຊົມໃຊ້ນ້ຳປະປາ,ສາທາລະນະສຸກແລະເສັ້ນທາງຄົມມະນາຄົມທີ່ດີກວ່າເກົ່າ.
ນາງຄວັກວາກ່າວຢ້ຳວ່າ ທະນາຄານໂລກຈະສຸມໃສ່ຊຸກຍູ້ລາວບັນລຸນະໂຍບາຍແລະໂຄງການກ່ຽວກັບການເຕີບໂຕໂດຍລວມ,ລົງທຶນພັດທະ ນາຊັບພະຍາກອນມະນຸດ ແລະອະນຸລັກສິ່ງແວດລ້ອມຕາມແຜນການພັດທະນາເສດຖະກິດສັງຄົມແຫ່ງຊາດ 5 ປີຄັ້ງທີ 8 ແລະກໍເຫັນວ່າ ລາວມີໂອກາດບັນລຸການເຕີບໂຕຢ່າງແຂງແຮງແລະການສ້າງວຽກເຮັດງານທຳຫຼາຍຂຶ້ນຂະນະທີ່ການອະນຸລັກຊັບພະຍາກອນທຳມະຊາດໃຫ້ອຸດົມສົມບູນກໍມີທ່າອ່ຽງຫຼາຍຂຶ້ນ.ຂະນະດຽວກັນກໍຊົມເຊີຍລາວທີ່ເນັ້ນການຂະຫຍາຍຕົວສີຂຽວຄືເອົາໃຈໃສ່ປົກປັກຮັກສາສິ່ງແວດລ້ອມຫຼາຍກວ່າເກົ່າລວມທັງລາຍຮັບແລະການພັດທະນາກໍສາມາດຮັກສາການເຕີບໂຕໄດ້ຢ່າງວ່ອງໄວ.